śrīmadvālmīkīya rāmāyaṇē araṇyakāṇḍam ।
atha dvādaśassargaḥ ।
sapraviśyā'śramapadaṃ lakṣmaṇō rāghavānujaḥ ।
agastyaśiṣyamāsādya vākyamētaduvācha ha ॥ 1 ॥
rājā daśarathō nāma jyēṣṭhastasya sutō balī ।
rāmaḥ prāptō muniṃ draṣṭuṃ bhāryayā saha sītayā ॥ 2 ॥
lakṣmaṇō nāma tasyāhaṃ bhrātā tvavarajō hitaḥ ।
anukūlaścha bhaktaścha yadi tē śrōtramāgataḥ ॥ 3 ॥
tē vayaṃ vanamatyugraṃ praviṣṭāḥ pitṛśāsanāt ।
draṣṭumichChāmahē sarvē bhagavantaṃ nivēdyatām ॥ 4 ॥
tasya tad vachanaṃ śrutvā lakṣmaṇasya tapōdhanaḥ ।
tathētyuktvā'gniśaraṇaṃ pravivēśa nivēditum ॥ 5 ॥
sa praviśya muniśrēṣṭhaṃ tapasā duṣpradharṣaṇam ।
kṛtāñjaliruvāchēdaṃ rāmāgamanamañjasā ॥ 6 ॥
yathōktaṃ lakṣmaṇēnaiva śiṣyō'gastyasya sammataḥ ।
putrau daśarathasyēmau rāmō lakṣmaṇa ēva cha ॥ 7 ॥
praviṣṭāvāśramapadaṃ sītayā saha bhāryayā ।
draṣṭuṃ bhavantamāyātau śuśrūṣārthamarindamau ॥ 8 ॥
yadatrānantaraṃ tattvamājñāpayitumarhasi ।
tataśśiṣyādupaśrutya prāptaṃ rāmaṃ salakṣmaṇam ॥ 9 ॥
vaidēhīṃ cha mahābhāgāmidaṃ vachanamabravīt ।
diṣṭyā rāmaśchirasyādya draṣṭuṃ māṃ samupāgataḥ ॥ 10 ॥
manasā kāṅkṣitaṃ hyasya mayāpyāgamanaṃ prati ।
gamyatāṃ satkṛtō rāmassabhāryassahalakṣmaṇaḥ ॥ 11 ॥
pravēśyatāṃ samīpaṃ mē kiṃ chāsau na pravēśitaḥ ।
ēvamuktastu muninā dharmajñēna mahātmanā ॥ 12 ॥
abhivādyābravīchChiṣyastathēti niyatāñjaliḥ ।
tatō niṣkramya sambhrāntaśśiṣyō lakṣmaṇamabravīt ॥ 13 ॥
kvāsau rāmō muniṃ draṣṭumētu praviśatu svayam ।
tatō gatvā''śramapadaṃ śiṣyēṇa saha lakṣmaṇaḥ ॥ 14 ॥
darśayāmāsa kākutsthaṃ sītāṃ cha janakātmajām ।
taṃ śiṣyaḥ praśritō vākyamagastyavachanaṃ bruvan ॥ 15 ॥
prāvēśayadyathānyāyaṃ satkārārhaṃ susatkṛtam ।
pravivēśa tatō rāmassītayā sahalakṣmaṇaḥ ॥ 16 ॥
praśāntahariṇākīrṇamāśramaṃ hyavalōkayan ।
sa tatra brahmaṇaḥ sthānamagnēḥ sthānaṃ tathaiva cha ॥ 17 ॥
viṣṇōḥ sthānaṃ mahēndrasya sthānaṃ chaiva vivasvataḥ ।
sōmasthānaṃ bhagasthānaṃ sthānaṃ kaubēramēva cha ॥ 18 ॥
dāturvidhātuḥ sthānēcha vāyōḥ sthānaṃ tathaiva cha ।
nāgarājasya cha sthānamanantasya mahātmanaḥ ॥ 19 ॥
sthānaṃ tathaiva gāyatryā vasūnāṃ sthānamēva cha ।
sthānaṃ cha pāśahastasya varuṇasya mahātmanaḥ ॥ 20 ॥
kārtikēyasya cha sthānaṃ dharmasthānaṃ cha paśyati ।
sa tatra brahmaṇaḥ sthānamagnēḥ sthānaṃ tathaiva cha ॥ 21 ॥
viṣṇōḥ sthānaṃ mahēndrasya sthānaṃ chaiva vivasvataḥ ।
sōmasthānaṃ bhagasthānaṃ sthānaṃ kaubēramēva cha ॥ 22 ॥
dhāturvidhātuḥ sthānaṃ cha vāyōḥ sthānaṃ tathaiva cha ।
nāgarājasya cha sthānamanantasya mahātmanaḥ ॥ 23 ॥
sthānaṃ tathaiva gāyatryā vasūnāṃ sthānamēva cha ।
sthānaṃ cha pāśahastasya varuṇasya mahātmanaḥ ॥ 24 ॥
kārtikēyasya cha sthānaṃ dharmasthānaṃ cha paśyati ।
sa tatra brahmaṇaḥ sthānamagnēḥ sthānaṃ tathaiva cha ॥ 25 ॥
viṣṇōḥ sthānaṃ mahēndrasya sthānaṃ chaiva vivasvataḥ ।
sōmasthānaṃ bhagasthānaṃ sthānaṃ kaubēramēva cha ॥ 26 ॥
dāturvidhātuḥ sthānēcha vāyōḥ sthānaṃ tathaiva cha ।
nāgarājasya cha sthānamanantasya mahātmanaḥ ॥ 27 ॥
sthānaṃ tathaiva gāyatryā vasūnāṃ sthānamēva cha ।
sthānaṃ cha pāśahastasya varuṇasya mahātmanaḥ ॥ 28 ॥
kārtikēyasya cha sthānaṃ dharmasthānaṃ cha paśyati ।
tataśśiṣyaiḥ parivṛtō munirapyabhiniṣpatat ॥ 29 ॥
taṃ dadarśāgratō rāmō munīnāṃ dīptatējasām ।
abravīdvachanaṃ vīrō lakṣmaṇaṃ lakṣmivardhanam ॥ 30 ॥
ēṣa lakṣmaṇa niṣkrāmatyagastyō bhagavānṛṣiḥ ।
audāryēṇāvagachChāmi nidhānaṃ tapasāmimam ॥ 31 ॥
ēvamuktvā mahābāhuragastyaṃ sūryavarchasam ।
jagrāha paramaprītastasya pādau parantapaḥ ॥ 32 ॥
abhivādya tu dharmātmā tasthau rāmaḥ kṛtāñjaliḥ ।
sītayā saha vaidēhyā tadā rāmaḥ salakṣmaṇaḥ ॥ 33 ॥
pratijagrāha kākutsthamarchayitvāsanōdakaiḥ ।
kuśalapraśnamuktvā cha āsyatāmiti chābravīt ॥ 34 ॥
agniṃ hutvā pradāyārghyamatithīn pratipūjya cha ।
vānaprasthyēna dharmēṇa sa tēṣāṃ bhōjanaṃ dadau ॥ 35 ॥
prathamaṃ chōpaviśyātha dharmajñō munipuṅgavaḥ ।
uvācha rāmamāsīnaṃ prāñjaliṃ dharmakōvidam ॥ 36 ॥
agniṃ hutvā pradāyārghyamatithiṃ pratipūjayēt ।
anyathā khalu kākutstha tapasvī samudācharan ॥ 37 ॥
duḥsākṣīva parē lōkē svāni māṃsāni bhakṣayēt ।
rājā sarvasya lōkasya dharmachārī mahārathaḥ ॥ 38 ॥
pūjanīyaścha mānyaścha bhavān prāptaḥ priyātithiḥ ।
ēvamuktvā phalairmūlaiḥ puṣpairanyaiścha rāghavam ॥ 39 ॥
pūjayitvā yathākāmaṃ punarēva tatō'bravīt ।
idaṃ divyaṃ mahachchāpaṃ hēmaratnavibhūṣitam ॥ 40 ॥
vaiṣṇavaṃ puruṣavyāghra nirmitaṃ viśvakarmaṇā ।
amōghassūryasaṅkāśō brahmadattaśśarōttamaḥ ॥ 41 ॥
dattau mama mahēndrēṇa tūṇī chākṣayasāyakau ।
sampūrṇau niśitairbāṇairjvaladbhiriva pāvakaiḥ ॥ 42 ॥
mahārajatakōśō'yamasirhēmavibhūṣitaḥ ।
anēna dhanuṣā rāma hatvā saṅkhyē mahāsurān ॥ 43 ॥
ājahāra śriyaṃ dīptāṃ purā viṣṇurdivaukasām ।
taddhanustau cha tūṇīrau śaraṃ khaṅgaṃ cha mānada ॥ 44 ॥
jayāya pratigṛhṇīṣva vajraṃ vajradharō yathā ।
ēvamuktvā mahātējāḥ samastaṃ tadvarāyudham ।
datvā rāmāya bhagavānagastyaḥ punarabravīt ॥ 45 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē dvādaśassargaḥ ॥
