ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଦ୍ଵାତ୍ରିଂଶସ୍ସର୍ଗଃ ।
ତତଶ୍ଶୂର୍ପଣଖା ଦୃଷ୍ଟ୍ଵା ସହସ୍ରାଣି ଚତୁର୍ଦଶ ।
ହତାନ୍ୟେକେନ ରାମେଣ ରକ୍ଷସାଂ ଭୀମକର୍ମଣାମ୍ ॥ 1 ॥
ଦୂଷଣଂ ଚ ଖରଂ ଚୈଵ ହତଂ ତ୍ରିଶିରସା ସହ ।
ଦୃଷ୍ଟ୍ଵା ପୁନର୍ମହାନାଦଂ ନନାଦ ଜଲଦୋ ୟଥା ॥ 2 ॥
ସା ଦୃଷ୍ଟ୍ଵା କର୍ମ ରାମସ୍ୟ କୃତମନ୍ୟୈସ୍ସୁଦୁଷ୍କରମ୍ ।
ଜଗାମ ପରମୋଦ୍ଵିଗ୍ନା ଲଂକାଂ ରାଵଣପାଲିତାମ୍ ॥ 3 ॥
ସା ଦଦର୍ଶ ଵିମାନାଗ୍ରେ ରାଵଣଂ ଦୀପ୍ତତେଜସମ୍ ।
ଉପୋପଵିଷ୍ଟଂ ସଚିଵୈର୍ମରୁଦ୍ଭିରିଵ ଵାସଵମ୍ ॥ 4 ॥
ଆସୀନଂ ସୂର୍ୟସଂକାଶେ କାଂଚନେ ପରମାସନେ ।
ରୁକ୍ମଵେଦିଗତଂ ପ୍ରାଜ୍ୟଂ ଜ୍ଵଲଂତମିଵ ପାଵକମ୍ ॥ 5 ॥
ଦେଵଗଂଧର୍ଵଭୂତାନାମୃଷୀଣାଂ ଚ ମହାତ୍ମନାମ୍ ।
ଅଜେୟଂ ସମରେ ଶୂରଂ ଵ୍ୟାତ୍ତାନନମିଵାଂତକମ୍ ॥ 6 ॥
ଦେଵାସୁରଵିମର୍ଦେଷୁ ଵଜ୍ରାଶନିକୃତଵ୍ରଣମ୍ ।
ଐରାଵତଵିଷାଣଗ୍ରୈରୁଦ୍ଘୃଷ୍ଟକିଣଵକ୍ଷସମ୍ ॥ 7 ॥
ଵିଂଶଦ୍ଭୁଜଂ ଦଶଗ୍ରୀଵଂ ଦର୍ଶନୀୟପରିଚ୍ଛଦମ୍ ।
ଵିଶାଲଵକ୍ଷସଂ ଵୀରଂ ରାଜଲକ୍ଷଣ ଶୋଭିତମ୍ ॥ 8 ॥
ସ୍ନିଗ୍ଧଵୈଡୂର୍ୟସଂକାଶଂ ତପ୍ତକାଂଚନକୁଂଡଲମ୍ ।
ସୁଭୁଜଂ ଶୁକ୍ଲଦଶନଂ ମହାସ୍ୟଂ ପର୍ଵତୋପମମ୍ ॥ 9 ॥
ଵିଷ୍ଣୁଚକ୍ରନିପାତୈଶ୍ଚ ଶତଶୋ ଦେଵସଂୟୁଗେ ।
ଅନ୍ୟୈଶ୍ଶସ୍ତ୍ରପ୍ରହାରୈଶ୍ଚ ମହାୟୁଦ୍ଧେଷୁ ତାଡିତମ୍ ॥ 10 ॥
ଅହତାଂଗଂ ସମସ୍ତୈଶ୍ଚ ଦେଵପ୍ରହରଣୈସ୍ତଥା ।
ଅକ୍ଷୋଭ୍ୟାଣାଂ ସମୁଦ୍ରାଣାଂ କ୍ଷୋଭଣଂ କ୍ଷିପ୍ରକାରିଣମ୍ ॥ 11 ॥
କ୍ଷେପ୍ତାରଂ ପର୍ଵତେଂଦ୍ରାଣାଂ ସୁରାଣାଂ ଚ ପ୍ରମର୍ଦନମ୍ ।
ଉଚ୍ଛେତ୍ତାରଂ ଚ ଧର୍ମାଣାଂ ପରଦାରାଭିମର୍ଶନମ୍ ॥ 12 ॥
ସର୍ଵଦିଵ୍ୟାସ୍ତ୍ରୟୋକ୍ତାରଂ ୟଜ୍ଞଵିଘ୍ନକରଂ ସଦା ।
ପୁରୀଂ ଭୋଗଵତୀଂ ପ୍ରାପ୍ୟ ପରାଜିତ୍ୟ ଚ ଵାସୁକିମ୍ ॥ 13 ॥
ତକ୍ଷକସ୍ୟ ପ୍ରିୟାଂ ଭାର୍ୟାଂ ପରାଜିତ୍ୟ ଜହାର ୟଃ ।
କୈଲାସପର୍ଵତଂ ଗତ୍ଵା ଵିଜିତ୍ୟ ନରଵାହନମ୍ ।
ଵିମାନଂ ପୁଷ୍ପକଂ ତସ୍ୟ କାମଗଂ ଵୈ ଜହାର ୟଃ ॥ 14 ॥
ଵନଂ ଚୈତ୍ରରଥଂ ଦିଵ୍ୟଂ ନଲିନୀଂ ନଂଦନଂ ଵନମ୍ ।
ଵିନାଶୟତି ୟଃ କ୍ରୋଧାଦ୍ଦେଵୋଦ୍ୟାନାନି ଵୀର୍ୟଵାନ୍ ॥ 15 ॥
ଚଂଦ୍ରସୂର୍ୟୌ ମହାଭାଗାଵୁତ୍ତିଷ୍ଠଂତୌ ପରଂତପୌ ।
ନିଵାରୟତି ବାହୁଭ୍ୟାଂ ୟଶ୍ଶୈଲଶିଖରୋପମଃ ॥ 16 ॥
ଦଶଵର୍ଷସହସ୍ରାଣି ତପସ୍ତପ୍ଵା ମହାଵନେ ।
ପୁରା ସ୍ଵୟଂଭୁଵେ ଧୀରଶ୍ଶିରାଂସ୍ୟୁପଜହାର ୟଃ ॥ 17 ॥
ଦେଵଦାନଵଗଂଧର୍ଵପିଶାଚପତଗୋରଗୈଃ ।
ଅଭୟଂ ୟସ୍ୟ ସଂଗ୍ରାମେ ମୃତ୍ୟୁତୋ ମାନୁଷାଦୃତେ ॥ 18 ॥
ମଂତ୍ରୈରଭିଷ୍ଟୁତଂ ପୁଣ୍ୟମଧ୍ଵରେଷୁ ଦ୍ଵିଜାତିଭିଃ ।
ହଵିର୍ଧାନେଷୁ ୟସ୍ସୋମମୁପହଂତି ମହାବଲଃ ॥ 19 ॥
ଆପ୍ତୟଜ୍ଞହରଂ କ୍ରୂରଂ ବ୍ରହ୍ମଘ୍ନଂ ଦୁଷ୍ଟଚାରିଣମ୍ ।
କର୍କଶଂ ନିରନୁକ୍ରୋଶଂ ପ୍ରଜାନାମହିତେ ରତମ୍ ॥ 20 ॥
ରାଵଣଂ ସର୍ଵଭୂତାନାଂ ସର୍ଵଲୋକଭୟାଵହମ୍ ।
ରାକ୍ଷସୀ ଭ୍ରାତରଂ ଶୂରଂ ସା ଦଦର୍ଶ ମହାବଲମ୍ ॥ 21 ॥
ତଂ ଦିଵ୍ୟଵସ୍ତ୍ରାଭରଣଂ ଦିଵ୍ୟମାଲ୍ୟୋପଶୋଭିତମ୍ ।
ଆସନେ ସୂପଵିଷ୍ଟଂ ଚ କାଲକାଲମିଵୋଦ୍ୟତମ୍ ॥ 22 ॥
ରାକ୍ଷସେଂଦ୍ରଂ ମହାଭାଗଂ ପୌଲସ୍ତ୍ୟକୁଲନଂଦନମ୍ ॥ 23 ॥
ରାଵଣଂ ଶତ୍ରୁହଂତାରଂ ମଂତ୍ରିଭିଃ ପରିଵାରିତମ୍ ।
ଅଭିଗମ୍ୟାବ୍ରଵୀଦ୍ଵାକ୍ୟଂ ରାକ୍ଷସୀ ଭୟଵିହ୍ଵଲା ॥ 24 ॥
ତମବ୍ରଵୀଦ୍ଦୀପ୍ତଵିଶାଲଲୋଚନଂ ପ୍ରଦର୍ଶୟିତ୍ଵା ଭୟମୋହମୂର୍ଛିତା ।
ସୁଦାରୁଣଂ ଵାକ୍ୟମଭୀତଚାରିଣୀ ମହାତ୍ମନା ଶୂର୍ପଣଖା ଵିରୂପିତା ॥ 25 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଦ୍ଵାତ୍ରିଂଶସ୍ସର୍ଗଃ ॥
