শ্রীমদ্বাল্মীকীয় রামাযণে বালকাংডম্ ।
অথ চতুশ্চত্বারিংশস্সর্গঃ ।
স গত্বা সাগরং রাজা গংগয়াঽনুগতস্তদা ।
প্রবিবেশ তলং ভূমের্যত্র তে ভস্মসাত্কৃতাঃ ॥ 1 ॥
ভস্মন্যথাঽপ্লুতে রাম গংগায়াস্সলিলেন বৈ ।
সর্বলোকপ্রভুর্ব্রহ্মা রাজানমিদমব্রবীত্ ॥ 2 ॥
তারিতা নরশার্দূল দিবং যাতাশ্চ দেববত্ ।
ষষ্ঠিঃ পুত্রসহস্রাণি সগরস্য় মহাত্মনঃ ॥ 3 ॥
সাগরস্য় জলং লোকে যাবত্স্থাস্যতি পার্থিব ।
সগরস্য়াত্মজাস্তাবত্স্বর্গে স্থাস্য়ংতি দেববত্ ॥ 4 ॥
ইয়ং চ দুহিতা জ্য়েষ্ঠা তব গংগা ভবিষ্যতি ।
ত্বত্কৃতেন চ নাম্নাঽথ লোকে স্থাস্যতি বিশ্রুতা ॥ 5 ॥
গংগা ত্রিপথগা রাজন্ দিব্য়া ভাগীরথীতি চ ।
ত্রীন্ পথো ভাবয়ংতীতি ততস্ত্রিপথগা স্মৃতা ॥ 6 ॥
পিতামহানাং সর্বেষাং ত্বমত্র মনুজাধিপ ।
কুরুষ্ব সলিলং রাজন্ প্রতিজ্ঞামপবর্জয় ॥ 7 ॥
পূর্বকেণ হি তে রাজংস্তেনাতিযশসা তদা ।
ধর্মিণাং প্রবরেণাপি নৈষ প্রাপ্তো মনোরথঃ ॥ 8 ॥
তথৈবাংশুমতা তাত লোকেঽপ্রতিমতেজসা ।
গংগাং প্রার্থযতানেতুং প্রতিজ্ঞা নাপবর্জিতা ॥ 9 ॥
রাজর্ষিণা গুণবতা মহর্ষিসমতেজসা ।
মত্তুল্যতপসা চৈব ক্ষত্রধর্মস্থিতেন চ ॥ 10 ॥
দিলীপেন মহাভাগ তব পিত্রাঽতি তেজসা ।
পুনর্ন শংকিতাঽনেতুং গংগাং প্রার্থযতাঽনঘ ॥ 11 ॥
সা ত্বয়া সমনুক্রাংতা প্রতিজ্ঞা পুরুষর্ষভ ।
প্রাপ্তোঽসি পরমং লোকে যশঃ পরমসম্মতম্ ॥ 12 ॥
যচ্চ গংগাবতরণং ত্বয়া কৃতমরিংদম ।
অনেন চ ভবান্ প্রাপ্তো ধর্মস্য়াযতনং মহত্ ॥ 13 ॥
প্লাবযস্ব ত্বমাত্মানং নরোত্তম সদোচিতে ।
সলিলে পুরুষব্য়াঘ্র শুচিঃ পুণ্যফলো ভব ॥ 14 ॥
পিতামহানাং সর্বেষাং কুরুষ্ব সলিলক্রিয়াম্ ।
স্বস্তি তেঽস্তু গমিষ্য়ামি স্বং লোকং গম্যতাং নৃপ ॥ 15 ॥
ইত্য়েবমুক্ত্বা দেবেশঃ সর্বলোকপিতামহঃ ।
যথাঽঽগতং তথাঽগচ্ছত্ দেবলোকং মহাযশাঃ ॥ 16 ॥
ভগীরথোঽপি রাজর্ষিঃ কৃত্বা সলিলমুত্তমম্ ।
যথাক্রমং যথান্য়ায়ং সাগরাণাং মহাযশাঃ ॥ 17 ॥
কৃতোদকশ্শুচী রাজা স্বপুরং প্রবিবেশ হ ।
সমৃদ্ধার্থো রঘুশ্রেষ্ঠ স্বরাজ্য়ং প্রশশাস হ ॥ 18 ॥
প্রমুমোদ হ লোকস্তং নৃপমাসাদ্য় রাঘব ।
নষ্টশোকস্সমৃদ্ধার্থো বভূব বিগতজ্বরঃ ॥ 19 ॥
এষ তে রাম গংগায়া বিস্তরোঽভিহিতো ময়া ।
স্বস্তি প্রাপ্নুহি ভদ্রং তে সংধ্য়াকালোঽতিবর্ততে ॥ 20 ॥
ধন্য়ং যশস্যমায়ুষ্য়ং পুত্র্য়ং স্বর্গ্যমতীব চ ।
যশ্শ্রাবযতি বিপ্রেষু ক্ষত্রিয়েষ্বিতরেষু চ ॥ 21 ॥
প্রীয়ংতে পিতরস্তস্য় প্রীয়ংতে দৈবতানি চ ।
ইদমাখ্য়ানমব্যগ্রো গংগাবতরণং শুভম্ ॥ 22 ॥
যশ্শৃণোতি চ কাকুত্স্থ সর্বান্ কামানবাপ্নুয়াত্ ।
সর্বে পাপাঃ প্রণশ্য়ংতি আয়ুঃ কীর্তিশ্চ বর্ধতে ॥ 23 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে চতুশ্চত্বারিংশস্সর্গঃ ॥
