śrīmadvālmīkīya rāmāyaṇē bālakāṇḍam ।
atha ēkaviṃśassargaḥ ।
tachChrutvā vachanaṃ tasya snēhaparyākulākṣaram ।
samanyuḥ kauśikō vākyaṃ pratyuvācha mahīpatim ॥ 1 ॥
pūrvamarthaṃ pratiśrutya pratijñāṃ hātumichChasi ।
rāghavāṇāmayuktō'yaṃ kulasyāsya viparyayaḥ ॥ 2 ॥
yadīdaṃ tē kṣamaṃ rājan gamiṣyāmi yathā'gatam ।
mithyāpratijñaḥ kākutstha sukhībhava sabāndhavaḥ ॥ 3 ॥
tasya rōṣaparītasya viśvāmitrasya dhīmataḥ ।
chachāla vasudhā kṛtsnā vivēśa cha bhayaṃ surān ॥ 4 ॥
trastarūpaṃ tu vijñāya jagatsarvaṃ mahānṛṣiḥ ।
nṛpatiṃ suvratō dhīrō vasiṣṭhō vākyamabravīt ॥ 5 ॥
ikṣvākūṇāṃ kulē jātassākṣāddharma ivāparaḥ ।
dhṛtimān suvrataḥ śrīmānnadharmaṃ hātumarhasi ॥ 6 ॥
triṣu lōkēṣu vikhyātō dharmātmā iti rāghava ।
svadharmaṃ pratipadyasva nādharmaṃ vōḍhumarhasi ॥ 7 ॥
saṃśrutyaivaṃ kariṣyāmītyakurvāṇasya rāghava ।
iṣṭāpūrtavadhō bhūyāttasmādrāmaṃ visarjaya ॥ 8 ॥
kṛtāstramakṛtāstraṃ vā nainaṃ śakṣyanti rākṣasāḥ ।
guptaṃ kuśikaputrēṇa jvalanēnāmṛtaṃ yathā ॥ 9 ॥
ēṣa vigrahavān dharma ēṣa vīryavatāṃ varaḥ ।
ēṣa budhyā'dhikō lōkē tapasaścha parāyaṇam ॥ 10 ॥
ēṣō'strān vividhānvētti trailōkyē sacharācharē ।
nainamanyaḥ pumānvētti na cha vētsyanti kēchana ॥ 11 ॥
na dēvā narṣayaḥ kēchinnāsurā na cha rākṣasāḥ ।
gandharvayakṣapravarāssakinnaramahōragāḥ ॥ 12 ॥
sarvāstrāṇi bhṛśāśvasya putrāḥ paramadhārmikāḥ ।
kauśikāya purā dattā yadā rājyaṃ praśāsati ॥ 13 ॥
tē'pi putrā bhṛśāśvasya prajāpatisutāsutāḥ ।
naikarūpā mahāvīryā dīptimantō jayāvahāḥ ॥ 14 ॥
jayā cha suprabhā chaiva dakṣakanyē sumadhyamē ।
tē suvātē'straśastrāṇi śataṃ paramabhāsvaram ॥ 15 ॥
pañchāśataṃ sutān lēbhē jayā nāma parān purā ।
vadhāyāsurasainyānāmamēyān kāmarūpiṇaḥ ॥ 16 ॥
suprabhā'janayachchāpi putrānpañchāśataṃ punaḥ ।
saṃhārānnāmadurdharṣān durākrāmān balīyasaḥ ॥ 17 ॥
tāni chāstrāṇi vēttyēṣa yathāvatkuśikātmajaḥ ।
apūrvāṇāṃ cha jananē śaktō bhūyassa dharmavit ॥ 18 ॥
ēvaṃ vīryō mahātējā viśvāmitrō mahāyaśāḥ ।
na rāmagamanē rājan saṃśayaṃ kartumarhasi ॥ 19 ॥
tēṣāṃ nigrahaṇē śaktassvayaṃ cha kuśikātmajaḥ ।
tava putrahitārthāya tvāmupētyābhiyāchatē ॥ 20 ॥
iti munivachanātprasannachittō raghuvṛṣabhastu mumōda bhāsvarāṅgaḥ ।
gamanamabhirurōcha rāghavasya prathitayaśāḥ kuśikātmajāya budhyā ॥ 21 ॥
ityārṣē śrīmadrāmāyaṇē vālmīkīya ādikāvyē bālakāṇḍē ēkaviṃśassargaḥ ॥
