ശ്രീമദ്വാല്മീകീയ രാമായണേ ബാലകാംഡമ് ।
അഥ ഏകവിംശസ്സര്ഗഃ ।
തച്ഛ്രുത്വാ വചനം തസ്യ സ്നേഹപര്യാകുലാക്ഷരമ് ।
സമന്യുഃ കൌശികോ വാക്യം പ്രത്യുവാച മഹീപതിമ് ॥ 1 ॥
പൂർവമര്ഥം പ്രതിശ്രുത്യ പ്രതിജ്ഞാം ഹാതുമിച്ഛസി ।
രാഘവാണാമയുക്തോഽയം കുലസ്യാസ്യ വിപര്യയഃ ॥ 2 ॥
യദീദം തേ ക്ഷമം രാജന് ഗമിഷ്യാമി യഥാഽഗതമ് ।
മിഥ്യാപ്രതിജ്ഞഃ കാകുത്സ്ഥ സുഖീഭവ സബാംധവഃ ॥ 3 ॥
തസ്യ രോഷപരീതസ്യ വിശ്വാമിത്രസ്യ ധീമതഃ ।
ചചാല വസുധാ കൃത്സ്നാ വിവേശ ച ഭയം സുരാന് ॥ 4 ॥
ത്രസ്തരൂപം തു വിജ്ഞായ ജഗത്സർവം മഹാനൃഷിഃ ।
നൃപതിം സുവ്രതോ ധീരോ വസിഷ്ഠോ വാക്യമബ്രവീത് ॥ 5 ॥
ഇക്ഷ്വാകൂണാം കുലേ ജാതസ്സാക്ഷാദ്ധര്മ ഇവാപരഃ ।
ധൃതിമാന് സുവ്രതഃ ശ്രീമാന്നധര്മം ഹാതുമര്ഹസി ॥ 6 ॥
ത്രിഷു ലോകേഷു വിഖ്യാതോ ധര്മാത്മാ ഇതി രാഘവ ।
സ്വധര്മം പ്രതിപദ്യസ്വ നാധര്മം വോഢുമര്ഹസി ॥ 7 ॥
സംശ്രുത്യൈവം കരിഷ്യാമീത്യകുർവാണസ്യ രാഘവ ।
ഇഷ്ടാപൂര്തവധോ ഭൂയാത്തസ്മാദ്രാമം വിസര്ജയ ॥ 8 ॥
കൃതാസ്ത്രമകൃതാസ്ത്രം വാ നൈനം ശക്ഷ്യംതി രാക്ഷസാഃ ।
ഗുപ്തം കുശികപുത്രേണ ജ്വലനേനാമൃതം യഥാ ॥ 9 ॥
ഏഷ വിഗ്രഹവാന് ധര്മ ഏഷ വീര്യവതാം വരഃ ।
ഏഷ ബുധ്യാഽധികോ ലോകേ തപസശ്ച പരായണമ് ॥ 10 ॥
ഏഷോഽസ്ത്രാന് വിവിധാന്വേത്തി ത്രൈലോക്യേ സചരാചരേ ।
നൈനമന്യഃ പുമാന്വേത്തി ന ച വേത്സ്യംതി കേചന ॥ 11 ॥
ന ദേവാ നര്ഷയഃ കേചിന്നാസുരാ ന ച രാക്ഷസാഃ ।
ഗംധർവയക്ഷപ്രവരാസ്സകിന്നരമഹോരഗാഃ ॥ 12 ॥
സർവാസ്ത്രാണി ഭൃശാശ്വസ്യ പുത്രാഃ പരമധാര്മികാഃ ।
കൌശികായ പുരാ ദത്താ യദാ രാജ്യം പ്രശാസതി ॥ 13 ॥
തേഽപി പുത്രാ ഭൃശാശ്വസ്യ പ്രജാപതിസുതാസുതാഃ ।
നൈകരൂപാ മഹാവീര്യാ ദീപ്തിമംതോ ജയാവഹാഃ ॥ 14 ॥
ജയാ ച സുപ്രഭാ ചൈവ ദക്ഷകന്യേ സുമധ്യമേ ।
തേ സുവാതേഽസ്ത്രശസ്ത്രാണി ശതം പരമഭാസ്വരമ് ॥ 15 ॥
പംചാശതം സുതാന് ലേഭേ ജയാ നാമ പരാന് പുരാ ।
വധായാസുരസൈന്യാനാമമേയാന് കാമരൂപിണഃ ॥ 16 ॥
സുപ്രഭാഽജനയച്ചാപി പുത്രാന്പംചാശതം പുനഃ ।
സംഹാരാന്നാമദുര്ധര്ഷാന് ദുരാക്രാമാന് ബലീയസഃ ॥ 17 ॥
താനി ചാസ്ത്രാണി വേത്ത്യേഷ യഥാവത്കുശികാത്മജഃ ।
അപൂർവാണാം ച ജനനേ ശക്തോ ഭൂയസ്സ ധര്മവിത് ॥ 18 ॥
ഏവം വീര്യോ മഹാതേജാ വിശ്വാമിത്രോ മഹായശാഃ ।
ന രാമഗമനേ രാജന് സംശയം കര്തുമര്ഹസി ॥ 19 ॥
തേഷാം നിഗ്രഹണേ ശക്തസ്സ്വയം ച കുശികാത്മജഃ ।
തവ പുത്രഹിതാര്ഥായ ത്വാമുപേത്യാഭിയാചതേ ॥ 20 ॥
ഇതി മുനിവചനാത്പ്രസന്നചിത്തോ രഘുവൃഷഭസ്തു മുമോദ ഭാസ്വരാംഗഃ ।
ഗമനമഭിരുരോച രാഘവസ്യ പ്രഥിതയശാഃ കുശികാത്മജായ ബുധ്യാ ॥ 21 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഏകവിംശസ്സര്ഗഃ ॥
