𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌮𑌸𑍍𑌸𑌰𑍍𑌗𑌃 ।
𑌰𑌾𑌮𑌸𑍍𑌤𑍁 𑌸𑌹𑌸𑍌𑌮𑌿𑌤𑍍𑌰𑌿𑌸𑍍𑌸𑍁𑌤𑍀𑌕𑍍𑌷𑍍𑌣𑍇𑌨𑌾𑌭𑌿𑌪𑍂𑌜𑌿𑌤𑌃 ।
𑌪𑌰𑌿𑌣𑌾𑌮𑍍𑌯 𑌨𑌿𑌶𑌾𑌂 𑌤𑌤𑍍𑌰 𑌪𑍍𑌰𑌭𑌾𑌤𑍇 𑌪𑍍𑌰𑌤𑍍𑌯𑌬𑍁𑌧𑍍𑌯𑌤 ॥ 1 ॥
𑌉𑌤𑍍𑌥𑌾𑌯 𑌤𑍁 𑌯𑌥𑌾𑌕𑌾𑌲𑌂 𑌰𑌾𑌘𑌵𑌸𑍍𑌸𑌹𑌸𑍀𑌤𑌯𑌾 ।
𑌉𑌪𑌸𑍍𑌪𑍃𑌶𑍍𑌯𑌸𑍁𑌶𑌿𑌤𑍇𑌨 𑌜𑌲𑍇𑌨𑍋𑌤𑍍𑌪𑌲𑌗𑌂𑌧𑌿𑌨𑌾 ॥ 2 ॥
𑌅𑌥 𑌤𑍇𑌽𑌗𑍍𑌨𑌿𑌂 𑌸𑍁𑌰𑌾𑌂𑌶𑍍𑌚𑍈𑌵 𑌵𑍈𑌦𑍇𑌹𑍀 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌕𑌾𑌲𑍍𑌯𑌂 𑌵𑌿𑌧𑌿𑌵𑌦𑌭𑍍𑌯𑌰𑍍𑌚𑍍𑌯 𑌤𑌪𑌸𑍍𑌵𑌿𑌶𑌰𑌣𑍇 𑌵𑌨𑍇 ॥ 3 ॥
𑌉𑌦𑌯𑌂𑌤𑌂 𑌦𑌿𑌨𑌕𑌰𑌂 𑌦𑍃𑌷𑍍𑌟𑍍𑌵𑌾 𑌵𑌿𑌗𑌤𑌕𑌲𑍍𑌮𑌷𑌾𑌃 ।
𑌸𑍁𑌤𑍀𑌕𑍍𑌷𑍍𑌣𑌭𑌿𑌗𑌮𑍍𑌯𑍇𑌦𑌂 𑌶𑍍𑌲𑌕𑍍𑌷𑍍𑌣𑌂 𑌵𑌚𑌨𑌮𑌬𑍍𑌰𑍁𑌵𑌨𑍍 ॥ 4 ॥
𑌸𑍁𑌖𑍋𑌷𑌿𑌤𑌾𑌸𑍍𑌸𑍍𑌮𑌭𑌗𑌵𑌂𑌸𑍍𑌤𑍍𑌵𑌯𑌾 𑌪𑍂𑌜𑍍𑌯𑍇𑌨 𑌪𑍂𑌜𑌿𑌤𑌾𑌃 ।
𑌆𑌪𑍃𑌚𑍍𑌛𑌾𑌮𑌃 𑌪𑍍𑌰𑌯𑌾𑌸𑍍𑌯𑌾𑌮𑍋 𑌮𑍁𑌨𑌯𑌸𑍍𑌤𑍍𑌵𑌰𑌯𑌂𑌤𑌿 𑌨𑌃 ॥ 5 ॥
𑌤𑍍𑌵𑌰𑌾𑌮𑌹𑍇 𑌵𑌯𑌂 𑌦𑍍𑌰𑌷𑍍𑌟𑍁𑌂 𑌕𑍃𑌤𑍍𑌸𑍍𑌨𑌮𑌾𑌶𑍍𑌰𑌮𑌮𑌂𑌡𑌲𑌮𑍍 ।
𑌋𑌷𑍀𑌣𑌾𑌂 𑌪𑍁𑌣𑍍𑌯𑌶𑍀𑌲𑌾𑌨𑌾𑌂 𑌦𑌂𑌡𑌕𑌾𑌰𑌣𑍍𑌯𑌵𑌾𑌸𑌿𑌨𑌾𑌮𑍍 ॥ 6 ॥
𑌅𑌭𑍍𑌯𑌨𑍁𑌜𑍍𑌞𑌾𑌤𑍁𑌮𑌿𑌚𑍍𑌛𑌾𑌮𑌸𑍍𑌸𑌹𑍈𑌭𑌿𑌰𑍍𑌮𑍁𑌨𑌿𑌪𑍁𑌂𑌗𑌵𑍈𑌃 ।
𑌧𑌰𑍍𑌮𑌨𑌿𑌤𑍍𑌯𑍈𑌸𑍍𑌤𑌪𑍋𑌦𑌾𑌂𑌤𑍈𑌰𑍍𑌵𑌿𑌶𑌿𑌖𑍈𑌰𑌿𑌵 𑌪𑌾𑌵𑌕𑍈𑌃 ॥ ॥
𑌅𑌵𑌿𑌷𑌹𑍍𑌯𑌾𑌤𑌪𑍋 𑌯𑌾𑌵𑌤𑍍𑌸𑍂𑌰𑍍𑌯𑍋 𑌨𑌾𑌤𑌿𑌵𑌿𑌰𑌾𑌜𑌤𑍇 ।
𑌅𑌮𑌾𑌰𑍍𑌗𑍇𑌣𑌾𑌗𑌤𑌾𑌂 𑌲𑌕𑍍𑌷𑍍𑌮𑍀𑌂 𑌪𑍍𑌰𑌾𑌪𑍍𑌯𑍇𑌵𑌾𑌨𑍍𑌵𑌯𑌵𑌰𑍍𑌜𑌿𑌤𑌃 ॥ ॥
𑌤𑌾𑌵𑌦𑌿𑌚𑍍𑌛𑌾𑌮𑌹𑍇 𑌗𑌂𑌤𑍁𑌮𑌿𑌤𑍍𑌯𑍁𑌕𑍍𑌤𑍍𑌵𑌾 𑌚𑌰𑌣𑍌 𑌮𑍁𑌨𑍇𑌃 ।
𑌵𑌵𑌂𑌦𑍇 𑌸𑌹𑌸𑍌𑌮𑌿𑌤𑍍𑌰𑌿𑌸𑍍𑌸𑍀𑌤𑌯𑌾 𑌸𑌹 𑌰𑌾𑌘𑌵𑌃 ॥ ॥
𑌤𑍌 𑌸𑌂𑌸𑍍𑌪𑍃𑌶𑌂𑌤𑍌 𑌚𑌰𑌣𑌾𑌵𑍁𑌤𑍍𑌥𑌾𑌪𑍍𑌯 𑌮𑍁𑌨𑌿𑌪𑍁𑌂𑌗𑌵𑌃 ।
𑌗𑌾𑌢𑌮𑌾𑌲𑌿𑌂𑌗𑍍𑌯 𑌸𑌸𑍍𑌨𑍇𑌹𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 10 ॥
𑌅𑌰𑌿𑌷𑍍𑌟𑌂 𑌗𑌚𑍍𑌛 𑌪𑌂𑌥𑌾𑌨𑌂 𑌰𑌾𑌮 𑌸𑍌𑌮𑌿𑌤𑍍𑌰𑌿𑌣𑌾 𑌸𑌹 ।
𑌸𑍀𑌤𑌯𑌾 𑌚𑌾𑌨𑌯𑌾 𑌸𑌾𑌰𑍍𑌧𑌂 𑌛𑌾𑌯𑌯𑍇𑌵𑌾𑌨𑍁𑌵𑍃𑌤𑍍𑌤𑌯𑌾 ॥ 11 ॥
𑌪𑌶𑍍𑌯𑌾𑌶𑍍𑌰𑌮𑌪𑌦𑌂 𑌰𑌮𑍍𑌯𑌂 𑌦𑌂𑌡𑌕𑌾𑌰𑌣𑍍𑌯𑌵𑌾𑌸𑌿𑌨𑌾𑌮𑍍 ।
𑌏𑌷𑌾𑌂 𑌤𑌪𑌸𑍍𑌵𑌿𑌨𑌾𑌂 𑌵𑍀𑌰 𑌤𑌪𑌸𑌾 𑌭𑌾𑌵𑌿𑌤𑌾𑌤𑍍𑌮𑌨𑌾𑌮𑍍 ॥ 12 ॥
𑌸𑌪𑍍𑌰𑌾𑌜𑍍𑌯𑌫𑌲𑌮𑍂𑌲𑌾𑌨𑌿 𑌪𑍁𑌷𑍍𑌪𑌿𑌤𑌾𑌨𑌿 𑌵𑌨𑌾𑌨𑌿 𑌚 ।
𑌪𑍍𑌰𑌶𑌸𑍍𑌤𑌮𑍃𑌗𑌯𑍂𑌥𑌾𑌨𑌿 𑌶𑌾𑌂𑌤𑌪𑌕𑍍𑌷𑌿𑌗𑌣𑌾𑌨𑌿 𑌚 ॥ 13 ॥
𑌫𑍁𑌲𑍍𑌲𑌪𑌂𑌕𑌜𑌷𑌂𑌡𑌾𑌨𑌿 𑌪𑍍𑌰𑌸𑌨𑍍𑌨𑌸𑌲𑌿𑌲𑌾𑌨𑌿 𑌚 ।
𑌕𑌾𑌰𑌂𑌡𑌵𑌵𑌿𑌕𑍀𑌰𑍍𑌣𑌾𑌨𑌿 𑌤𑌟𑌾𑌕𑌾𑌨𑌿 𑌸𑌰𑌾𑌂𑌸𑌿 𑌚 ॥ 14 ॥
𑌦𑍍𑌰𑌕𑍍𑌷𑍍𑌯𑌸𑍇 𑌦𑍃𑌷𑍍𑌟𑌿𑌰𑌮𑍍𑌯𑌾𑌣𑌿 𑌗𑌿𑌰𑌿𑌪𑍍𑌰𑌸𑍍𑌰𑌵𑌣𑌾𑌨𑌿 𑌚 ।
𑌰𑌮𑌣𑍀𑌯𑌾𑌨𑍍𑌯𑌰𑌣𑍍𑌯𑌾𑌨𑌿 𑌮𑌯𑍂𑌰𑌾𑌭𑌿𑌰𑍁𑌤𑌾𑌨𑌿 𑌚 ॥ 15 ॥
𑌗𑌮𑍍𑌯𑌤𑌾𑌂 𑌵𑌤𑍍𑌸 𑌸𑍌𑌮𑌿𑌤𑍍𑌰𑍇 𑌭𑌵𑌾𑌨𑌪𑌿 𑌚 𑌗𑌚𑍍𑌛𑌤𑍁 ।
𑌆𑌗𑌂𑌤𑌵𑍍𑌯𑌂 𑌚 𑌤𑍇 𑌦𑍃𑌷𑍍𑌟𑍍𑌵𑌾 𑌪𑍁𑌨𑌰𑍇𑌵𑌾𑌶𑍍𑌰𑌮𑌂 𑌮𑌮 ॥ 16 ॥
𑌏𑌵𑌮𑍁𑌕𑍍𑌤𑌸𑍍𑌤𑌥𑍇𑌤𑍍𑌯𑍁𑌕𑍍𑌤𑍍𑌵𑌾 𑌕𑌾𑌕𑍁𑌤𑍍𑌸𑍍𑌥𑌸𑍍𑌸𑌹𑌲𑌕𑍍𑌷𑍍𑌮𑌣𑌃 ।
𑌪𑍍𑌰𑌦𑌕𑍍𑌷𑌿𑌣𑌂 𑌮𑍁𑌨𑌿𑌂 𑌕𑍃𑌤𑍍𑌵𑌾 𑌪𑍍𑌰𑌸𑍍𑌥𑌾𑌤𑍁𑌮𑍁𑌪𑌚𑌕𑍍𑌰𑌮𑍇 ॥ 1 ॥
𑌤𑌤𑌶𑍍𑌶𑍁𑌭𑌤𑌰𑍇 𑌤𑍂𑌣𑍀 𑌧𑌨𑍁𑌷𑍀 𑌚𑌾𑌯𑌤𑍇𑌕𑍍𑌷𑌣𑌾 ।
𑌦𑌦𑍌 𑌸𑍀𑌤𑌾 𑌤𑌯𑍋𑌰𑍍𑌭𑍍𑌰𑌾𑌤𑍍𑌰𑍋𑌃 𑌖𑌂𑌗𑍌 𑌚 𑌵𑌿𑌮𑌲𑍌 𑌤𑌤𑌃 ॥ 1 ॥
𑌆𑌬𑌧𑍍𑌯 𑌚 𑌶𑍁𑌭𑍇 𑌤𑍂𑌣𑍀 𑌚𑌾𑌪𑍇 𑌚𑌾𑌦𑌾𑌯 𑌸𑍁𑌸𑍍𑌵𑌨𑍌 ।
𑌨𑌿𑌷𑍍𑌕𑍍𑌰𑌾𑌂𑌤𑌾𑌵𑌾𑌶𑍍𑌰𑌮𑌾𑌦𑍍𑌗𑌂𑌤𑍁𑌮𑍁𑌭𑍌 𑌤𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 1 ॥
𑌶𑍍𑌰𑍀𑌮𑌂𑌤𑍌 𑌰𑍂𑌪𑌸𑌂𑌪𑌨𑍍𑌨𑍌 𑌦𑍀𑌪𑍍𑌯𑌮𑌾𑌨𑍌 𑌸𑍍𑌵𑌤𑍇𑌜𑌸𑌾 ।
𑌪𑍍𑌰𑌸𑍍𑌥𑌿𑌤𑍌 𑌧𑍃𑌤𑌚𑌾𑌪𑍌 𑌤𑍌 𑌸𑍀𑌤𑌯𑌾 𑌸𑌹 𑌰𑌾𑌘𑌵𑍌 ॥ 20 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌅𑌷𑍍𑌟𑌮𑌸𑍍𑌸𑌰𑍍𑌗𑌃 ॥
