ശ്രീമദ്വാല്മീകീയ രാമായണേ ബാലകാംഡമ് ।
അഥ ചതുശ്ചത്വാരിംശസ്സര്ഗഃ ।
സ ഗത്വാ സാഗരം രാജാ ഗംഗയാഽനുഗതസ്തദാ ।
പ്രവിവേശ തലം ഭൂമേര്യത്ര തേ ഭസ്മസാത്കൃതാഃ ॥ 1 ॥
ഭസ്മന്യഥാഽപ്ലുതേ രാമ ഗംഗായാസ്സലിലേന വൈ ।
സർവലോകപ്രഭുര്ബ്രഹ്മാ രാജാനമിദമബ്രവീത് ॥ 2 ॥
താരിതാ നരശാര്ദൂല ദിവം യാതാശ്ച ദേവവത് ।
ഷഷ്ഠിഃ പുത്രസഹസ്രാണി സഗരസ്യ മഹാത്മനഃ ॥ 3 ॥
സാഗരസ്യ ജലം ലോകേ യാവത്സ്ഥാസ്യതി പാര്ഥിവ ।
സഗരസ്യാത്മജാസ്താവത്സ്വര്ഗേ സ്ഥാസ്യംതി ദേവവത് ॥ 4 ॥
ഇയം ച ദുഹിതാ ജ്യേഷ്ഠാ തവ ഗംഗാ ഭവിഷ്യതി ।
ത്വത്കൃതേന ച നാമ്നാഽഥ ലോകേ സ്ഥാസ്യതി വിശ്രുതാ ॥ 5 ॥
ഗംഗാ ത്രിപഥഗാ രാജന് ദിവ്യാ ഭാഗീരഥീതി ച ।
ത്രീന് പഥോ ഭാവയംതീതി തതസ്ത്രിപഥഗാ സ്മൃതാ ॥ 6 ॥
പിതാമഹാനാം സർവേഷാം ത്വമത്ര മനുജാധിപ ।
കുരുഷ്വ സലിലം രാജന് പ്രതിജ്ഞാമപവര്ജയ ॥ 7 ॥
പൂർവകേണ ഹി തേ രാജംസ്തേനാതിയശസാ തദാ ।
ധര്മിണാം പ്രവരേണാപി നൈഷ പ്രാപ്തോ മനോരഥഃ ॥ 8 ॥
തഥൈവാംശുമതാ താത ലോകേഽപ്രതിമതേജസാ ।
ഗംഗാം പ്രാര്ഥയതാനേതും പ്രതിജ്ഞാ നാപവര്ജിതാ ॥ 9 ॥
രാജര്ഷിണാ ഗുണവതാ മഹര്ഷിസമതേജസാ ।
മത്തുല്യതപസാ ചൈവ ക്ഷത്രധര്മസ്ഥിതേന ച ॥ 10 ॥
ദിലീപേന മഹാഭാഗ തവ പിത്രാഽതി തേജസാ ।
പുനര്ന ശംകിതാഽനേതും ഗംഗാം പ്രാര്ഥയതാഽനഘ ॥ 11 ॥
സാ ത്വയാ സമനുക്രാംതാ പ്രതിജ്ഞാ പുരുഷര്ഷഭ ।
പ്രാപ്തോഽസി പരമം ലോകേ യശഃ പരമസമ്മതമ് ॥ 12 ॥
യച്ച ഗംഗാവതരണം ത്വയാ കൃതമരിംദമ ।
അനേന ച ഭവാന് പ്രാപ്തോ ധര്മസ്യായതനം മഹത് ॥ 13 ॥
പ്ലാവയസ്വ ത്വമാത്മാനം നരോത്തമ സദോചിതേ ।
സലിലേ പുരുഷവ്യാഘ്ര ശുചിഃ പുണ്യഫലോ ഭവ ॥ 14 ॥
പിതാമഹാനാം സർവേഷാം കുരുഷ്വ സലിലക്രിയാമ് ।
സ്വസ്തി തേഽസ്തു ഗമിഷ്യാമി സ്വം ലോകം ഗമ്യതാം നൃപ ॥ 15 ॥
ഇത്യേവമുക്ത്വാ ദേവേശഃ സർവലോകപിതാമഹഃ ।
യഥാഽഽഗതം തഥാഽഗച്ഛത് ദേവലോകം മഹായശാഃ ॥ 16 ॥
ഭഗീരഥോഽപി രാജര്ഷിഃ കൃത്വാ സലിലമുത്തമമ് ।
യഥാക്രമം യഥാന്യായം സാഗരാണാം മഹായശാഃ ॥ 17 ॥
കൃതോദകശ്ശുചീ രാജാ സ്വപുരം പ്രവിവേശ ഹ ।
സമൃദ്ധാര്ഥോ രഘുശ്രേഷ്ഠ സ്വരാജ്യം പ്രശശാസ ഹ ॥ 18 ॥
പ്രമുമോദ ഹ ലോകസ്തം നൃപമാസാദ്യ രാഘവ ।
നഷ്ടശോകസ്സമൃദ്ധാര്ഥോ ബഭൂവ വിഗതജ്വരഃ ॥ 19 ॥
ഏഷ തേ രാമ ഗംഗായാ വിസ്തരോഽഭിഹിതോ മയാ ।
സ്വസ്തി പ്രാപ്നുഹി ഭദ്രം തേ സംധ്യാകാലോഽതിവര്തതേ ॥ 20 ॥
ധന്യം യശസ്യമായുഷ്യം പുത്ര്യം സ്വര്ഗ്യമതീവ ച ।
യശ്ശ്രാവയതി വിപ്രേഷു ക്ഷത്രിയേഷ്വിതരേഷു ച ॥ 21 ॥
പ്രീയംതേ പിതരസ്തസ്യ പ്രീയംതേ ദൈവതാനി ച ।
ഇദമാഖ്യാനമവ്യഗ്രോ ഗംഗാവതരണം ശുഭമ് ॥ 22 ॥
യശ്ശൃണോതി ച കാകുത്സ്ഥ സർവാന് കാമാനവാപ്നുയാത് ।
സർവേ പാപാഃ പ്രണശ്യംതി ആയുഃ കീര്തിശ്ച വര്ധതേ ॥ 23 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ചതുശ്ചത്വാരിംശസ്സര്ഗഃ ॥
