śrīmadvālmīkīya rāmāyaṇē bālakāṇḍam ।
atha chatuśchatvāriṃśassargaḥ ।
sa gatvā sāgaraṃ rājā gaṅgayā'nugatastadā ।
pravivēśa talaṃ bhūmēryatra tē bhasmasātkṛtāḥ ॥ 1 ॥
bhasmanyathā'plutē rāma gaṅgāyāssalilēna vai ।
sarvalōkaprabhurbrahmā rājānamidamabravīt ॥ 2 ॥
tāritā naraśārdūla divaṃ yātāścha dēvavat ।
ṣaṣṭhiḥ putrasahasrāṇi sagarasya mahātmanaḥ ॥ 3 ॥
sāgarasya jalaṃ lōkē yāvatsthāsyati pārthiva ।
sagarasyātmajāstāvatsvargē sthāsyanti dēvavat ॥ 4 ॥
iyaṃ cha duhitā jyēṣṭhā tava gaṅgā bhaviṣyati ।
tvatkṛtēna cha nāmnā'tha lōkē sthāsyati viśrutā ॥ 5 ॥
gaṅgā tripathagā rājan divyā bhāgīrathīti cha ।
trīn pathō bhāvayantīti tatastripathagā smṛtā ॥ 6 ॥
pitāmahānāṃ sarvēṣāṃ tvamatra manujādhipa ।
kuruṣva salilaṃ rājan pratijñāmapavarjaya ॥ 7 ॥
pūrvakēṇa hi tē rājaṃstēnātiyaśasā tadā ।
dharmiṇāṃ pravarēṇāpi naiṣa prāptō manōrathaḥ ॥ 8 ॥
tathaivāṃśumatā tāta lōkē'pratimatējasā ।
gaṅgāṃ prārthayatānētuṃ pratijñā nāpavarjitā ॥ 9 ॥
rājarṣiṇā guṇavatā maharṣisamatējasā ।
mattulyatapasā chaiva kṣatradharmasthitēna cha ॥ 10 ॥
dilīpēna mahābhāga tava pitrā'ti tējasā ।
punarna śaṅkitā'nētuṃ gaṅgāṃ prārthayatā'nagha ॥ 11 ॥
sā tvayā samanukrāntā pratijñā puruṣarṣabha ।
prāptō'si paramaṃ lōkē yaśaḥ paramasammatam ॥ 12 ॥
yachcha gaṅgāvataraṇaṃ tvayā kṛtamarindama ।
anēna cha bhavān prāptō dharmasyāyatanaṃ mahat ॥ 13 ॥
plāvayasva tvamātmānaṃ narōttama sadōchitē ।
salilē puruṣavyāghra śuchiḥ puṇyaphalō bhava ॥ 14 ॥
pitāmahānāṃ sarvēṣāṃ kuruṣva salilakriyām ।
svasti tē'stu gamiṣyāmi svaṃ lōkaṃ gamyatāṃ nṛpa ॥ 15 ॥
ityēvamuktvā dēvēśaḥ sarvalōkapitāmahaḥ ।
yathā''gataṃ tathā'gachChat dēvalōkaṃ mahāyaśāḥ ॥ 16 ॥
bhagīrathō'pi rājarṣiḥ kṛtvā salilamuttamam ।
yathākramaṃ yathānyāyaṃ sāgarāṇāṃ mahāyaśāḥ ॥ 17 ॥
kṛtōdakaśśuchī rājā svapuraṃ pravivēśa ha ।
samṛddhārthō raghuśrēṣṭha svarājyaṃ praśaśāsa ha ॥ 18 ॥
pramumōda ha lōkastaṃ nṛpamāsādya rāghava ।
naṣṭaśōkassamṛddhārthō babhūva vigatajvaraḥ ॥ 19 ॥
ēṣa tē rāma gaṅgāyā vistarō'bhihitō mayā ।
svasti prāpnuhi bhadraṃ tē sandhyākālō'tivartatē ॥ 20 ॥
dhanyaṃ yaśasyamāyuṣyaṃ putryaṃ svargyamatīva cha ।
yaśśrāvayati viprēṣu kṣatriyēṣvitarēṣu cha ॥ 21 ॥
prīyantē pitarastasya prīyantē daivatāni cha ।
idamākhyānamavyagrō gaṅgāvataraṇaṃ śubham ॥ 22 ॥
yaśśṛṇōti cha kākutstha sarvān kāmānavāpnuyāt ।
sarvē pāpāḥ praṇaśyanti āyuḥ kīrtiścha vardhatē ॥ 23 ॥
ityārṣē śrīmadrāmāyaṇē vālmīkīya ādikāvyē bālakāṇḍē chatuśchatvāriṃśassargaḥ ॥
