ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଏକଵିଂଶସ୍ସର୍ଗଃ ।
ତଚ୍ଛ୍ରୁତ୍ଵା ଵଚନଂ ତସ୍ୟ ସ୍ନେହପର୍ୟାକୁଲାକ୍ଷରମ୍ ।
ସମନ୍ୟୁଃ କୌଶିକୋ ଵାକ୍ୟଂ ପ୍ରତ୍ୟୁଵାଚ ମହୀପତିମ୍ ॥ 1 ॥
ପୂର୍ଵମର୍ଥଂ ପ୍ରତିଶ୍ରୁତ୍ୟ ପ୍ରତିଜ୍ଞାଂ ହାତୁମିଚ୍ଛସି ।
ରାଘଵାଣାମୟୁକ୍ତୋଽୟଂ କୁଲସ୍ୟାସ୍ୟ ଵିପର୍ୟୟଃ ॥ 2 ॥
ୟଦୀଦଂ ତେ କ୍ଷମଂ ରାଜନ୍ ଗମିଷ୍ୟାମି ୟଥାଽଗତମ୍ ।
ମିଥ୍ୟାପ୍ରତିଜ୍ଞଃ କାକୁତ୍ସ୍ଥ ସୁଖୀଭଵ ସବାଂଧଵଃ ॥ 3 ॥
ତସ୍ୟ ରୋଷପରୀତସ୍ୟ ଵିଶ୍ଵାମିତ୍ରସ୍ୟ ଧୀମତଃ ।
ଚଚାଲ ଵସୁଧା କୃତ୍ସ୍ନା ଵିଵେଶ ଚ ଭୟଂ ସୁରାନ୍ ॥ 4 ॥
ତ୍ରସ୍ତରୂପଂ ତୁ ଵିଜ୍ଞାୟ ଜଗତ୍ସର୍ଵଂ ମହାନୃଷିଃ ।
ନୃପତିଂ ସୁଵ୍ରତୋ ଧୀରୋ ଵସିଷ୍ଠୋ ଵାକ୍ୟମବ୍ରଵୀତ୍ ॥ 5 ॥
ଇକ୍ଷ୍ଵାକୂଣାଂ କୁଲେ ଜାତସ୍ସାକ୍ଷାଦ୍ଧର୍ମ ଇଵାପରଃ ।
ଧୃତିମାନ୍ ସୁଵ୍ରତଃ ଶ୍ରୀମାନ୍ନଧର୍ମଂ ହାତୁମର୍ହସି ॥ 6 ॥
ତ୍ରିଷୁ ଲୋକେଷୁ ଵିଖ୍ୟାତୋ ଧର୍ମାତ୍ମା ଇତି ରାଘଵ ।
ସ୍ଵଧର୍ମଂ ପ୍ରତିପଦ୍ୟସ୍ଵ ନାଧର୍ମଂ ଵୋଢୁମର୍ହସି ॥ 7 ॥
ସଂଶ୍ରୁତ୍ୟୈଵଂ କରିଷ୍ୟାମୀତ୍ୟକୁର୍ଵାଣସ୍ୟ ରାଘଵ ।
ଇଷ୍ଟାପୂର୍ତଵଧୋ ଭୂୟାତ୍ତସ୍ମାଦ୍ରାମଂ ଵିସର୍ଜୟ ॥ 8 ॥
କୃତାସ୍ତ୍ରମକୃତାସ୍ତ୍ରଂ ଵା ନୈନଂ ଶକ୍ଷ୍ୟଂତି ରାକ୍ଷସାଃ ।
ଗୁପ୍ତଂ କୁଶିକପୁତ୍ରେଣ ଜ୍ଵଲନେନାମୃତଂ ୟଥା ॥ 9 ॥
ଏଷ ଵିଗ୍ରହଵାନ୍ ଧର୍ମ ଏଷ ଵୀର୍ୟଵତାଂ ଵରଃ ।
ଏଷ ବୁଧ୍ୟାଽଧିକୋ ଲୋକେ ତପସଶ୍ଚ ପରାୟଣମ୍ ॥ 10 ॥
ଏଷୋଽସ୍ତ୍ରାନ୍ ଵିଵିଧାନ୍ଵେତ୍ତି ତ୍ରୈଲୋକ୍ୟେ ସଚରାଚରେ ।
ନୈନମନ୍ୟଃ ପୁମାନ୍ଵେତ୍ତି ନ ଚ ଵେତ୍ସ୍ୟଂତି କେଚନ ॥ 11 ॥
ନ ଦେଵା ନର୍ଷୟଃ କେଚିନ୍ନାସୁରା ନ ଚ ରାକ୍ଷସାଃ ।
ଗଂଧର୍ଵୟକ୍ଷପ୍ରଵରାସ୍ସକିନ୍ନରମହୋରଗାଃ ॥ 12 ॥
ସର୍ଵାସ୍ତ୍ରାଣି ଭୃଶାଶ୍ଵସ୍ୟ ପୁତ୍ରାଃ ପରମଧାର୍ମିକାଃ ।
କୌଶିକାୟ ପୁରା ଦତ୍ତା ୟଦା ରାଜ୍ୟଂ ପ୍ରଶାସତି ॥ 13 ॥
ତେଽପି ପୁତ୍ରା ଭୃଶାଶ୍ଵସ୍ୟ ପ୍ରଜାପତିସୁତାସୁତାଃ ।
ନୈକରୂପା ମହାଵୀର୍ୟା ଦୀପ୍ତିମଂତୋ ଜୟାଵହାଃ ॥ 14 ॥
ଜୟା ଚ ସୁପ୍ରଭା ଚୈଵ ଦକ୍ଷକନ୍ୟେ ସୁମଧ୍ୟମେ ।
ତେ ସୁଵାତେଽସ୍ତ୍ରଶସ୍ତ୍ରାଣି ଶତଂ ପରମଭାସ୍ଵରମ୍ ॥ 15 ॥
ପଂଚାଶତଂ ସୁତାନ୍ ଲେଭେ ଜୟା ନାମ ପରାନ୍ ପୁରା ।
ଵଧାୟାସୁରସୈନ୍ୟାନାମମେୟାନ୍ କାମରୂପିଣଃ ॥ 16 ॥
ସୁପ୍ରଭାଽଜନୟଚ୍ଚାପି ପୁତ୍ରାନ୍ପଂଚାଶତଂ ପୁନଃ ।
ସଂହାରାନ୍ନାମଦୁର୍ଧର୍ଷାନ୍ ଦୁରାକ୍ରାମାନ୍ ବଲୀୟସଃ ॥ 17 ॥
ତାନି ଚାସ୍ତ୍ରାଣି ଵେତ୍ତ୍ୟେଷ ୟଥାଵତ୍କୁଶିକାତ୍ମଜଃ ।
ଅପୂର୍ଵାଣାଂ ଚ ଜନନେ ଶକ୍ତୋ ଭୂୟସ୍ସ ଧର୍ମଵିତ୍ ॥ 18 ॥
ଏଵଂ ଵୀର୍ୟୋ ମହାତେଜା ଵିଶ୍ଵାମିତ୍ରୋ ମହାୟଶାଃ ।
ନ ରାମଗମନେ ରାଜନ୍ ସଂଶୟଂ କର୍ତୁମର୍ହସି ॥ 19 ॥
ତେଷାଂ ନିଗ୍ରହଣେ ଶକ୍ତସ୍ସ୍ଵୟଂ ଚ କୁଶିକାତ୍ମଜଃ ।
ତଵ ପୁତ୍ରହିତାର୍ଥାୟ ତ୍ଵାମୁପେତ୍ୟାଭିୟାଚତେ ॥ 20 ॥
ଇତି ମୁନିଵଚନାତ୍ପ୍ରସନ୍ନଚିତ୍ତୋ ରଘୁଵୃଷଭସ୍ତୁ ମୁମୋଦ ଭାସ୍ଵରାଂଗଃ ।
ଗମନମଭିରୁରୋଚ ରାଘଵସ୍ୟ ପ୍ରଥିତୟଶାଃ କୁଶିକାତ୍ମଜାୟ ବୁଧ୍ୟା ॥ 21 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଏକଵିଂଶସ୍ସର୍ଗଃ ॥
