śrīmadvālmīkīya rāmāyaṇē araṇyakāṇḍam ।
atha dvātriṃśassargaḥ ।
tataśśūrpaṇakhā dṛṣṭvā sahasrāṇi chaturdaśa ।
hatānyēkēna rāmēṇa rakṣasāṃ bhīmakarmaṇām ॥ 1 ॥
dūṣaṇaṃ cha kharaṃ chaiva hataṃ triśirasā saha ।
dṛṣṭvā punarmahānādaṃ nanāda jaladō yathā ॥ 2 ॥
sā dṛṣṭvā karma rāmasya kṛtamanyaissuduṣkaram ।
jagāma paramōdvignā laṅkāṃ rāvaṇapālitām ॥ 3 ॥
sā dadarśa vimānāgrē rāvaṇaṃ dīptatējasam ।
upōpaviṣṭaṃ sachivairmarudbhiriva vāsavam ॥ 4 ॥
āsīnaṃ sūryasaṅkāśē kāñchanē paramāsanē ।
rukmavēdigataṃ prājyaṃ jvalantamiva pāvakam ॥ 5 ॥
dēvagandharvabhūtānāmṛṣīṇāṃ cha mahātmanām ।
ajēyaṃ samarē śūraṃ vyāttānanamivāntakam ॥ 6 ॥
dēvāsuravimardēṣu vajrāśanikṛtavraṇam ।
airāvataviṣāṇagrairudghṛṣṭakiṇavakṣasam ॥ 7 ॥
viṃśadbhujaṃ daśagrīvaṃ darśanīyaparichChadam ।
viśālavakṣasaṃ vīraṃ rājalakṣaṇa śōbhitam ॥ 8 ॥
snigdhavaiḍūryasaṅkāśaṃ taptakāñchanakuṇḍalam ।
subhujaṃ śukladaśanaṃ mahāsyaṃ parvatōpamam ॥ 9 ॥
viṣṇuchakranipātaiścha śataśō dēvasaṃyugē ।
anyaiśśastraprahāraiścha mahāyuddhēṣu tāḍitam ॥ 10 ॥
ahatāṅgaṃ samastaiścha dēvapraharaṇaistathā ।
akṣōbhyāṇāṃ samudrāṇāṃ kṣōbhaṇaṃ kṣiprakāriṇam ॥ 11 ॥
kṣēptāraṃ parvatēndrāṇāṃ surāṇāṃ cha pramardanam ।
uchChēttāraṃ cha dharmāṇāṃ paradārābhimarśanam ॥ 12 ॥
sarvadivyāstrayōktāraṃ yajñavighnakaraṃ sadā ।
purīṃ bhōgavatīṃ prāpya parājitya cha vāsukim ॥ 13 ॥
takṣakasya priyāṃ bhāryāṃ parājitya jahāra yaḥ ।
kailāsaparvataṃ gatvā vijitya naravāhanam ।
vimānaṃ puṣpakaṃ tasya kāmagaṃ vai jahāra yaḥ ॥ 14 ॥
vanaṃ chaitrarathaṃ divyaṃ nalinīṃ nandanaṃ vanam ।
vināśayati yaḥ krōdhāddēvōdyānāni vīryavān ॥ 15 ॥
chandrasūryau mahābhāgāvuttiṣṭhantau parantapau ।
nivārayati bāhubhyāṃ yaśśailaśikharōpamaḥ ॥ 16 ॥
daśavarṣasahasrāṇi tapastapvā mahāvanē ।
purā svayambhuvē dhīraśśirāṃsyupajahāra yaḥ ॥ 17 ॥
dēvadānavagandharvapiśāchapatagōragaiḥ ।
abhayaṃ yasya saṅgrāmē mṛtyutō mānuṣādṛtē ॥ 18 ॥
mantrairabhiṣṭutaṃ puṇyamadhvarēṣu dvijātibhiḥ ।
havirdhānēṣu yassōmamupahanti mahābalaḥ ॥ 19 ॥
āptayajñaharaṃ krūraṃ brahmaghnaṃ duṣṭachāriṇam ।
karkaśaṃ niranukrōśaṃ prajānāmahitē ratam ॥ 20 ॥
rāvaṇaṃ sarvabhūtānāṃ sarvalōkabhayāvaham ।
rākṣasī bhrātaraṃ śūraṃ sā dadarśa mahābalam ॥ 21 ॥
taṃ divyavastrābharaṇaṃ divyamālyōpaśōbhitam ।
āsanē sūpaviṣṭaṃ cha kālakālamivōdyatam ॥ 22 ॥
rākṣasēndraṃ mahābhāgaṃ paulastyakulanandanam ॥ 23 ॥
rāvaṇaṃ śatruhantāraṃ mantribhiḥ parivāritam ।
abhigamyābravīdvākyaṃ rākṣasī bhayavihvalā ॥ 24 ॥
tamabravīddīptaviśālalōchanaṃ pradarśayitvā bhayamōhamūrChitā ।
sudāruṇaṃ vākyamabhītachāriṇī mahātmanā śūrpaṇakhā virūpitā ॥ 25 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē dvātriṃśassargaḥ ॥
