ஶ்ரீமத்³வால்மீகீய ராமாயணே அரண்யகாண்ட³ம் ।
அத² அஷ்டமஸ்ஸர்க:³ ।
ராமஸ்து ஸஹஸௌமித்ரிஸ்ஸுதீக்ஷ்ணேனாபி⁴பூஜித: ।
பரிணாம்ய நிஶாம் தத்ர ப்ரபா⁴தே ப்ரத்யபு³த்⁴யத ॥ 1 ॥
உத்தா²ய து யதா²காலம் ராக⁴வஸ்ஸஹஸீதயா ।
உபஸ்ப்ருஶ்யஸுஶிதேன ஜலேனோத்பலக³ந்தி⁴னா ॥ 2 ॥
அத² தேக்³னிம் ஸுராம்ஶ்சைவ வைதே³ஹீ ராமலக்ஷ்மணௌ ।
கால்யம் விதி⁴வத³ப்⁴யர்ச்ய தபஸ்விஶரணே வனே ॥ 3 ॥
உத³யந்தம் தி³னகரம் த்³ருஷ்ட்வா விக³தகல்மஷா: ।
ஸுதீக்ஷ்ணபி⁴க³ம்யேத³ம் ஶ்லக்ஷ்ணம் வசனமப்³ருவன் ॥ 4 ॥
ஸுகோ²ஷிதாஸ்ஸ்மப⁴க³வம்ஸ்த்வயா பூஜ்யேன பூஜிதா: ।
ஆப்ருச்சா²ம: ப்ரயாஸ்யாமோ முனயஸ்த்வரயந்தி ந: ॥ 5 ॥
த்வராமஹே வயம் த்³ரஷ்டும் க்ருத்ஸ்னமாஶ்ரமமண்ட³லம் ।
ருஷீணாம் புண்யஶீலானாம் த³ண்ட³காரண்யவாஸினாம் ॥ 6 ॥
அப்⁴யனுஜ்ஞாதுமிச்சா²மஸ்ஸஹைபி⁴ர்முனிபுங்க³வை: ।
த⁴ர்மனித்யைஸ்தபோதா³ந்தைர்விஶிகை²ரிவ பாவகை: ॥ 7 ॥
அவிஷஹ்யாதபோ யாவத்ஸூர்யோ நாதிவிராஜதே ।
அமார்கே³ணாக³தாம் லக்ஷ்மீம் ப்ராப்யேவான்வயவர்ஜித: ॥ 8 ॥
தாவதி³ச்சா²மஹே க³ந்துமித்யுக்த்வா சரணௌ முனே: ।
வவந்தே³ ஸஹஸௌமித்ரிஸ்ஸீதயா ஸஹ ராக⁴வ: ॥ 9 ॥
தௌ ஸம்ஸ்ப்ருஶந்தௌ சரணாவுத்தா²ப்ய முனிபுங்க³வ: ।
கா³ட⁴மாலிங்க்³ய ஸஸ்னேஹமித³ம் வசனமப்³ரவீத் ॥ 1௦ ॥
அரிஷ்டம் க³ச்ச² பந்தா²னம் ராம ஸௌமித்ரிணா ஸஹ ।
ஸீதயா சானயா ஸார்த⁴ம் சா²யயேவானுவ்ருத்தயா ॥ 11 ॥
பஶ்யாஶ்ரமபத³ம் ரம்யம் த³ண்ட³காரண்யவாஸினாம் ।
ஏஷாம் தபஸ்வினாம் வீர தபஸா பா⁴விதாத்மனாம் ॥ 12 ॥
ஸப்ராஜ்யப²லமூலானி புஷ்பிதானி வனானி ச ।
ப்ரஶஸ்தம்ருக³யூதா²னி ஶாந்தபக்ஷிக³ணானி ச ॥ 13 ॥
பு²ல்லபங்கஜஷண்டா³னி ப்ரஸன்னஸலிலானி ச ।
காரண்ட³வவிகீர்ணானி தடாகானி ஸராம்ஸி ச ॥ 14 ॥
த்³ரக்ஷ்யஸே த்³ருஷ்டிரம்யாணி கி³ரிப்ரஸ்ரவணானி ச ।
ரமணீயான்யரண்யானி மயூராபி⁴ருதானி ச ॥ 15 ॥
க³ம்யதாம் வத்ஸ ஸௌமித்ரே ப⁴வானபி ச க³ச்ச²து ।
ஆக³ந்தவ்யம் ச தே த்³ருஷ்ட்வா புனரேவாஶ்ரமம் மம ॥ 16 ॥
ஏவமுக்தஸ்ததே²த்யுக்த்வா காகுத்ஸ்த²ஸ்ஸஹலக்ஷ்மண: ।
ப்ரத³க்ஷிணம் முனிம் க்ருத்வா ப்ரஸ்தா²துமுபசக்ரமே ॥ 17 ॥
ததஶ்ஶுப⁴தரே தூணீ த⁴னுஷீ சாயதேக்ஷணா ।
த³தௌ³ ஸீதா தயோர்ப்⁴ராத்ரோ: க²ங்கௌ³ ச விமலௌ தத: ॥ 18 ॥
ஆப³த்⁴ய ச ஶுபே⁴ தூணீ சாபே சாதா³ய ஸுஸ்வனௌ ।
நிஷ்க்ராந்தாவாஶ்ரமாத்³க³ந்துமுபௌ⁴ தௌ ராமலக்ஷ்மணௌ ॥ 19 ॥
ஶ்ரீமந்தௌ ரூபஸம்பன்னௌ தீ³ப்யமானௌ ஸ்வதேஜஸா ।
ப்ரஸ்தி²தௌ த்⁴ருதசாபௌ தௌ ஸீதயா ஸஹ ராக⁴வௌ ॥ 2௦ ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே அரண்யகாண்டே³ அஷ்டமஸ்ஸர்க:³ ॥
