ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ସପ୍ତଵିଂଶସ୍ସର୍ଗଃ ।
ଖରଂ ତୁ ରାମାଭିମୁଖଂ ପ୍ରୟାଂତଂ ଵାହିନୀପତିଃ ।
ରାକ୍ଷସସ୍ତ୍ରିଶିରା ନାମ ସନ୍ନିପତ୍ୟେଦମବ୍ରଵୀତ୍ ॥ 1 ॥
ମାଂ ନିୟୋଜୟ ଵିକ୍ରାଂତ ସନ୍ନିଵର୍ତସ୍ଵ ସାହସାତ୍ ।
ପଶ୍ୟ ରାମଂ ମହାବାହୁଂ ସଂୟୁଗେ ଵିନିପାତିତମ୍ ॥ 2 ॥
ପ୍ରତିଜାନାମି ତେ ସତ୍ୟମାୟୁଧଂ ଚାହମାଲଭେ ।
ୟଥା ରାମଂ ଵଧିଷ୍ୟାମି ଵଧାର୍ହଂ ସର୍ଵରକ୍ଷସାମ୍ ॥ 3 ॥
ଅହଂ ଵାସ୍ୟ ରଣେ ମୃତ୍ୟୁରେଷ ଵା ସମରେ ମମ ।
ଵିନିଵୃତ୍ୟ ରଣୋତ୍ସାହାନ୍ମୁହୂର୍ତଂ ପ୍ରାଶ୍ନିକୋ ଭଵ ॥ 4 ॥
ପ୍ରହୃଷ୍ଟୋ ଵା ହତେ ରାମେ ଜନସ୍ଥାନଂ ପ୍ରୟାସ୍ୟସି ।
ମୟି ଵା ନିହତେ ରାମଂ ସଂୟୁଗାୟୋପୟାସ୍ୟସି ॥ 5 ॥
ଖରସ୍ତ୍ରିଶିରସା ତେନ ମୃତ୍ୟୁଲୋଭାତ୍ପ୍ରସାଦିତଃ ।
ଗଚ୍ଛ ୟୁଧ୍ୟେତ୍ୟନୁଜ୍ଞାତୋ ରାଘଵାଭିମୁଖୋ ୟୟୌ ॥ 6 ॥
ତ୍ରିଶିରାଶ୍ଚ ରଥେନୈଵ ଵାଜିୟୁକ୍ତେନ ଭାସ୍ଵତା ।
ଅଭ୍ୟଦ୍ରଵଦ୍ରଣେ ରାମଂ ତ୍ରିଶୃଂଗ ଇଵ ପର୍ଵତଃ ॥ 7 ॥
ଶରଧାରାସମୂହାନ୍ସ ମହାମେଘ ଇଵୋତ୍ସୃଜନ୍ ।
ଵ୍ୟସୃଜତ୍ସଦୃଶଂ ନାଦଂ ଜଲାର୍ଦ୍ରସ୍ୟ ତୁ ଦୁଂଦୁଭେଃ ॥ 8 ॥
ଆଗଚ୍ଛଂତଂ ତ୍ରିଶିରସଂ ରାକ୍ଷସଂ ପ୍ରେକ୍ଷ୍ୟ ରାଘଵଃ ।
ଧନୁଷା ପ୍ରତିଜଗ୍ରାହ ଵିଧୁନ୍ଵନ୍ସାୟକାନ୍ ଶିତାନ୍ ॥ 9 ॥
ସ ସଂପ୍ରହାରସ୍ତୁମୁଲୋ ରାମତ୍ରିଶିରସୋର୍ମହାନ୍ ।
ବଭୂଵାତୀଵ ବଲିନୋସ୍ସିଂହକୁଂଜରୟୋରିଵ ॥ 10 ॥
ତତସ୍ତ୍ରିଶିରସା ବାଣୈର୍ଲଲାଟେ ତାଡିତସ୍ତ୍ରିଭିଃ ।
ଅମର୍ଷୀ କୁପିତୋରାମସ୍ସଂରବ୍ଧମିଦମବ୍ରଵୀତ୍ ॥ 11 ॥
ଅହୋ ଵିକ୍ରମଶୂରସ୍ୟ ରାକ୍ଷସସ୍ୟେଦୃଶଂ ବଲମ୍ ।
ପୁଷ୍ପୈରିଵ ଶରୈର୍ୟସ୍ୟ ଲଲାଟେଽସ୍ମିନ୍ପରିକ୍ଷତଃ ॥ 12 ॥
ମମାପି ପ୍ରତିଗୃହ୍ଣୀଷ୍ଵ ଶରାଂଶ୍ଚାପଗୁଣାଚ୍ଚ୍ୟୁତାନ୍ ।
ଏଵମୁକ୍ତ୍ଵା ତୁ ସଂରବ୍ଧଶ୍ଶରାନାଶୀଵିଷୋପମାନ୍ ॥ 13 ॥
ତ୍ରିଶିରୋଵକ୍ଷସି କ୍ରୁଦ୍ଧୋ ନିଜଘାନ ଚତୁର୍ଦଶ ।
ଚତୁର୍ଭିସ୍ତୁରଗାନସ୍ୟ ଶରୈଃ ସନ୍ନତପର୍ଵଭିଃ ॥ 14 ॥
ନ୍ୟପାତୟତ ତେଜସ୍ଵୀ ଚତୁରସ୍ତସ୍ୟ ଵାଜିନଃ ।
ଅଷ୍ଟଭିସ୍ସାୟକୈସ୍ସୂତଂ ରଥୋପସ୍ଥାନ୍ନ୍ୟପାତୟତ୍ ॥ 15 ॥
ରାମଶ୍ଚିଚ୍ଛେଦ ବାଣେନ ଧ୍ଵଜଂ ଚାସ୍ୟ ସମୁଚ୍ଛ୍ରିତମ୍ ।
ତତୋ ହତରଥାତ୍ତସ୍ମାଦୁତ୍ପତଂତଂ ନିଶାଚରମ୍ ॥ 16 ॥
ବିଭେଦ ରାମସ୍ତଂ ବାଣୈର୍ହୃଦୟେ ସୋଽଭଵଜ୍ଜଡଃ ।
ସାୟକୈଶ୍ଚାପ୍ରମେୟାତ୍ମା ସାମର୍ଷସ୍ତସ୍ୟ ରକ୍ଷସଃ ॥ 17 ॥
ଶିରାଂସ୍ୟପାତୟଦ୍ରାମୋ ଵେଗଵଦ୍ଭିସ୍ତ୍ରିଭିଶ୍ଶିତୈଃ ।
ସ ଭୂମୌ ରୁଧିରୋଦ୍ଗାରୀ ରାମବାଣାଭିପୀଡିତଃ ॥ 18 ॥
ନ୍ୟପତତ୍ପତିତୈଃ ପୂର୍ଵଂ ସ୍ଵଶିରୋଭିର୍ନିଶାଚରଃ ।
ହତଶେଷାସ୍ତତୋ ଭଗ୍ନା ରାକ୍ଷସାଃ ଖରସଂଶ୍ରୟା ॥ 19 ॥
ଦ୍ରଵଂତି ସ୍ମ ନ ତିଷ୍ଠଂତି ଵ୍ୟାଘ୍ରତ୍ରସ୍ତା ମୃଗା ଇଵ ।
ତାନ୍ଖରୋ ଦ୍ରଵତୋ ଦୃଷ୍ଟ୍ଵା ନିଵର୍ତ୍ୟ ରୁଷିତସ୍ସ୍ଵୟମ୍ ॥ 20 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ସପ୍ତଵିଂଶସ୍ସର୍ଗଃ ॥
