ശ്രീമദ്വാല്മീകീയ രാമായണേ അരണ്യകാംഡമ് ।
അഥ അഷ്ടമസ്സര്ഗഃ ।
രാമസ്തു സഹസൌമിത്രിസ്സുതീക്ഷ്ണേനാഭിപൂജിതഃ ।
പരിണാമ്യ നിശാം തത്ര പ്രഭാതേ പ്രത്യബുധ്യത ॥ 1 ॥
ഉത്ഥായ തു യഥാകാലം രാഘവസ്സഹസീതയാ ।
ഉപസ്പൃശ്യസുശിതേന ജലേനോത്പലഗംധിനാ ॥ 2 ॥
അഥ തേഽഗ്നിം സുരാംശ്ചൈവ വൈദേഹീ രാമലക്ഷ്മണൌ ।
കാല്യം വിധിവദഭ്യര്ച്യ തപസ്വിശരണേ വനേ ॥ 3 ॥
ഉദയംതം ദിനകരം ദൃഷ്ട്വാ വിഗതകല്മഷാഃ ।
സുതീക്ഷ്ണഭിഗമ്യേദം ശ്ലക്ഷ്ണം വചനമബ്രുവന് ॥ 4 ॥
സുഖോഷിതാസ്സ്മഭഗവംസ്ത്വയാ പൂജ്യേന പൂജിതാഃ ।
ആപൃച്ഛാമഃ പ്രയാസ്യാമോ മുനയസ്ത്വരയംതി നഃ ॥ 5 ॥
ത്വരാമഹേ വയം ദ്രഷ്ടും കൃത്സ്നമാശ്രമമംഡലമ് ।
ഋഷീണാം പുണ്യശീലാനാം ദംഡകാരണ്യവാസിനാമ് ॥ 6 ॥
അഭ്യനുജ്ഞാതുമിച്ഛാമസ്സഹൈഭിര്മുനിപുംഗവൈഃ ।
ധര്മനിത്യൈസ്തപോദാംതൈർവിശിഖൈരിവ പാവകൈഃ ॥ 7 ॥
അവിഷഹ്യാതപോ യാവത്സൂര്യോ നാതിവിരാജതേ ।
അമാര്ഗേണാഗതാം ലക്ഷ്മീം പ്രാപ്യേവാന്വയവര്ജിതഃ ॥ 8 ॥
താവദിച്ഛാമഹേ ഗംതുമിത്യുക്ത്വാ ചരണൌ മുനേഃ ।
വവംദേ സഹസൌമിത്രിസ്സീതയാ സഹ രാഘവഃ ॥ 9 ॥
തൌ സംസ്പൃശംതൌ ചരണാവുത്ഥാപ്യ മുനിപുംഗവഃ ।
ഗാഢമാലിംഗ്യ സസ്നേഹമിദം വചനമബ്രവീത് ॥ 10 ॥
അരിഷ്ടം ഗച്ഛ പംഥാനം രാമ സൌമിത്രിണാ സഹ ।
സീതയാ ചാനയാ സാര്ധം ഛായയേവാനുവൃത്തയാ ॥ 11 ॥
പശ്യാശ്രമപദം രമ്യം ദംഡകാരണ്യവാസിനാമ് ।
ഏഷാം തപസ്വിനാം വീര തപസാ ഭാവിതാത്മനാമ് ॥ 12 ॥
സപ്രാജ്യഫലമൂലാനി പുഷ്പിതാനി വനാനി ച ।
പ്രശസ്തമൃഗയൂഥാനി ശാംതപക്ഷിഗണാനി ച ॥ 13 ॥
ഫുല്ലപംകജഷംഡാനി പ്രസന്നസലിലാനി ച ।
കാരംഡവവികീര്ണാനി തടാകാനി സരാംസി ച ॥ 14 ॥
ദ്രക്ഷ്യസേ ദൃഷ്ടിരമ്യാണി ഗിരിപ്രസ്രവണാനി ച ।
രമണീയാന്യരണ്യാനി മയൂരാഭിരുതാനി ച ॥ 15 ॥
ഗമ്യതാം വത്സ സൌമിത്രേ ഭവാനപി ച ഗച്ഛതു ।
ആഗംതവ്യം ച തേ ദൃഷ്ട്വാ പുനരേവാശ്രമം മമ ॥ 16 ॥
ഏവമുക്തസ്തഥേത്യുക്ത്വാ കാകുത്സ്ഥസ്സഹലക്ഷ്മണഃ ।
പ്രദക്ഷിണം മുനിം കൃത്വാ പ്രസ്ഥാതുമുപചക്രമേ ॥ 17 ॥
തതശ്ശുഭതരേ തൂണീ ധനുഷീ ചായതേക്ഷണാ ।
ദദൌ സീതാ തയോര്ഭ്രാത്രോഃ ഖംഗൌ ച വിമലൌ തതഃ ॥ 18 ॥
ആബധ്യ ച ശുഭേ തൂണീ ചാപേ ചാദായ സുസ്വനൌ ।
നിഷ്ക്രാംതാവാശ്രമാദ്ഗംതുമുഭൌ തൌ രാമലക്ഷ്മണൌ ॥ 19 ॥
ശ്രീമംതൌ രൂപസംപന്നൌ ദീപ്യമാനൌ സ്വതേജസാ ।
പ്രസ്ഥിതൌ ധൃതചാപൌ തൌ സീതയാ സഹ രാഘവൌ ॥ 20 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ അഷ്ടമസ്സര്ഗഃ ॥
