શ્રીમદ્વાલ્મીકીય રામાયણે બાલકાંડમ્ ।
અથ ચતુશ્ચત્વારિંશસ્સર્ગઃ ।
સ ગત્વા સાગરં રાજા ગંગયાઽનુગતસ્તદા ।
પ્રવિવેશ તલં ભૂમેર્યત્ર તે ભસ્મસાત્કૃતાઃ ॥ 1 ॥
ભસ્મન્યથાઽપ્લુતે રામ ગંગાયાસ્સલિલેન વૈ ।
સર્વલોકપ્રભુર્બ્રહ્મા રાજાનમિદમબ્રવીત્ ॥ 2 ॥
તારિતા નરશાર્દૂલ દિવં યાતાશ્ચ દેવવત્ ।
ષષ્ઠિઃ પુત્રસહસ્રાણિ સગરસ્ય મહાત્મનઃ ॥ 3 ॥
સાગરસ્ય જલં લોકે યાવત્સ્થાસ્યતિ પાર્થિવ ।
સગરસ્યાત્મજાસ્તાવત્સ્વર્ગે સ્થાસ્યંતિ દેવવત્ ॥ 4 ॥
ઇયં ચ દુહિતા જ્યેષ્ઠા તવ ગંગા ભવિષ્યતિ ।
ત્વત્કૃતેન ચ નામ્નાઽથ લોકે સ્થાસ્યતિ વિશ્રુતા ॥ 5 ॥
ગંગા ત્રિપથગા રાજન્ દિવ્યા ભાગીરથીતિ ચ ।
ત્રીન્ પથો ભાવયંતીતિ તતસ્ત્રિપથગા સ્મૃતા ॥ 6 ॥
પિતામહાનાં સર્વેષાં ત્વમત્ર મનુજાધિપ ।
કુરુષ્વ સલિલં રાજન્ પ્રતિજ્ઞામપવર્જય ॥ 7 ॥
પૂર્વકેણ હિ તે રાજંસ્તેનાતિયશસા તદા ।
ધર્મિણાં પ્રવરેણાપિ નૈષ પ્રાપ્તો મનોરથઃ ॥ 8 ॥
તથૈવાંશુમતા તાત લોકેઽપ્રતિમતેજસા ।
ગંગાં પ્રાર્થયતાનેતું પ્રતિજ્ઞા નાપવર્જિતા ॥ 9 ॥
રાજર્ષિણા ગુણવતા મહર્ષિસમતેજસા ।
મત્તુલ્યતપસા ચૈવ ક્ષત્રધર્મસ્થિતેન ચ ॥ 10 ॥
દિલીપેન મહાભાગ તવ પિત્રાઽતિ તેજસા ।
પુનર્ન શંકિતાઽનેતું ગંગાં પ્રાર્થયતાઽનઘ ॥ 11 ॥
સા ત્વયા સમનુક્રાંતા પ્રતિજ્ઞા પુરુષર્ષભ ।
પ્રાપ્તોઽસિ પરમં લોકે યશઃ પરમસમ્મતમ્ ॥ 12 ॥
યચ્ચ ગંગાવતરણં ત્વયા કૃતમરિંદમ ।
અનેન ચ ભવાન્ પ્રાપ્તો ધર્મસ્યાયતનં મહત્ ॥ 13 ॥
પ્લાવયસ્વ ત્વમાત્માનં નરોત્તમ સદોચિતે ।
સલિલે પુરુષવ્યાઘ્ર શુચિઃ પુણ્યફલો ભવ ॥ 14 ॥
પિતામહાનાં સર્વેષાં કુરુષ્વ સલિલક્રિયામ્ ।
સ્વસ્તિ તેઽસ્તુ ગમિષ્યામિ સ્વં લોકં ગમ્યતાં નૃપ ॥ 15 ॥
ઇત્યેવમુક્ત્વા દેવેશઃ સર્વલોકપિતામહઃ ।
યથાઽઽગતં તથાઽગચ્છત્ દેવલોકં મહાયશાઃ ॥ 16 ॥
ભગીરથોઽપિ રાજર્ષિઃ કૃત્વા સલિલમુત્તમમ્ ।
યથાક્રમં યથાન્યાયં સાગરાણાં મહાયશાઃ ॥ 17 ॥
કૃતોદકશ્શુચી રાજા સ્વપુરં પ્રવિવેશ હ ।
સમૃદ્ધાર્થો રઘુશ્રેષ્ઠ સ્વરાજ્યં પ્રશશાસ હ ॥ 18 ॥
પ્રમુમોદ હ લોકસ્તં નૃપમાસાદ્ય રાઘવ ।
નષ્ટશોકસ્સમૃદ્ધાર્થો બભૂવ વિગતજ્વરઃ ॥ 19 ॥
એષ તે રામ ગંગાયા વિસ્તરોઽભિહિતો મયા ।
સ્વસ્તિ પ્રાપ્નુહિ ભદ્રં તે સંધ્યાકાલોઽતિવર્તતે ॥ 20 ॥
ધન્યં યશસ્યમાયુષ્યં પુત્ર્યં સ્વર્ગ્યમતીવ ચ ।
યશ્શ્રાવયતિ વિપ્રેષુ ક્ષત્રિયેષ્વિતરેષુ ચ ॥ 21 ॥
પ્રીયંતે પિતરસ્તસ્ય પ્રીયંતે દૈવતાનિ ચ ।
ઇદમાખ્યાનમવ્યગ્રો ગંગાવતરણં શુભમ્ ॥ 22 ॥
યશ્શૃણોતિ ચ કાકુત્સ્થ સર્વાન્ કામાનવાપ્નુયાત્ ।
સર્વે પાપાઃ પ્રણશ્યંતિ આયુઃ કીર્તિશ્ચ વર્ધતે ॥ 23 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે ચતુશ્ચત્વારિંશસ્સર્ગઃ ॥
