ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଚତୁଶ୍ଚତ୍ଵାରିଂଶସ୍ସର୍ଗଃ ।
ସ ଗତ୍ଵା ସାଗରଂ ରାଜା ଗଂଗୟାଽନୁଗତସ୍ତଦା ।
ପ୍ରଵିଵେଶ ତଲଂ ଭୂମେର୍ୟତ୍ର ତେ ଭସ୍ମସାତ୍କୃତାଃ ॥ 1 ॥
ଭସ୍ମନ୍ୟଥାଽପ୍ଲୁତେ ରାମ ଗଂଗାୟାସ୍ସଲିଲେନ ଵୈ ।
ସର୍ଵଲୋକପ୍ରଭୁର୍ବ୍ରହ୍ମା ରାଜାନମିଦମବ୍ରଵୀତ୍ ॥ 2 ॥
ତାରିତା ନରଶାର୍ଦୂଲ ଦିଵଂ ୟାତାଶ୍ଚ ଦେଵଵତ୍ ।
ଷଷ୍ଠିଃ ପୁତ୍ରସହସ୍ରାଣି ସଗରସ୍ୟ ମହାତ୍ମନଃ ॥ 3 ॥
ସାଗରସ୍ୟ ଜଲଂ ଲୋକେ ୟାଵତ୍ସ୍ଥାସ୍ୟତି ପାର୍ଥିଵ ।
ସଗରସ୍ୟାତ୍ମଜାସ୍ତାଵତ୍ସ୍ଵର୍ଗେ ସ୍ଥାସ୍ୟଂତି ଦେଵଵତ୍ ॥ 4 ॥
ଇୟଂ ଚ ଦୁହିତା ଜ୍ୟେଷ୍ଠା ତଵ ଗଂଗା ଭଵିଷ୍ୟତି ।
ତ୍ଵତ୍କୃତେନ ଚ ନାମ୍ନାଽଥ ଲୋକେ ସ୍ଥାସ୍ୟତି ଵିଶ୍ରୁତା ॥ 5 ॥
ଗଂଗା ତ୍ରିପଥଗା ରାଜନ୍ ଦିଵ୍ୟା ଭାଗୀରଥୀତି ଚ ।
ତ୍ରୀନ୍ ପଥୋ ଭାଵୟଂତୀତି ତତସ୍ତ୍ରିପଥଗା ସ୍ମୃତା ॥ 6 ॥
ପିତାମହାନାଂ ସର୍ଵେଷାଂ ତ୍ଵମତ୍ର ମନୁଜାଧିପ ।
କୁରୁଷ୍ଵ ସଲିଲଂ ରାଜନ୍ ପ୍ରତିଜ୍ଞାମପଵର୍ଜୟ ॥ 7 ॥
ପୂର୍ଵକେଣ ହି ତେ ରାଜଂସ୍ତେନାତିୟଶସା ତଦା ।
ଧର୍ମିଣାଂ ପ୍ରଵରେଣାପି ନୈଷ ପ୍ରାପ୍ତୋ ମନୋରଥଃ ॥ 8 ॥
ତଥୈଵାଂଶୁମତା ତାତ ଲୋକେଽପ୍ରତିମତେଜସା ।
ଗଂଗାଂ ପ୍ରାର୍ଥୟତାନେତୁଂ ପ୍ରତିଜ୍ଞା ନାପଵର୍ଜିତା ॥ 9 ॥
ରାଜର୍ଷିଣା ଗୁଣଵତା ମହର୍ଷିସମତେଜସା ।
ମତ୍ତୁଲ୍ୟତପସା ଚୈଵ କ୍ଷତ୍ରଧର୍ମସ୍ଥିତେନ ଚ ॥ 10 ॥
ଦିଲୀପେନ ମହାଭାଗ ତଵ ପିତ୍ରାଽତି ତେଜସା ।
ପୁନର୍ନ ଶଂକିତାଽନେତୁଂ ଗଂଗାଂ ପ୍ରାର୍ଥୟତାଽନଘ ॥ 11 ॥
ସା ତ୍ଵୟା ସମନୁକ୍ରାଂତା ପ୍ରତିଜ୍ଞା ପୁରୁଷର୍ଷଭ ।
ପ୍ରାପ୍ତୋଽସି ପରମଂ ଲୋକେ ୟଶଃ ପରମସମ୍ମତମ୍ ॥ 12 ॥
ୟଚ୍ଚ ଗଂଗାଵତରଣଂ ତ୍ଵୟା କୃତମରିଂଦମ ।
ଅନେନ ଚ ଭଵାନ୍ ପ୍ରାପ୍ତୋ ଧର୍ମସ୍ୟାୟତନଂ ମହତ୍ ॥ 13 ॥
ପ୍ଲାଵୟସ୍ଵ ତ୍ଵମାତ୍ମାନଂ ନରୋତ୍ତମ ସଦୋଚିତେ ।
ସଲିଲେ ପୁରୁଷଵ୍ୟାଘ୍ର ଶୁଚିଃ ପୁଣ୍ୟଫଲୋ ଭଵ ॥ 14 ॥
ପିତାମହାନାଂ ସର୍ଵେଷାଂ କୁରୁଷ୍ଵ ସଲିଲକ୍ରିୟାମ୍ ।
ସ୍ଵସ୍ତି ତେଽସ୍ତୁ ଗମିଷ୍ୟାମି ସ୍ଵଂ ଲୋକଂ ଗମ୍ୟତାଂ ନୃପ ॥ 15 ॥
ଇତ୍ୟେଵମୁକ୍ତ୍ଵା ଦେଵେଶଃ ସର୍ଵଲୋକପିତାମହଃ ।
ୟଥାଽଽଗତଂ ତଥାଽଗଚ୍ଛତ୍ ଦେଵଲୋକଂ ମହାୟଶାଃ ॥ 16 ॥
ଭଗୀରଥୋଽପି ରାଜର୍ଷିଃ କୃତ୍ଵା ସଲିଲମୁତ୍ତମମ୍ ।
ୟଥାକ୍ରମଂ ୟଥାନ୍ୟାୟଂ ସାଗରାଣାଂ ମହାୟଶାଃ ॥ 17 ॥
କୃତୋଦକଶ୍ଶୁଚୀ ରାଜା ସ୍ଵପୁରଂ ପ୍ରଵିଵେଶ ହ ।
ସମୃଦ୍ଧାର୍ଥୋ ରଘୁଶ୍ରେଷ୍ଠ ସ୍ଵରାଜ୍ୟଂ ପ୍ରଶଶାସ ହ ॥ 18 ॥
ପ୍ରମୁମୋଦ ହ ଲୋକସ୍ତଂ ନୃପମାସାଦ୍ୟ ରାଘଵ ।
ନଷ୍ଟଶୋକସ୍ସମୃଦ୍ଧାର୍ଥୋ ବଭୂଵ ଵିଗତଜ୍ଵରଃ ॥ 19 ॥
ଏଷ ତେ ରାମ ଗଂଗାୟା ଵିସ୍ତରୋଽଭିହିତୋ ମୟା ।
ସ୍ଵସ୍ତି ପ୍ରାପ୍ନୁହି ଭଦ୍ରଂ ତେ ସଂଧ୍ୟାକାଲୋଽତିଵର୍ତତେ ॥ 20 ॥
ଧନ୍ୟଂ ୟଶସ୍ୟମାୟୁଷ୍ୟଂ ପୁତ୍ର୍ୟଂ ସ୍ଵର୍ଗ୍ୟମତୀଵ ଚ ।
ୟଶ୍ଶ୍ରାଵୟତି ଵିପ୍ରେଷୁ କ୍ଷତ୍ରିୟେଷ୍ଵିତରେଷୁ ଚ ॥ 21 ॥
ପ୍ରୀୟଂତେ ପିତରସ୍ତସ୍ୟ ପ୍ରୀୟଂତେ ଦୈଵତାନି ଚ ।
ଇଦମାଖ୍ୟାନମଵ୍ୟଗ୍ରୋ ଗଂଗାଵତରଣଂ ଶୁଭମ୍ ॥ 22 ॥
ୟଶ୍ଶୃଣୋତି ଚ କାକୁତ୍ସ୍ଥ ସର୍ଵାନ୍ କାମାନଵାପ୍ନୁୟାତ୍ ।
ସର୍ଵେ ପାପାଃ ପ୍ରଣଶ୍ୟଂତି ଆୟୁଃ କୀର୍ତିଶ୍ଚ ଵର୍ଧତେ ॥ 23 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଚତୁଶ୍ଚତ୍ଵାରିଂଶସ୍ସର୍ଗଃ ॥
