শ্রীমদ্বাল্মীকীয় রামাযণে বালকাংডম্ ।
অথ একবিংশস্সর্গঃ ।
তচ্ছ্রুত্বা বচনং তস্য় স্নেহপর্য়াকুলাক্ষরম্ ।
সমন্য়ুঃ কৌশিকো বাক্য়ং প্রত্য়ুবাচ মহীপতিম্ ॥ 1 ॥
পূর্বমর্থং প্রতিশ্রুত্য় প্রতিজ্ঞাং হাতুমিচ্ছসি ।
রাঘবাণাময়ুক্তোঽয়ং কুলস্য়াস্য় বিপর্যয়ঃ ॥ 2 ॥
যদীদং তে ক্ষমং রাজন্ গমিষ্য়ামি যথাঽগতম্ ।
মিথ্য়াপ্রতিজ্ঞঃ কাকুত্স্থ সুখীভব সবাংধবঃ ॥ 3 ॥
তস্য় রোষপরীতস্য় বিশ্বামিত্রস্য় ধীমতঃ ।
চচাল বসুধা কৃত্স্না বিবেশ চ ভয়ং সুরান্ ॥ 4 ॥
ত্রস্তরূপং তু বিজ্ঞায় জগত্সর্বং মহানৃষিঃ ।
নৃপতিং সুব্রতো ধীরো বসিষ্ঠো বাক্যমব্রবীত্ ॥ 5 ॥
ইক্ষ্বাকূণাং কুলে জাতস্সাক্ষাদ্ধর্ম ইবাপরঃ ।
ধৃতিমান্ সুব্রতঃ শ্রীমান্নধর্মং হাতুমর্হসি ॥ 6 ॥
ত্রিষু লোকেষু বিখ্য়াতো ধর্মাত্মা ইতি রাঘব ।
স্বধর্মং প্রতিপদ্যস্ব নাধর্মং বোঢুমর্হসি ॥ 7 ॥
সংশ্রুত্য়ৈবং করিষ্য়ামীত্যকুর্বাণস্য় রাঘব ।
ইষ্টাপূর্তবধো ভূয়াত্তস্মাদ্রামং বিসর্জয় ॥ 8 ॥
কৃতাস্ত্রমকৃতাস্ত্রং বা নৈনং শক্ষ্য়ংতি রাক্ষসাঃ ।
গুপ্তং কুশিকপুত্রেণ জ্বলনেনামৃতং যথা ॥ 9 ॥
এষ বিগ্রহবান্ ধর্ম এষ বীর্যবতাং বরঃ ।
এষ বুধ্য়াঽধিকো লোকে তপসশ্চ পরাযণম্ ॥ 10 ॥
এষোঽস্ত্রান্ বিবিধান্বেত্তি ত্রৈলোক্য়ে সচরাচরে ।
নৈনমন্য়ঃ পুমান্বেত্তি ন চ বেত্স্য়ংতি কেচন ॥ 11 ॥
ন দেবা নর্ষয়ঃ কেচিন্নাসুরা ন চ রাক্ষসাঃ ।
গংধর্বযক্ষপ্রবরাস্সকিন্নরমহোরগাঃ ॥ 12 ॥
সর্বাস্ত্রাণি ভৃশাশ্বস্য় পুত্রাঃ পরমধার্মিকাঃ ।
কৌশিকায় পুরা দত্তা যদা রাজ্য়ং প্রশাসতি ॥ 13 ॥
তেঽপি পুত্রা ভৃশাশ্বস্য় প্রজাপতিসুতাসুতাঃ ।
নৈকরূপা মহাবীর্য়া দীপ্তিমংতো জয়াবহাঃ ॥ 14 ॥
জয়া চ সুপ্রভা চৈব দক্ষকন্য়ে সুমধ্যমে ।
তে সুবাতেঽস্ত্রশস্ত্রাণি শতং পরমভাস্বরম্ ॥ 15 ॥
পংচাশতং সুতান্ লেভে জয়া নাম পরান্ পুরা ।
বধায়াসুরসৈন্য়ানামমেয়ান্ কামরূপিণঃ ॥ 16 ॥
সুপ্রভাঽজনযচ্চাপি পুত্রান্পংচাশতং পুনঃ ।
সংহারান্নামদুর্ধর্ষান্ দুরাক্রামান্ বলীযসঃ ॥ 17 ॥
তানি চাস্ত্রাণি বেত্ত্য়েষ যথাবত্কুশিকাত্মজঃ ।
অপূর্বাণাং চ জননে শক্তো ভূযস্স ধর্মবিত্ ॥ 18 ॥
এবং বীর্য়ো মহাতেজা বিশ্বামিত্রো মহাযশাঃ ।
ন রামগমনে রাজন্ সংশয়ং কর্তুমর্হসি ॥ 19 ॥
তেষাং নিগ্রহণে শক্তস্স্বয়ং চ কুশিকাত্মজঃ ।
তব পুত্রহিতার্থায় ত্বামুপেত্য়াভিয়াচতে ॥ 20 ॥
ইতি মুনিবচনাত্প্রসন্নচিত্তো রঘুবৃষভস্তু মুমোদ ভাস্বরাংগঃ ।
গমনমভিরুরোচ রাঘবস্য় প্রথিতযশাঃ কুশিকাত্মজায় বুধ্য়া ॥ 21 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে একবিংশস্সর্গঃ ॥
