ശ്രീമദ്വാല്മീകീയ രാമായണേ അരണ്യകാംഡമ് ।
അഥ ദ്വാത്രിംശസ്സര്ഗഃ ।
തതശ്ശൂര്പണഖാ ദൃഷ്ട്വാ സഹസ്രാണി ചതുര്ദശ ।
ഹതാന്യേകേന രാമേണ രക്ഷസാം ഭീമകര്മണാമ് ॥ 1 ॥
ദൂഷണം ച ഖരം ചൈവ ഹതം ത്രിശിരസാ സഹ ।
ദൃഷ്ട്വാ പുനര്മഹാനാദം നനാദ ജലദോ യഥാ ॥ 2 ॥
സാ ദൃഷ്ട്വാ കര്മ രാമസ്യ കൃതമന്യൈസ്സുദുഷ്കരമ് ।
ജഗാമ പരമോദ്വിഗ്നാ ലംകാം രാവണപാലിതാമ് ॥ 3 ॥
സാ ദദര്ശ വിമാനാഗ്രേ രാവണം ദീപ്തതേജസമ് ।
ഉപോപവിഷ്ടം സചിവൈര്മരുദ്ഭിരിവ വാസവമ് ॥ 4 ॥
ആസീനം സൂര്യസംകാശേ കാംചനേ പരമാസനേ ।
രുക്മവേദിഗതം പ്രാജ്യം ജ്വലംതമിവ പാവകമ് ॥ 5 ॥
ദേവഗംധർവഭൂതാനാമൃഷീണാം ച മഹാത്മനാമ് ।
അജേയം സമരേ ശൂരം വ്യാത്താനനമിവാംതകമ് ॥ 6 ॥
ദേവാസുരവിമര്ദേഷു വജ്രാശനികൃതവ്രണമ് ।
ഐരാവതവിഷാണഗ്രൈരുദ്ഘൃഷ്ടകിണവക്ഷസമ് ॥ 7 ॥
വിംശദ്ഭുജം ദശഗ്രീവം ദര്ശനീയപരിച്ഛദമ് ।
വിശാലവക്ഷസം വീരം രാജലക്ഷണ ശോഭിതമ് ॥ 8 ॥
സ്നിഗ്ധവൈഡൂര്യസംകാശം തപ്തകാംചനകുംഡലമ് ।
സുഭുജം ശുക്ലദശനം മഹാസ്യം പർവതോപമമ് ॥ 9 ॥
വിഷ്ണുചക്രനിപാതൈശ്ച ശതശോ ദേവസംയുഗേ ।
അന്യൈശ്ശസ്ത്രപ്രഹാരൈശ്ച മഹായുദ്ധേഷു താഡിതമ് ॥ 10 ॥
അഹതാംഗം സമസ്തൈശ്ച ദേവപ്രഹരണൈസ്തഥാ ।
അക്ഷോഭ്യാണാം സമുദ്രാണാം ക്ഷോഭണം ക്ഷിപ്രകാരിണമ് ॥ 11 ॥
ക്ഷേപ്താരം പർവതേംദ്രാണാം സുരാണാം ച പ്രമര്ദനമ് ।
ഉച്ഛേത്താരം ച ധര്മാണാം പരദാരാഭിമര്ശനമ് ॥ 12 ॥
സർവദിവ്യാസ്ത്രയോക്താരം യജ്ഞവിഘ്നകരം സദാ ।
പുരീം ഭോഗവതീം പ്രാപ്യ പരാജിത്യ ച വാസുകിമ് ॥ 13 ॥
തക്ഷകസ്യ പ്രിയാം ഭാര്യാം പരാജിത്യ ജഹാര യഃ ।
കൈലാസപർവതം ഗത്വാ വിജിത്യ നരവാഹനമ് ।
വിമാനം പുഷ്പകം തസ്യ കാമഗം വൈ ജഹാര യഃ ॥ 14 ॥
വനം ചൈത്രരഥം ദിവ്യം നലിനീം നംദനം വനമ് ।
വിനാശയതി യഃ ക്രോധാദ്ദേവോദ്യാനാനി വീര്യവാന് ॥ 15 ॥
ചംദ്രസൂര്യൌ മഹാഭാഗാവുത്തിഷ്ഠംതൌ പരംതപൌ ।
നിവാരയതി ബാഹുഭ്യാം യശ്ശൈലശിഖരോപമഃ ॥ 16 ॥
ദശവര്ഷസഹസ്രാണി തപസ്തപ്വാ മഹാവനേ ।
പുരാ സ്വയംഭുവേ ധീരശ്ശിരാംസ്യുപജഹാര യഃ ॥ 17 ॥
ദേവദാനവഗംധർവപിശാചപതഗോരഗൈഃ ।
അഭയം യസ്യ സംഗ്രാമേ മൃത്യുതോ മാനുഷാദൃതേ ॥ 18 ॥
മംത്രൈരഭിഷ്ടുതം പുണ്യമധ്വരേഷു ദ്വിജാതിഭിഃ ।
ഹവിര്ധാനേഷു യസ്സോമമുപഹംതി മഹാബലഃ ॥ 19 ॥
ആപ്തയജ്ഞഹരം ക്രൂരം ബ്രഹ്മഘ്നം ദുഷ്ടചാരിണമ് ।
കര്കശം നിരനുക്രോശം പ്രജാനാമഹിതേ രതമ് ॥ 20 ॥
രാവണം സർവഭൂതാനാം സർവലോകഭയാവഹമ് ।
രാക്ഷസീ ഭ്രാതരം ശൂരം സാ ദദര്ശ മഹാബലമ് ॥ 21 ॥
തം ദിവ്യവസ്ത്രാഭരണം ദിവ്യമാല്യോപശോഭിതമ് ।
ആസനേ സൂപവിഷ്ടം ച കാലകാലമിവോദ്യതമ് ॥ 22 ॥
രാക്ഷസേംദ്രം മഹാഭാഗം പൌലസ്ത്യകുലനംദനമ് ॥ 23 ॥
രാവണം ശത്രുഹംതാരം മംത്രിഭിഃ പരിവാരിതമ് ।
അഭിഗമ്യാബ്രവീദ്വാക്യം രാക്ഷസീ ഭയവിഹ്വലാ ॥ 24 ॥
തമബ്രവീദ്ദീപ്തവിശാലലോചനം പ്രദര്ശയിത്വാ ഭയമോഹമൂര്ഛിതാ ।
സുദാരുണം വാക്യമഭീതചാരിണീ മഹാത്മനാ ശൂര്പണഖാ വിരൂപിതാ ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ദ്വാത്രിംശസ്സര്ഗഃ ॥
