শ্রীমদ্বাল্মীকীয় রামাযণে অরণ্যকাংডম্ ।
অথ অষ্টমস্সর্গঃ ।
রামস্তু সহসৌমিত্রিস্সুতীক্ষ্ণেনাভিপূজিতঃ ।
পরিণাম্য় নিশাং তত্র প্রভাতে প্রত্যবুধ্যত ॥ 1 ॥
উত্থায় তু যথাকালং রাঘবস্সহসীতয়া ।
উপস্পৃশ্যসুশিতেন জলেনোত্পলগংধিনা ॥ 2 ॥
অথ তেঽগ্নিং সুরাংশ্চৈব বৈদেহী রামলক্ষ্মণৌ ।
কাল্য়ং বিধিবদভ্যর্চ্য় তপস্বিশরণে বনে ॥ 3 ॥
উদয়ংতং দিনকরং দৃষ্ট্বা বিগতকল্মষাঃ ।
সুতীক্ষ্ণভিগম্য়েদং শ্লক্ষ্ণং বচনমব্রুবন্ ॥ 4 ॥
সুখোষিতাস্স্মভগবংস্ত্বয়া পূজ্য়েন পূজিতাঃ ।
আপৃচ্ছামঃ প্রয়াস্য়ামো মুনযস্ত্বরয়ংতি নঃ ॥ 5 ॥
ত্বরামহে বয়ং দ্রষ্টুং কৃত্স্নমাশ্রমমংডলম্ ।
ঋষীণাং পুণ্যশীলানাং দংডকারণ্যবাসিনাম্ ॥ 6 ॥
অভ্যনুজ্ঞাতুমিচ্ছামস্সহৈভির্মুনিপুংগবৈঃ ।
ধর্মনিত্য়ৈস্তপোদাংতৈর্বিশিখৈরিব পাবকৈঃ ॥ 7 ॥
অবিষহ্য়াতপো যাবত্সূর্য়ো নাতিবিরাজতে ।
অমার্গেণাগতাং লক্ষ্মীং প্রাপ্য়েবান্বযবর্জিতঃ ॥ 8 ॥
তাবদিচ্ছামহে গংতুমিত্য়ুক্ত্বা চরণৌ মুনেঃ ।
ববংদে সহসৌমিত্রিস্সীতয়া সহ রাঘবঃ ॥ 9 ॥
তৌ সংস্পৃশংতৌ চরণাবুত্থাপ্য় মুনিপুংগবঃ ।
গাঢমালিংগ্য় সস্নেহমিদং বচনমব্রবীত্ ॥ 10 ॥
অরিষ্টং গচ্ছ পংথানং রাম সৌমিত্রিণা সহ ।
সীতয়া চানয়া সার্ধং ছাযয়েবানুবৃত্তয়া ॥ 11 ॥
পশ্য়াশ্রমপদং রম্য়ং দংডকারণ্যবাসিনাম্ ।
এষাং তপস্বিনাং বীর তপসা ভাবিতাত্মনাম্ ॥ 12 ॥
সপ্রাজ্যফলমূলানি পুষ্পিতানি বনানি চ ।
প্রশস্তমৃগয়ূথানি শাংতপক্ষিগণানি চ ॥ 13 ॥
ফুল্লপংকজষংডানি প্রসন্নসলিলানি চ ।
কারংডববিকীর্ণানি তটাকানি সরাংসি চ ॥ 14 ॥
দ্রক্ষ্যসে দৃষ্টিরম্য়াণি গিরিপ্রস্রবণানি চ ।
রমণীয়ান্যরণ্য়ানি ময়ূরাভিরুতানি চ ॥ 15 ॥
গম্যতাং বত্স সৌমিত্রে ভবানপি চ গচ্ছতু ।
আগংতব্য়ং চ তে দৃষ্ট্বা পুনরেবাশ্রমং মম ॥ 16 ॥
এবমুক্তস্তথেত্য়ুক্ত্বা কাকুত্স্থস্সহলক্ষ্মণঃ ।
প্রদক্ষিণং মুনিং কৃত্বা প্রস্থাতুমুপচক্রমে ॥ 17 ॥
ততশ্শুভতরে তূণী ধনুষী চাযতেক্ষণা ।
দদৌ সীতা তয়োর্ভ্রাত্রোঃ খংগৌ চ বিমলৌ ততঃ ॥ 18 ॥
আবধ্য় চ শুভে তূণী চাপে চাদায় সুস্বনৌ ।
নিষ্ক্রাংতাবাশ্রমাদ্গংতুমুভৌ তৌ রামলক্ষ্মণৌ ॥ 19 ॥
শ্রীমংতৌ রূপসংপন্নৌ দীপ্যমানৌ স্বতেজসা ।
প্রস্থিতৌ ধৃতচাপৌ তৌ সীতয়া সহ রাঘবৌ ॥ 20 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে অষ্টমস্সর্গঃ ॥
