શ્રીમદ્વાલ્મીકીય રામાયણે અરણ્યકાંડમ્ ।
અથ અષ્ટમસ્સર્ગઃ ।
રામસ્તુ સહસૌમિત્રિસ્સુતીક્ષ્ણેનાભિપૂજિતઃ ।
પરિણામ્ય નિશાં તત્ર પ્રભાતે પ્રત્યબુધ્યત ॥ 1 ॥
ઉત્થાય તુ યથાકાલં રાઘવસ્સહસીતયા ।
ઉપસ્પૃશ્યસુશિતેન જલેનોત્પલગંધિના ॥ 2 ॥
અથ તેઽગ્નિં સુરાંશ્ચૈવ વૈદેહી રામલક્ષ્મણૌ ।
કાલ્યં વિધિવદભ્યર્ચ્ય તપસ્વિશરણે વને ॥ 3 ॥
ઉદયંતં દિનકરં દૃષ્ટ્વા વિગતકલ્મષાઃ ।
સુતીક્ષ્ણભિગમ્યેદં શ્લક્ષ્ણં વચનમબ્રુવન્ ॥ 4 ॥
સુખોષિતાસ્સ્મભગવંસ્ત્વયા પૂજ્યેન પૂજિતાઃ ।
આપૃચ્છામઃ પ્રયાસ્યામો મુનયસ્ત્વરયંતિ નઃ ॥ 5 ॥
ત્વરામહે વયં દ્રષ્ટું કૃત્સ્નમાશ્રમમંડલમ્ ।
ઋષીણાં પુણ્યશીલાનાં દંડકારણ્યવાસિનામ્ ॥ 6 ॥
અભ્યનુજ્ઞાતુમિચ્છામસ્સહૈભિર્મુનિપુંગવૈઃ ।
ધર્મનિત્યૈસ્તપોદાંતૈર્વિશિખૈરિવ પાવકૈઃ ॥ 7 ॥
અવિષહ્યાતપો યાવત્સૂર્યો નાતિવિરાજતે ।
અમાર્ગેણાગતાં લક્ષ્મીં પ્રાપ્યેવાન્વયવર્જિતઃ ॥ 8 ॥
તાવદિચ્છામહે ગંતુમિત્યુક્ત્વા ચરણૌ મુનેઃ ।
વવંદે સહસૌમિત્રિસ્સીતયા સહ રાઘવઃ ॥ 9 ॥
તૌ સંસ્પૃશંતૌ ચરણાવુત્થાપ્ય મુનિપુંગવઃ ।
ગાઢમાલિંગ્ય સસ્નેહમિદં વચનમબ્રવીત્ ॥ 10 ॥
અરિષ્ટં ગચ્છ પંથાનં રામ સૌમિત્રિણા સહ ।
સીતયા ચાનયા સાર્ધં છાયયેવાનુવૃત્તયા ॥ 11 ॥
પશ્યાશ્રમપદં રમ્યં દંડકારણ્યવાસિનામ્ ।
એષાં તપસ્વિનાં વીર તપસા ભાવિતાત્મનામ્ ॥ 12 ॥
સપ્રાજ્યફલમૂલાનિ પુષ્પિતાનિ વનાનિ ચ ।
પ્રશસ્તમૃગયૂથાનિ શાંતપક્ષિગણાનિ ચ ॥ 13 ॥
ફુલ્લપંકજષંડાનિ પ્રસન્નસલિલાનિ ચ ।
કારંડવવિકીર્ણાનિ તટાકાનિ સરાંસિ ચ ॥ 14 ॥
દ્રક્ષ્યસે દૃષ્ટિરમ્યાણિ ગિરિપ્રસ્રવણાનિ ચ ।
રમણીયાન્યરણ્યાનિ મયૂરાભિરુતાનિ ચ ॥ 15 ॥
ગમ્યતાં વત્સ સૌમિત્રે ભવાનપિ ચ ગચ્છતુ ।
આગંતવ્યં ચ તે દૃષ્ટ્વા પુનરેવાશ્રમં મમ ॥ 16 ॥
એવમુક્તસ્તથેત્યુક્ત્વા કાકુત્સ્થસ્સહલક્ષ્મણઃ ।
પ્રદક્ષિણં મુનિં કૃત્વા પ્રસ્થાતુમુપચક્રમે ॥ 17 ॥
તતશ્શુભતરે તૂણી ધનુષી ચાયતેક્ષણા ।
દદૌ સીતા તયોર્ભ્રાત્રોઃ ખંગૌ ચ વિમલૌ તતઃ ॥ 18 ॥
આબધ્ય ચ શુભે તૂણી ચાપે ચાદાય સુસ્વનૌ ।
નિષ્ક્રાંતાવાશ્રમાદ્ગંતુમુભૌ તૌ રામલક્ષ્મણૌ ॥ 19 ॥
શ્રીમંતૌ રૂપસંપન્નૌ દીપ્યમાનૌ સ્વતેજસા ।
પ્રસ્થિતૌ ધૃતચાપૌ તૌ સીતયા સહ રાઘવૌ ॥ 20 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે અષ્ટમસ્સર્ગઃ ॥
