ශ්රීමද්වාල්මීකීය රාමායණේ බාලකාංඩම් ।
අථ ඒකවිංශස්සර්ගඃ ।
තච්ඡ්රුත්වා වචනං තස්ය ස්නේහපර්යාකුලාක්ෂරම් ।
සමන්යුඃ කෞශිකෝ වාක්යං ප්රත්යුවාච මහීපතිම් ॥ 1 ॥
පූර්වමර්ථං ප්රතිශ්රුත්ය ප්රතිජ්ඤාං හාතුමිච්ඡසි ।
රාඝවාණාමයුක්තෝऽයං කුලස්යාස්ය විපර්යයඃ ॥ 2 ॥
යදීදං තේ ක්ෂමං රාජන් ගමිෂ්යාමි යථාऽගතම් ।
මිථ්යාප්රතිජ්ඤඃ කාකුත්ස්ථ සුඛීභව සබාංධවඃ ॥ 3 ॥
තස්ය රෝෂපරීතස්ය විශ්වාමිත්රස්ය ධීමතඃ ।
චචාල වසුධා කෘත්ස්නා විවේශ ච භයං සුරාන් ॥ 4 ॥
ත්රස්තරූපං තු විජ්ඤාය ජගත්සර්වං මහානෘෂිඃ ।
නෘපතිං සුව්රතෝ ධීරෝ වසිෂ්ඨෝ වාක්යමබ්රවීත් ॥ 5 ॥
ඉක්ෂ්වාකූණාං කුලේ ජාතස්සාක්ෂාද්ධර්ම ඉවාපරඃ ।
ධෘතිමාන් සුව්රතඃ ශ්රීමාන්නධර්මං හාතුමර්හසි ॥ 6 ॥
ත්රිෂු ලෝකේෂු විඛ්යාතෝ ධර්මාත්මා ඉති රාඝව ।
ස්වධර්මං ප්රතිපද්යස්ව නාධර්මං වෝඪුමර්හසි ॥ 7 ॥
සංශ්රුත්යෛවං කරිෂ්යාමීත්යකුර්වාණස්ය රාඝව ।
ඉෂ්ටාපූර්තවධෝ භූයාත්තස්මාද්රාමං විසර්ජය ॥ 8 ॥
කෘතාස්ත්රමකෘතාස්ත්රං වා නෛනං ශක්ෂ්යංති රාක්ෂසාඃ ।
ගුප්තං කුශිකපුත්රේණ ජ්වලනේනාමෘතං යථා ॥ 9 ॥
ඒෂ විග්රහවාන් ධර්ම ඒෂ වීර්යවතාං වරඃ ।
ඒෂ බුධ්යාऽධිකෝ ලෝකේ තපසශ්ච පරායණම් ॥ 10 ॥
ඒෂෝऽස්ත්රාන් විවිධාන්වේත්ති ත්රෛලෝක්යේ සචරාචරේ ।
නෛනමන්යඃ පුමාන්වේත්ති න ච වේත්ස්යංති කේචන ॥ 11 ॥
න දේවා නර්ෂයඃ කේචින්නාසුරා න ච රාක්ෂසාඃ ।
ගංධර්වයක්ෂප්රවරාස්සකින්නරමහෝරගාඃ ॥ 12 ॥
සර්වාස්ත්රාණි භෘශාශ්වස්ය පුත්රාඃ පරමධාර්මිකාඃ ।
කෞශිකාය පුරා දත්තා යදා රාජ්යං ප්රශාසති ॥ 13 ॥
තේऽපි පුත්රා භෘශාශ්වස්ය ප්රජාපතිසුතාසුතාඃ ।
නෛකරූපා මහාවීර්යා දීප්තිමංතෝ ජයාවහාඃ ॥ 14 ॥
ජයා ච සුප්රභා චෛව දක්ෂකන්යේ සුමධ්යමේ ।
තේ සුවාතේऽස්ත්රශස්ත්රාණි ශතං පරමභාස්වරම් ॥ 15 ॥
පංචාශතං සුතාන් ලේභේ ජයා නාම පරාන් පුරා ।
වධායාසුරසෛන්යානාමමේයාන් කාමරූපිණඃ ॥ 16 ॥
සුප්රභාऽජනයච්චාපි පුත්රාන්පංචාශතං පුනඃ ।
සංහාරාන්නාමදුර්ධර්ෂාන් දුරාක්රාමාන් බලීයසඃ ॥ 17 ॥
තානි චාස්ත්රාණි වේත්ත්යේෂ යථාවත්කුශිකාත්මජඃ ।
අපූර්වාණාං ච ජනනේ ශක්තෝ භූයස්ස ධර්මවිත් ॥ 18 ॥
ඒවං වීර්යෝ මහාතේජා විශ්වාමිත්රෝ මහායශාඃ ।
න රාමගමනේ රාජන් සංශයං කර්තුමර්හසි ॥ 19 ॥
තේෂාං නිග්රහණේ ශක්තස්ස්වයං ච කුශිකාත්මජඃ ।
තව පුත්රහිතාර්ථාය ත්වාමුපේත්යාභියාචතේ ॥ 20 ॥
ඉති මුනිවචනාත්ප්රසන්නචිත්තෝ රඝුවෘෂභස්තු මුමෝද භාස්වරාංගඃ ।
ගමනමභිරුරෝච රාඝවස්ය ප්රථිතයශාඃ කුශිකාත්මජාය බුධ්යා ॥ 21 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ඒකවිංශස්සර්ගඃ ॥
