śrīmadvālmīkīya rāmāyaṇē araṇyakāṇḍam ।
atha aṣṭamassargaḥ ।
rāmastu sahasaumitrissutīkṣṇēnābhipūjitaḥ ।
pariṇāmya niśāṃ tatra prabhātē pratyabudhyata ॥ 1 ॥
utthāya tu yathākālaṃ rāghavassahasītayā ।
upaspṛśyasuśitēna jalēnōtpalagandhinā ॥ 2 ॥
atha tē'gniṃ surāṃśchaiva vaidēhī rāmalakṣmaṇau ।
kālyaṃ vidhivadabhyarchya tapasviśaraṇē vanē ॥ 3 ॥
udayantaṃ dinakaraṃ dṛṣṭvā vigatakalmaṣāḥ ।
sutīkṣṇabhigamyēdaṃ ślakṣṇaṃ vachanamabruvan ॥ 4 ॥
sukhōṣitāssmabhagavaṃstvayā pūjyēna pūjitāḥ ।
āpṛchChāmaḥ prayāsyāmō munayastvarayanti naḥ ॥ 5 ॥
tvarāmahē vayaṃ draṣṭuṃ kṛtsnamāśramamaṇḍalam ।
ṛṣīṇāṃ puṇyaśīlānāṃ daṇḍakāraṇyavāsinām ॥ 6 ॥
abhyanujñātumichChāmassahaibhirmunipuṅgavaiḥ ।
dharmanityaistapōdāntairviśikhairiva pāvakaiḥ ॥ 7 ॥
aviṣahyātapō yāvatsūryō nātivirājatē ।
amārgēṇāgatāṃ lakṣmīṃ prāpyēvānvayavarjitaḥ ॥ 8 ॥
tāvadichChāmahē gantumityuktvā charaṇau munēḥ ।
vavandē sahasaumitrissītayā saha rāghavaḥ ॥ 9 ॥
tau saṃspṛśantau charaṇāvutthāpya munipuṅgavaḥ ।
gāḍhamāliṅgya sasnēhamidaṃ vachanamabravīt ॥ 10 ॥
ariṣṭaṃ gachCha panthānaṃ rāma saumitriṇā saha ।
sītayā chānayā sārdhaṃ Chāyayēvānuvṛttayā ॥ 11 ॥
paśyāśramapadaṃ ramyaṃ daṇḍakāraṇyavāsinām ।
ēṣāṃ tapasvināṃ vīra tapasā bhāvitātmanām ॥ 12 ॥
saprājyaphalamūlāni puṣpitāni vanāni cha ।
praśastamṛgayūthāni śāntapakṣigaṇāni cha ॥ 13 ॥
phullapaṅkajaṣaṇḍāni prasannasalilāni cha ।
kāraṇḍavavikīrṇāni taṭākāni sarāṃsi cha ॥ 14 ॥
drakṣyasē dṛṣṭiramyāṇi giriprasravaṇāni cha ।
ramaṇīyānyaraṇyāni mayūrābhirutāni cha ॥ 15 ॥
gamyatāṃ vatsa saumitrē bhavānapi cha gachChatu ।
āgantavyaṃ cha tē dṛṣṭvā punarēvāśramaṃ mama ॥ 16 ॥
ēvamuktastathētyuktvā kākutsthassahalakṣmaṇaḥ ।
pradakṣiṇaṃ muniṃ kṛtvā prasthātumupachakramē ॥ 17 ॥
tataśśubhatarē tūṇī dhanuṣī chāyatēkṣaṇā ।
dadau sītā tayōrbhrātrōḥ khaṅgau cha vimalau tataḥ ॥ 18 ॥
ābadhya cha śubhē tūṇī chāpē chādāya susvanau ।
niṣkrāntāvāśramādgantumubhau tau rāmalakṣmaṇau ॥ 19 ॥
śrīmantau rūpasampannau dīpyamānau svatējasā ।
prasthitau dhṛtachāpau tau sītayā saha rāghavau ॥ 20 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē aṣṭamassargaḥ ॥
