શ્રીમદ્વાલ્મીકીય રામાયણે અરણ્યકાંડમ્ ।
અથ દ્વાત્રિંશસ્સર્ગઃ ।
તતશ્શૂર્પણખા દૃષ્ટ્વા સહસ્રાણિ ચતુર્દશ ।
હતાન્યેકેન રામેણ રક્ષસાં ભીમકર્મણામ્ ॥ 1 ॥
દૂષણં ચ ખરં ચૈવ હતં ત્રિશિરસા સહ ।
દૃષ્ટ્વા પુનર્મહાનાદં નનાદ જલદો યથા ॥ 2 ॥
સા દૃષ્ટ્વા કર્મ રામસ્ય કૃતમન્યૈસ્સુદુષ્કરમ્ ।
જગામ પરમોદ્વિગ્ના લંકાં રાવણપાલિતામ્ ॥ 3 ॥
સા દદર્શ વિમાનાગ્રે રાવણં દીપ્તતેજસમ્ ।
ઉપોપવિષ્ટં સચિવૈર્મરુદ્ભિરિવ વાસવમ્ ॥ 4 ॥
આસીનં સૂર્યસંકાશે કાંચને પરમાસને ।
રુક્મવેદિગતં પ્રાજ્યં જ્વલંતમિવ પાવકમ્ ॥ 5 ॥
દેવગંધર્વભૂતાનામૃષીણાં ચ મહાત્મનામ્ ।
અજેયં સમરે શૂરં વ્યાત્તાનનમિવાંતકમ્ ॥ 6 ॥
દેવાસુરવિમર્દેષુ વજ્રાશનિકૃતવ્રણમ્ ।
ઐરાવતવિષાણગ્રૈરુદ્ઘૃષ્ટકિણવક્ષસમ્ ॥ 7 ॥
વિંશદ્ભુજં દશગ્રીવં દર્શનીયપરિચ્છદમ્ ।
વિશાલવક્ષસં વીરં રાજલક્ષણ શોભિતમ્ ॥ 8 ॥
સ્નિગ્ધવૈડૂર્યસંકાશં તપ્તકાંચનકુંડલમ્ ।
સુભુજં શુક્લદશનં મહાસ્યં પર્વતોપમમ્ ॥ 9 ॥
વિષ્ણુચક્રનિપાતૈશ્ચ શતશો દેવસંયુગે ।
અન્યૈશ્શસ્ત્રપ્રહારૈશ્ચ મહાયુદ્ધેષુ તાડિતમ્ ॥ 10 ॥
અહતાંગં સમસ્તૈશ્ચ દેવપ્રહરણૈસ્તથા ।
અક્ષોભ્યાણાં સમુદ્રાણાં ક્ષોભણં ક્ષિપ્રકારિણમ્ ॥ 11 ॥
ક્ષેપ્તારં પર્વતેંદ્રાણાં સુરાણાં ચ પ્રમર્દનમ્ ।
ઉચ્છેત્તારં ચ ધર્માણાં પરદારાભિમર્શનમ્ ॥ 12 ॥
સર્વદિવ્યાસ્ત્રયોક્તારં યજ્ઞવિઘ્નકરં સદા ।
પુરીં ભોગવતીં પ્રાપ્ય પરાજિત્ય ચ વાસુકિમ્ ॥ 13 ॥
તક્ષકસ્ય પ્રિયાં ભાર્યાં પરાજિત્ય જહાર યઃ ।
કૈલાસપર્વતં ગત્વા વિજિત્ય નરવાહનમ્ ।
વિમાનં પુષ્પકં તસ્ય કામગં વૈ જહાર યઃ ॥ 14 ॥
વનં ચૈત્રરથં દિવ્યં નલિનીં નંદનં વનમ્ ।
વિનાશયતિ યઃ ક્રોધાદ્દેવોદ્યાનાનિ વીર્યવાન્ ॥ 15 ॥
ચંદ્રસૂર્યૌ મહાભાગાવુત્તિષ્ઠંતૌ પરંતપૌ ।
નિવારયતિ બાહુભ્યાં યશ્શૈલશિખરોપમઃ ॥ 16 ॥
દશવર્ષસહસ્રાણિ તપસ્તપ્વા મહાવને ।
પુરા સ્વયંભુવે ધીરશ્શિરાંસ્યુપજહાર યઃ ॥ 17 ॥
દેવદાનવગંધર્વપિશાચપતગોરગૈઃ ।
અભયં યસ્ય સંગ્રામે મૃત્યુતો માનુષાદૃતે ॥ 18 ॥
મંત્રૈરભિષ્ટુતં પુણ્યમધ્વરેષુ દ્વિજાતિભિઃ ।
હવિર્ધાનેષુ યસ્સોમમુપહંતિ મહાબલઃ ॥ 19 ॥
આપ્તયજ્ઞહરં ક્રૂરં બ્રહ્મઘ્નં દુષ્ટચારિણમ્ ।
કર્કશં નિરનુક્રોશં પ્રજાનામહિતે રતમ્ ॥ 20 ॥
રાવણં સર્વભૂતાનાં સર્વલોકભયાવહમ્ ।
રાક્ષસી ભ્રાતરં શૂરં સા દદર્શ મહાબલમ્ ॥ 21 ॥
તં દિવ્યવસ્ત્રાભરણં દિવ્યમાલ્યોપશોભિતમ્ ।
આસને સૂપવિષ્ટં ચ કાલકાલમિવોદ્યતમ્ ॥ 22 ॥
રાક્ષસેંદ્રં મહાભાગં પૌલસ્ત્યકુલનંદનમ્ ॥ 23 ॥
રાવણં શત્રુહંતારં મંત્રિભિઃ પરિવારિતમ્ ।
અભિગમ્યાબ્રવીદ્વાક્યં રાક્ષસી ભયવિહ્વલા ॥ 24 ॥
તમબ્રવીદ્દીપ્તવિશાલલોચનં પ્રદર્શયિત્વા ભયમોહમૂર્છિતા ।
સુદારુણં વાક્યમભીતચારિણી મહાત્મના શૂર્પણખા વિરૂપિતા ॥ 25 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે દ્વાત્રિંશસ્સર્ગઃ ॥
