ශ්රීමද්වාල්මීකීය රාමායණේ බාලකාංඩම් ।
අථ චතුශ්චත්වාරිංශස්සර්ගඃ ।
ස ගත්වා සාගරං රාජා ගංගයාऽනුගතස්තදා ।
ප්රවිවේශ තලං භූමේර්යත්ර තේ භස්මසාත්කෘතාඃ ॥ 1 ॥
භස්මන්යථාऽප්ලුතේ රාම ගංගායාස්සලිලේන වෛ ।
සර්වලෝකප්රභුර්බ්රහ්මා රාජානමිදමබ්රවීත් ॥ 2 ॥
තාරිතා නරශාර්දූල දිවං යාතාශ්ච දේවවත් ।
ෂෂ්ඨිඃ පුත්රසහස්රාණි සගරස්ය මහාත්මනඃ ॥ 3 ॥
සාගරස්ය ජලං ලෝකේ යාවත්ස්ථාස්යති පාර්ථිව ।
සගරස්යාත්මජාස්තාවත්ස්වර්ගේ ස්ථාස්යංති දේවවත් ॥ 4 ॥
ඉයං ච දුහිතා ජ්යේෂ්ඨා තව ගංගා භවිෂ්යති ।
ත්වත්කෘතේන ච නාම්නාऽථ ලෝකේ ස්ථාස්යති විශ්රුතා ॥ 5 ॥
ගංගා ත්රිපථගා රාජන් දිව්යා භාගීරථීති ච ।
ත්රීන් පථෝ භාවයංතීති තතස්ත්රිපථගා ස්මෘතා ॥ 6 ॥
පිතාමහානාං සර්වේෂාං ත්වමත්ර මනුජාධිප ।
කුරුෂ්ව සලිලං රාජන් ප්රතිජ්ඤාමපවර්ජය ॥ 7 ॥
පූර්වකේණ හි තේ රාජංස්තේනාතියශසා තදා ।
ධර්මිණාං ප්රවරේණාපි නෛෂ ප්රාප්තෝ මනෝරථඃ ॥ 8 ॥
තථෛවාංශුමතා තාත ලෝකේऽප්රතිමතේජසා ।
ගංගාං ප්රාර්ථයතානේතුං ප්රතිජ්ඤා නාපවර්ජිතා ॥ 9 ॥
රාජර්ෂිණා ගුණවතා මහර්ෂිසමතේජසා ।
මත්තුල්යතපසා චෛව ක්ෂත්රධර්මස්ථිතේන ච ॥ 10 ॥
දිලීපේන මහාභාග තව පිත්රාऽති තේජසා ।
පුනර්න ශංකිතාऽනේතුං ගංගාං ප්රාර්ථයතාऽනඝ ॥ 11 ॥
සා ත්වයා සමනුක්රාංතා ප්රතිජ්ඤා පුරුෂර්ෂභ ।
ප්රාප්තෝऽසි පරමං ලෝකේ යශඃ පරමසම්මතම් ॥ 12 ॥
යච්ච ගංගාවතරණං ත්වයා කෘතමරිංදම ।
අනේන ච භවාන් ප්රාප්තෝ ධර්මස්යායතනං මහත් ॥ 13 ॥
ප්ලාවයස්ව ත්වමාත්මානං නරෝත්තම සදෝචිතේ ।
සලිලේ පුරුෂව්යාඝ්ර ශුචිඃ පුණ්යඵලෝ භව ॥ 14 ॥
පිතාමහානාං සර්වේෂාං කුරුෂ්ව සලිලක්රියාම් ।
ස්වස්ති තේऽස්තු ගමිෂ්යාමි ස්වං ලෝකං ගම්යතාං නෘප ॥ 15 ॥
ඉත්යේවමුක්ත්වා දේවේශඃ සර්වලෝකපිතාමහඃ ।
යථාऽऽගතං තථාऽගච්ඡත් දේවලෝකං මහායශාඃ ॥ 16 ॥
භගීරථෝऽපි රාජර්ෂිඃ කෘත්වා සලිලමුත්තමම් ।
යථාක්රමං යථාන්යායං සාගරාණාං මහායශාඃ ॥ 17 ॥
කෘතෝදකශ්ශුචී රාජා ස්වපුරං ප්රවිවේශ හ ।
සමෘද්ධාර්ථෝ රඝුශ්රේෂ්ඨ ස්වරාජ්යං ප්රශශාස හ ॥ 18 ॥
ප්රමුමෝද හ ලෝකස්තං නෘපමාසාද්ය රාඝව ।
නෂ්ටශෝකස්සමෘද්ධාර්ථෝ බභූව විගතජ්වරඃ ॥ 19 ॥
ඒෂ තේ රාම ගංගායා විස්තරෝऽභිහිතෝ මයා ।
ස්වස්ති ප්රාප්නුහි භද්රං තේ සංධ්යාකාලෝऽතිවර්තතේ ॥ 20 ॥
ධන්යං යශස්යමායුෂ්යං පුත්ර්යං ස්වර්ග්යමතීව ච ।
යශ්ශ්රාවයති විප්රේෂු ක්ෂත්රියේෂ්විතරේෂු ච ॥ 21 ॥
ප්රීයංතේ පිතරස්තස්ය ප්රීයංතේ දෛවතානි ච ।
ඉදමාඛ්යානමව්යග්රෝ ගංගාවතරණං ශුභම් ॥ 22 ॥
යශ්ශෘණෝති ච කාකුත්ස්ථ සර්වාන් කාමානවාප්නුයාත් ।
සර්වේ පාපාඃ ප්රණශ්යංති ආයුඃ කීර්තිශ්ච වර්ධතේ ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ චතුශ්චත්වාරිංශස්සර්ගඃ ॥
