𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌶𑍍𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌸 𑌗𑌤𑍍𑌵𑌾 𑌸𑌾𑌗𑌰𑌂 𑌰𑌾𑌜𑌾 𑌗𑌂𑌗𑌯𑌾𑌽𑌨𑍁𑌗𑌤𑌸𑍍𑌤𑌦𑌾 ।
𑌪𑍍𑌰𑌵𑌿𑌵𑍇𑌶 𑌤𑌲𑌂 𑌭𑍂𑌮𑍇𑌰𑍍𑌯𑌤𑍍𑌰 𑌤𑍇 𑌭𑌸𑍍𑌮𑌸𑌾𑌤𑍍𑌕𑍃𑌤𑌾𑌃 ॥ 1 ॥
𑌭𑌸𑍍𑌮𑌨𑍍𑌯𑌥𑌾𑌽𑌪𑍍𑌲𑍁𑌤𑍇 𑌰𑌾𑌮 𑌗𑌂𑌗𑌾𑌯𑌾𑌸𑍍𑌸𑌲𑌿𑌲𑍇𑌨 𑌵𑍈 ।
𑌸𑌰𑍍𑌵𑌲𑍋𑌕𑌪𑍍𑌰𑌭𑍁𑌰𑍍𑌬𑍍𑌰𑌹𑍍𑌮𑌾 𑌰𑌾𑌜𑌾𑌨𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 2 ॥
𑌤𑌾𑌰𑌿𑌤𑌾 𑌨𑌰𑌶𑌾𑌰𑍍𑌦𑍂𑌲 𑌦𑌿𑌵𑌂 𑌯𑌾𑌤𑌾𑌶𑍍𑌚 𑌦𑍇𑌵𑌵𑌤𑍍 ।
𑌷𑌷𑍍𑌠𑌿𑌃 𑌪𑍁𑌤𑍍𑌰𑌸𑌹𑌸𑍍𑌰𑌾𑌣𑌿 𑌸𑌗𑌰𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 3 ॥
𑌸𑌾𑌗𑌰𑌸𑍍𑌯 𑌜𑌲𑌂 𑌲𑍋𑌕𑍇 𑌯𑌾𑌵𑌤𑍍𑌸𑍍𑌥𑌾𑌸𑍍𑌯𑌤𑌿 𑌪𑌾𑌰𑍍𑌥𑌿𑌵 ।
𑌸𑌗𑌰𑌸𑍍𑌯𑌾𑌤𑍍𑌮𑌜𑌾𑌸𑍍𑌤𑌾𑌵𑌤𑍍𑌸𑍍𑌵𑌰𑍍𑌗𑍇 𑌸𑍍𑌥𑌾𑌸𑍍𑌯𑌂𑌤𑌿 𑌦𑍇𑌵𑌵𑌤𑍍 ॥ 4 ॥
𑌇𑌯𑌂 𑌚 𑌦𑍁𑌹𑌿𑌤𑌾 𑌜𑍍𑌯𑍇𑌷𑍍𑌠𑌾 𑌤𑌵 𑌗𑌂𑌗𑌾 𑌭𑌵𑌿𑌷𑍍𑌯𑌤𑌿 ।
𑌤𑍍𑌵𑌤𑍍𑌕𑍃𑌤𑍇𑌨 𑌚 𑌨𑌾𑌮𑍍𑌨𑌾𑌽𑌥 𑌲𑍋𑌕𑍇 𑌸𑍍𑌥𑌾𑌸𑍍𑌯𑌤𑌿 𑌵𑌿𑌶𑍍𑌰𑍁𑌤𑌾 ॥ 5 ॥
𑌗𑌂𑌗𑌾 𑌤𑍍𑌰𑌿𑌪𑌥𑌗𑌾 𑌰𑌾𑌜𑌨𑍍 𑌦𑌿𑌵𑍍𑌯𑌾 𑌭𑌾𑌗𑍀𑌰𑌥𑍀𑌤𑌿 𑌚 ।
𑌤𑍍𑌰𑍀𑌨𑍍 𑌪𑌥𑍋 𑌭𑌾𑌵𑌯𑌂𑌤𑍀𑌤𑌿 𑌤𑌤𑌸𑍍𑌤𑍍𑌰𑌿𑌪𑌥𑌗𑌾 𑌸𑍍𑌮𑍃𑌤𑌾 ॥ 6 ॥
𑌪𑌿𑌤𑌾𑌮𑌹𑌾𑌨𑌾𑌂 𑌸𑌰𑍍𑌵𑍇𑌷𑌾𑌂 𑌤𑍍𑌵𑌮𑌤𑍍𑌰 𑌮𑌨𑍁𑌜𑌾𑌧𑌿𑌪 ।
𑌕𑍁𑌰𑍁𑌷𑍍𑌵 𑌸𑌲𑌿𑌲𑌂 𑌰𑌾𑌜𑌨𑍍 𑌪𑍍𑌰𑌤𑌿𑌜𑍍𑌞𑌾𑌮𑌪𑌵𑌰𑍍𑌜𑌯 ॥ ॥
𑌪𑍂𑌰𑍍𑌵𑌕𑍇𑌣 𑌹𑌿 𑌤𑍇 𑌰𑌾𑌜𑌂𑌸𑍍𑌤𑍇𑌨𑌾𑌤𑌿𑌯𑌶𑌸𑌾 𑌤𑌦𑌾 ।
𑌧𑌰𑍍𑌮𑌿𑌣𑌾𑌂 𑌪𑍍𑌰𑌵𑌰𑍇𑌣𑌾𑌪𑌿 𑌨𑍈𑌷 𑌪𑍍𑌰𑌾𑌪𑍍𑌤𑍋 𑌮𑌨𑍋𑌰𑌥𑌃 ॥ ॥
𑌤𑌥𑍈𑌵𑌾𑌂𑌶𑍁𑌮𑌤𑌾 𑌤𑌾𑌤 𑌲𑍋𑌕𑍇𑌽𑌪𑍍𑌰𑌤𑌿𑌮𑌤𑍇𑌜𑌸𑌾 ।
𑌗𑌂𑌗𑌾𑌂 𑌪𑍍𑌰𑌾𑌰𑍍𑌥𑌯𑌤𑌾𑌨𑍇𑌤𑍁𑌂 𑌪𑍍𑌰𑌤𑌿𑌜𑍍𑌞𑌾 𑌨𑌾𑌪𑌵𑌰𑍍𑌜𑌿𑌤𑌾 ॥ ॥
𑌰𑌾𑌜𑌰𑍍𑌷𑌿𑌣𑌾 𑌗𑍁𑌣𑌵𑌤𑌾 𑌮𑌹𑌰𑍍𑌷𑌿𑌸𑌮𑌤𑍇𑌜𑌸𑌾 ।
𑌮𑌤𑍍𑌤𑍁𑌲𑍍𑌯𑌤𑌪𑌸𑌾 𑌚𑍈𑌵 𑌕𑍍𑌷𑌤𑍍𑌰𑌧𑌰𑍍𑌮𑌸𑍍𑌥𑌿𑌤𑍇𑌨 𑌚 ॥ 10 ॥
𑌦𑌿𑌲𑍀𑌪𑍇𑌨 𑌮𑌹𑌾𑌭𑌾𑌗 𑌤𑌵 𑌪𑌿𑌤𑍍𑌰𑌾𑌽𑌤𑌿 𑌤𑍇𑌜𑌸𑌾 ।
𑌪𑍁𑌨𑌰𑍍𑌨 𑌶𑌂𑌕𑌿𑌤𑌾𑌽𑌨𑍇𑌤𑍁𑌂 𑌗𑌂𑌗𑌾𑌂 𑌪𑍍𑌰𑌾𑌰𑍍𑌥𑌯𑌤𑌾𑌽𑌨𑌘 ॥ 11 ॥
𑌸𑌾 𑌤𑍍𑌵𑌯𑌾 𑌸𑌮𑌨𑍁𑌕𑍍𑌰𑌾𑌂𑌤𑌾 𑌪𑍍𑌰𑌤𑌿𑌜𑍍𑌞𑌾 𑌪𑍁𑌰𑍁𑌷𑌰𑍍𑌷𑌭 ।
𑌪𑍍𑌰𑌾𑌪𑍍𑌤𑍋𑌽𑌸𑌿 𑌪𑌰𑌮𑌂 𑌲𑍋𑌕𑍇 𑌯𑌶𑌃 𑌪𑌰𑌮𑌸𑌮𑍍𑌮𑌤𑌮𑍍 ॥ 12 ॥
𑌯𑌚𑍍𑌚 𑌗𑌂𑌗𑌾𑌵𑌤𑌰𑌣𑌂 𑌤𑍍𑌵𑌯𑌾 𑌕𑍃𑌤𑌮𑌰𑌿𑌂𑌦𑌮 ।
𑌅𑌨𑍇𑌨 𑌚 𑌭𑌵𑌾𑌨𑍍 𑌪𑍍𑌰𑌾𑌪𑍍𑌤𑍋 𑌧𑌰𑍍𑌮𑌸𑍍𑌯𑌾𑌯𑌤𑌨𑌂 𑌮𑌹𑌤𑍍 ॥ 13 ॥
𑌪𑍍𑌲𑌾𑌵𑌯𑌸𑍍𑌵 𑌤𑍍𑌵𑌮𑌾𑌤𑍍𑌮𑌾𑌨𑌂 𑌨𑌰𑍋𑌤𑍍𑌤𑌮 𑌸𑌦𑍋𑌚𑌿𑌤𑍇 ।
𑌸𑌲𑌿𑌲𑍇 𑌪𑍁𑌰𑍁𑌷𑌵𑍍𑌯𑌾𑌘𑍍𑌰 𑌶𑍁𑌚𑌿𑌃 𑌪𑍁𑌣𑍍𑌯𑌫𑌲𑍋 𑌭𑌵 ॥ 14 ॥
𑌪𑌿𑌤𑌾𑌮𑌹𑌾𑌨𑌾𑌂 𑌸𑌰𑍍𑌵𑍇𑌷𑌾𑌂 𑌕𑍁𑌰𑍁𑌷𑍍𑌵 𑌸𑌲𑌿𑌲𑌕𑍍𑌰𑌿𑌯𑌾𑌮𑍍 ।
𑌸𑍍𑌵𑌸𑍍𑌤𑌿 𑌤𑍇𑌽𑌸𑍍𑌤𑍁 𑌗𑌮𑌿𑌷𑍍𑌯𑌾𑌮𑌿 𑌸𑍍𑌵𑌂 𑌲𑍋𑌕𑌂 𑌗𑌮𑍍𑌯𑌤𑌾𑌂 𑌨𑍃𑌪 ॥ 15 ॥
𑌇𑌤𑍍𑌯𑍇𑌵𑌮𑍁𑌕𑍍𑌤𑍍𑌵𑌾 𑌦𑍇𑌵𑍇𑌶𑌃 𑌸𑌰𑍍𑌵𑌲𑍋𑌕𑌪𑌿𑌤𑌾𑌮𑌹𑌃 ।
𑌯𑌥𑌾𑌽𑌽𑌗𑌤𑌂 𑌤𑌥𑌾𑌽𑌗𑌚𑍍𑌛𑌤𑍍 𑌦𑍇𑌵𑌲𑍋𑌕𑌂 𑌮𑌹𑌾𑌯𑌶𑌾𑌃 ॥ 16 ॥
𑌭𑌗𑍀𑌰𑌥𑍋𑌽𑌪𑌿 𑌰𑌾𑌜𑌰𑍍𑌷𑌿𑌃 𑌕𑍃𑌤𑍍𑌵𑌾 𑌸𑌲𑌿𑌲𑌮𑍁𑌤𑍍𑌤𑌮𑌮𑍍 ।
𑌯𑌥𑌾𑌕𑍍𑌰𑌮𑌂 𑌯𑌥𑌾𑌨𑍍𑌯𑌾𑌯𑌂 𑌸𑌾𑌗𑌰𑌾𑌣𑌾𑌂 𑌮𑌹𑌾𑌯𑌶𑌾𑌃 ॥ 1 ॥
𑌕𑍃𑌤𑍋𑌦𑌕𑌶𑍍𑌶𑍁𑌚𑍀 𑌰𑌾𑌜𑌾 𑌸𑍍𑌵𑌪𑍁𑌰𑌂 𑌪𑍍𑌰𑌵𑌿𑌵𑍇𑌶 𑌹 ।
𑌸𑌮𑍃𑌦𑍍𑌧𑌾𑌰𑍍𑌥𑍋 𑌰𑌘𑍁𑌶𑍍𑌰𑍇𑌷𑍍𑌠 𑌸𑍍𑌵𑌰𑌾𑌜𑍍𑌯𑌂 𑌪𑍍𑌰𑌶𑌶𑌾𑌸 𑌹 ॥ 1 ॥
𑌪𑍍𑌰𑌮𑍁𑌮𑍋𑌦 𑌹 𑌲𑍋𑌕𑌸𑍍𑌤𑌂 𑌨𑍃𑌪𑌮𑌾𑌸𑌾𑌦𑍍𑌯 𑌰𑌾𑌘𑌵 ।
𑌨𑌷𑍍𑌟𑌶𑍋𑌕𑌸𑍍𑌸𑌮𑍃𑌦𑍍𑌧𑌾𑌰𑍍𑌥𑍋 𑌬𑌭𑍂𑌵 𑌵𑌿𑌗𑌤𑌜𑍍𑌵𑌰𑌃 ॥ 1 ॥
𑌏𑌷 𑌤𑍇 𑌰𑌾𑌮 𑌗𑌂𑌗𑌾𑌯𑌾 𑌵𑌿𑌸𑍍𑌤𑌰𑍋𑌽𑌭𑌿𑌹𑌿𑌤𑍋 𑌮𑌯𑌾 ।
𑌸𑍍𑌵𑌸𑍍𑌤𑌿 𑌪𑍍𑌰𑌾𑌪𑍍𑌨𑍁𑌹𑌿 𑌭𑌦𑍍𑌰𑌂 𑌤𑍇 𑌸𑌂𑌧𑍍𑌯𑌾𑌕𑌾𑌲𑍋𑌽𑌤𑌿𑌵𑌰𑍍𑌤𑌤𑍇 ॥ 20 ॥
𑌧𑌨𑍍𑌯𑌂 𑌯𑌶𑌸𑍍𑌯𑌮𑌾𑌯𑍁𑌷𑍍𑌯𑌂 𑌪𑍁𑌤𑍍𑌰𑍍𑌯𑌂 𑌸𑍍𑌵𑌰𑍍𑌗𑍍𑌯𑌮𑌤𑍀𑌵 𑌚 ।
𑌯𑌶𑍍𑌶𑍍𑌰𑌾𑌵𑌯𑌤𑌿 𑌵𑌿𑌪𑍍𑌰𑍇𑌷𑍁 𑌕𑍍𑌷𑌤𑍍𑌰𑌿𑌯𑍇𑌷𑍍𑌵𑌿𑌤𑌰𑍇𑌷𑍁 𑌚 ॥ 21 ॥
𑌪𑍍𑌰𑍀𑌯𑌂𑌤𑍇 𑌪𑌿𑌤𑌰𑌸𑍍𑌤𑌸𑍍𑌯 𑌪𑍍𑌰𑍀𑌯𑌂𑌤𑍇 𑌦𑍈𑌵𑌤𑌾𑌨𑌿 𑌚 ।
𑌇𑌦𑌮𑌾𑌖𑍍𑌯𑌾𑌨𑌮𑌵𑍍𑌯𑌗𑍍𑌰𑍋 𑌗𑌂𑌗𑌾𑌵𑌤𑌰𑌣𑌂 𑌶𑍁𑌭𑌮𑍍 ॥ 22 ॥
𑌯𑌶𑍍𑌶𑍃𑌣𑍋𑌤𑌿 𑌚 𑌕𑌾𑌕𑍁𑌤𑍍𑌸𑍍𑌥 𑌸𑌰𑍍𑌵𑌾𑌨𑍍 𑌕𑌾𑌮𑌾𑌨𑌵𑌾𑌪𑍍𑌨𑍁𑌯𑌾𑌤𑍍 ।
𑌸𑌰𑍍𑌵𑍇 𑌪𑌾𑌪𑌾𑌃 𑌪𑍍𑌰𑌣𑌶𑍍𑌯𑌂𑌤𑌿 𑌆𑌯𑍁𑌃 𑌕𑍀𑌰𑍍𑌤𑌿𑌶𑍍𑌚 𑌵𑌰𑍍𑌧𑌤𑍇 ॥ 23 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌚𑌤𑍁𑌶𑍍𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
