ශ්රීමද්වාල්මීකීය රාමායණේ අරණ්යකාංඩම් ।
අථ ද්වාත්රිංශස්සර්ගඃ ।
තතශ්ශූර්පණඛා දෘෂ්ට්වා සහස්රාණි චතුර්දශ ।
හතාන්යේකේන රාමේණ රක්ෂසාං භීමකර්මණාම් ॥ 1 ॥
දූෂණං ච ඛරං චෛව හතං ත්රිශිරසා සහ ।
දෘෂ්ට්වා පුනර්මහානාදං නනාද ජලදෝ යථා ॥ 2 ॥
සා දෘෂ්ට්වා කර්ම රාමස්ය කෘතමන්යෛස්සුදුෂ්කරම් ।
ජගාම පරමෝද්විග්නා ලංකාං රාවණපාලිතාම් ॥ 3 ॥
සා දදර්ශ විමානාග්රේ රාවණං දීප්තතේජසම් ।
උපෝපවිෂ්ටං සචිවෛර්මරුද්භිරිව වාසවම් ॥ 4 ॥
ආසීනං සූර්යසංකාශේ කාංචනේ පරමාසනේ ।
රුක්මවේදිගතං ප්රාජ්යං ජ්වලංතමිව පාවකම් ॥ 5 ॥
දේවගංධර්වභූතානාමෘෂීණාං ච මහාත්මනාම් ।
අජේයං සමරේ ශූරං ව්යාත්තානනමිවාංතකම් ॥ 6 ॥
දේවාසුරවිමර්දේෂු වජ්රාශනිකෘතව්රණම් ।
ඓරාවතවිෂාණග්රෛරුද්ඝෘෂ්ටකිණවක්ෂසම් ॥ 7 ॥
විංශද්භුජං දශග්රීවං දර්ශනීයපරිච්ඡදම් ।
විශාලවක්ෂසං වීරං රාජලක්ෂණ ශෝභිතම් ॥ 8 ॥
ස්නිග්ධවෛඩූර්යසංකාශං තප්තකාංචනකුංඩලම් ।
සුභුජං ශුක්ලදශනං මහාස්යං පර්වතෝපමම් ॥ 9 ॥
විෂ්ණුචක්රනිපාතෛශ්ච ශතශෝ දේවසංයුගේ ।
අන්යෛශ්ශස්ත්රප්රහාරෛශ්ච මහායුද්ධේෂු තාඩිතම් ॥ 10 ॥
අහතාංගං සමස්තෛශ්ච දේවප්රහරණෛස්තථා ।
අක්ෂෝභ්යාණාං සමුද්රාණාං ක්ෂෝභණං ක්ෂිප්රකාරිණම් ॥ 11 ॥
ක්ෂේප්තාරං පර්වතේංද්රාණාං සුරාණාං ච ප්රමර්දනම් ।
උච්ඡේත්තාරං ච ධර්මාණාං පරදාරාභිමර්ශනම් ॥ 12 ॥
සර්වදිව්යාස්ත්රයෝක්තාරං යජ්ඤවිඝ්නකරං සදා ।
පුරීං භෝගවතීං ප්රාප්ය පරාජිත්ය ච වාසුකිම් ॥ 13 ॥
තක්ෂකස්ය ප්රියාං භාර්යාං පරාජිත්ය ජහාර යඃ ।
කෛලාසපර්වතං ගත්වා විජිත්ය නරවාහනම් ।
විමානං පුෂ්පකං තස්ය කාමගං වෛ ජහාර යඃ ॥ 14 ॥
වනං චෛත්රරථං දිව්යං නලිනීං නංදනං වනම් ।
විනාශයති යඃ ක්රෝධාද්දේවෝද්යානානි වීර්යවාන් ॥ 15 ॥
චංද්රසූර්යෞ මහාභාගාවුත්තිෂ්ඨංතෞ පරංතපෞ ।
නිවාරයති බාහුභ්යාං යශ්ශෛලශිඛරෝපමඃ ॥ 16 ॥
දශවර්ෂසහස්රාණි තපස්තප්වා මහාවනේ ।
පුරා ස්වයංභුවේ ධීරශ්ශිරාංස්යුපජහාර යඃ ॥ 17 ॥
දේවදානවගංධර්වපිශාචපතගෝරගෛඃ ।
අභයං යස්ය සංග්රාමේ මෘත්යුතෝ මානුෂාදෘතේ ॥ 18 ॥
මංත්රෛරභිෂ්ටුතං පුණ්යමධ්වරේෂු ද්විජාතිභිඃ ।
හවිර්ධානේෂු යස්සෝමමුපහංති මහාබලඃ ॥ 19 ॥
ආප්තයජ්ඤහරං ක්රූරං බ්රහ්මඝ්නං දුෂ්ටචාරිණම් ।
කර්කශං නිරනුක්රෝශං ප්රජානාමහිතේ රතම් ॥ 20 ॥
රාවණං සර්වභූතානාං සර්වලෝකභයාවහම් ।
රාක්ෂසී භ්රාතරං ශූරං සා දදර්ශ මහාබලම් ॥ 21 ॥
තං දිව්යවස්ත්රාභරණං දිව්යමාල්යෝපශෝභිතම් ।
ආසනේ සූපවිෂ්ටං ච කාලකාලමිවෝද්යතම් ॥ 22 ॥
රාක්ෂසේංද්රං මහාභාගං පෞලස්ත්යකුලනංදනම් ॥ 23 ॥
රාවණං ශත්රුහංතාරං මංත්රිභිඃ පරිවාරිතම් ।
අභිගම්යාබ්රවීද්වාක්යං රාක්ෂසී භයවිහ්වලා ॥ 24 ॥
තමබ්රවීද්දීප්තවිශාලලෝචනං ප්රදර්ශයිත්වා භයමෝහමූර්ඡිතා ।
සුදාරුණං වාක්යමභීතචාරිණී මහාත්මනා ශූර්පණඛා විරූපිතා ॥ 25 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ද්වාත්රිංශස්සර්ගඃ ॥
