ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଅଷ୍ଟମସ୍ସର୍ଗଃ ।
ରାମସ୍ତୁ ସହସୌମିତ୍ରିସ୍ସୁତୀକ୍ଷ୍ଣେନାଭିପୂଜିତଃ ।
ପରିଣାମ୍ୟ ନିଶାଂ ତତ୍ର ପ୍ରଭାତେ ପ୍ରତ୍ୟବୁଧ୍ୟତ ॥ 1 ॥
ଉତ୍ଥାୟ ତୁ ୟଥାକାଲଂ ରାଘଵସ୍ସହସୀତୟା ।
ଉପସ୍ପୃଶ୍ୟସୁଶିତେନ ଜଲେନୋତ୍ପଲଗଂଧିନା ॥ 2 ॥
ଅଥ ତେଽଗ୍ନିଂ ସୁରାଂଶ୍ଚୈଵ ଵୈଦେହୀ ରାମଲକ୍ଷ୍ମଣୌ ।
କାଲ୍ୟଂ ଵିଧିଵଦଭ୍ୟର୍ଚ୍ୟ ତପସ୍ଵିଶରଣେ ଵନେ ॥ 3 ॥
ଉଦୟଂତଂ ଦିନକରଂ ଦୃଷ୍ଟ୍ଵା ଵିଗତକଲ୍ମଷାଃ ।
ସୁତୀକ୍ଷ୍ଣଭିଗମ୍ୟେଦଂ ଶ୍ଲକ୍ଷ୍ଣଂ ଵଚନମବ୍ରୁଵନ୍ ॥ 4 ॥
ସୁଖୋଷିତାସ୍ସ୍ମଭଗଵଂସ୍ତ୍ଵୟା ପୂଜ୍ୟେନ ପୂଜିତାଃ ।
ଆପୃଚ୍ଛାମଃ ପ୍ରୟାସ୍ୟାମୋ ମୁନୟସ୍ତ୍ଵରୟଂତି ନଃ ॥ 5 ॥
ତ୍ଵରାମହେ ଵୟଂ ଦ୍ରଷ୍ଟୁଂ କୃତ୍ସ୍ନମାଶ୍ରମମଂଡଲମ୍ ।
ଋଷୀଣାଂ ପୁଣ୍ୟଶୀଲାନାଂ ଦଂଡକାରଣ୍ୟଵାସିନାମ୍ ॥ 6 ॥
ଅଭ୍ୟନୁଜ୍ଞାତୁମିଚ୍ଛାମସ୍ସହୈଭିର୍ମୁନିପୁଂଗଵୈଃ ।
ଧର୍ମନିତ୍ୟୈସ୍ତପୋଦାଂତୈର୍ଵିଶିଖୈରିଵ ପାଵକୈଃ ॥ 7 ॥
ଅଵିଷହ୍ୟାତପୋ ୟାଵତ୍ସୂର୍ୟୋ ନାତିଵିରାଜତେ ।
ଅମାର୍ଗେଣାଗତାଂ ଲକ୍ଷ୍ମୀଂ ପ୍ରାପ୍ୟେଵାନ୍ଵୟଵର୍ଜିତଃ ॥ 8 ॥
ତାଵଦିଚ୍ଛାମହେ ଗଂତୁମିତ୍ୟୁକ୍ତ୍ଵା ଚରଣୌ ମୁନେଃ ।
ଵଵଂଦେ ସହସୌମିତ୍ରିସ୍ସୀତୟା ସହ ରାଘଵଃ ॥ 9 ॥
ତୌ ସଂସ୍ପୃଶଂତୌ ଚରଣାଵୁତ୍ଥାପ୍ୟ ମୁନିପୁଂଗଵଃ ।
ଗାଢମାଲିଂଗ୍ୟ ସସ୍ନେହମିଦଂ ଵଚନମବ୍ରଵୀତ୍ ॥ 10 ॥
ଅରିଷ୍ଟଂ ଗଚ୍ଛ ପଂଥାନଂ ରାମ ସୌମିତ୍ରିଣା ସହ ।
ସୀତୟା ଚାନୟା ସାର୍ଧଂ ଛାୟୟେଵାନୁଵୃତ୍ତୟା ॥ 11 ॥
ପଶ୍ୟାଶ୍ରମପଦଂ ରମ୍ୟଂ ଦଂଡକାରଣ୍ୟଵାସିନାମ୍ ।
ଏଷାଂ ତପସ୍ଵିନାଂ ଵୀର ତପସା ଭାଵିତାତ୍ମନାମ୍ ॥ 12 ॥
ସପ୍ରାଜ୍ୟଫଲମୂଲାନି ପୁଷ୍ପିତାନି ଵନାନି ଚ ।
ପ୍ରଶସ୍ତମୃଗୟୂଥାନି ଶାଂତପକ୍ଷିଗଣାନି ଚ ॥ 13 ॥
ଫୁଲ୍ଲପଂକଜଷଂଡାନି ପ୍ରସନ୍ନସଲିଲାନି ଚ ।
କାରଂଡଵଵିକୀର୍ଣାନି ତଟାକାନି ସରାଂସି ଚ ॥ 14 ॥
ଦ୍ରକ୍ଷ୍ୟସେ ଦୃଷ୍ଟିରମ୍ୟାଣି ଗିରିପ୍ରସ୍ରଵଣାନି ଚ ।
ରମଣୀୟାନ୍ୟରଣ୍ୟାନି ମୟୂରାଭିରୁତାନି ଚ ॥ 15 ॥
ଗମ୍ୟତାଂ ଵତ୍ସ ସୌମିତ୍ରେ ଭଵାନପି ଚ ଗଚ୍ଛତୁ ।
ଆଗଂତଵ୍ୟଂ ଚ ତେ ଦୃଷ୍ଟ୍ଵା ପୁନରେଵାଶ୍ରମଂ ମମ ॥ 16 ॥
ଏଵମୁକ୍ତସ୍ତଥେତ୍ୟୁକ୍ତ୍ଵା କାକୁତ୍ସ୍ଥସ୍ସହଲକ୍ଷ୍ମଣଃ ।
ପ୍ରଦକ୍ଷିଣଂ ମୁନିଂ କୃତ୍ଵା ପ୍ରସ୍ଥାତୁମୁପଚକ୍ରମେ ॥ 17 ॥
ତତଶ୍ଶୁଭତରେ ତୂଣୀ ଧନୁଷୀ ଚାୟତେକ୍ଷଣା ।
ଦଦୌ ସୀତା ତୟୋର୍ଭ୍ରାତ୍ରୋଃ ଖଂଗୌ ଚ ଵିମଲୌ ତତଃ ॥ 18 ॥
ଆବଧ୍ୟ ଚ ଶୁଭେ ତୂଣୀ ଚାପେ ଚାଦାୟ ସୁସ୍ଵନୌ ।
ନିଷ୍କ୍ରାଂତାଵାଶ୍ରମାଦ୍ଗଂତୁମୁଭୌ ତୌ ରାମଲକ୍ଷ୍ମଣୌ ॥ 19 ॥
ଶ୍ରୀମଂତୌ ରୂପସଂପନ୍ନୌ ଦୀପ୍ୟମାନୌ ସ୍ଵତେଜସା ।
ପ୍ରସ୍ଥିତୌ ଧୃତଚାପୌ ତୌ ସୀତୟା ସହ ରାଘଵୌ ॥ 20 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଅଷ୍ଟମସ୍ସର୍ଗଃ ॥
