ශ්රීමද්වාල්මීකීය රාමායණේ කිෂ්කිංධාකාංඩම් ।
අථ චතුශ්චත්වාරිංශස්සර්ගඃ ।
විශේෂේණ තු සුග්රීවෝ හනූමත්යර්ථමුක්තවාන් ।
ස හි තස්මින්හරිශ්රේෂ්ඨේ නිශ්චිතාර්ථෝऽර්ථසාධනේ ॥ 1 ॥
අබ්රවීච්ච හනූමංතං වික්රාංතමනිලාත්මජම් ।
සුග්රීවඃ පරමප්රීතඃ ප්රභු ස්සර්වවනෞකසාම් ॥ 2 ॥
න භූමෞ නාංතරික්ෂේ වා නාංබරේ නාමරාලයේ ।
නාප්සු වා ගතිසංගං තේ පශ්යාමි හරිපුංගව ॥ 3 ॥
සාසුරාස්සහගංධර්වාස්සනාගනරදේවතාඃ ।
විදිතා ස්සර්වලෝකාස්තේ සසාගරධරාධරාඃ ॥ 4 ॥
ගතිර්වේගශ්ච තේජශ්ච ලාඝවං ච මහාකපේ ।
පිතුස්තේ සදෘශං වීර මාරුතස්ය මහෞජසඃ ॥ 5 ॥
තේජසා වාපි තේ භූතං න සමං භුවි න විද්යතේ ।
තද්යථා ලභ්යතේ සීතා තත්ත්වමේවෝපපාදය ॥ 6 ॥
ත්වය්යේව හනුම න්නස්ති බලං බුද්ධිඃ පරාක්රමඃ ।
දේශකාලානුවෘත්තිශ්ච නයශ්ච නයපංඩිත ॥ 7 ॥
තතඃ කාර්යසමාසංගමවගම්ය හනූමති ।
විදිත්වා හනුමංතං ච චිංතයාමාස රාඝවඃ ॥ 8 ॥
සර්වථා නිශ්චිතාර්ථෝऽයං හනූමති හරීශ්වරඃ ।
නිශ්චිතාර්ථකරශ්චාපි හනූමාන්කාර්යසාධනේ ॥ 9 ॥
තදේවං ප්රස්ථිතස්යාස්ය පරිජ්ඤාතස්ය කර්මභිඃ ।
භර්ත්රා පරිගෘහීතස්ය ධ්රුවඃ කාර්යඵලෝදයඃ ॥ 10 ॥
තං සමීක්ෂ්ය මහාතේජා ව්යවසායෝත්තරං හරිම් ।
කෘතාර්ථ ඉව සංවෘත්තඃ ප්රහෘෂ්ටේංද්රියමානසඃ ॥ 11 ॥
දදෞ තස්ය තතඃ ප්රීතස්ස්වනාමාංකෝපශෝභිතම් ।
අංගුලීයමභිජ්ඤානං රාජපුත්ර්යාඃ පරංතපඃ ॥ 12 ॥
අනේන ත්වාං හරිශ්රේෂ්ඨ චිහ්නේන ජනකාත්මජා ।
මත්සකාශාදනුප්රාප්තමනුද්විග්නාऽනුපශ්යති ॥ 13 ॥
ව්යවසායශ්ච තේ වීර සත්ත්වයුක්තශ්ච වික්රමඃ ।
සුග්රීවස්ය ච සංදේශස්සිද්ධිං කථයතීව මේ ॥ 14 ॥
ස තද්ගෘහ්ය හරිශ්රේෂ්ඨඃ ස්ථාප්ය මූර්ධ්නි කෘතාංජලිඃ ।
වංදිත්වා චරණෞ චෛව ප්රස්ථිතඃ ප්ලවගෝත්තමඃ ॥ 15 ॥
ස තත්ප්රකර්ෂන් හරීණාං මහද්බලං බභූව වීරඃ පවනාත්මජඃ කපිඃ ।
ගතාංබුදේ ව්යෝම්නි විශුද්ධමංඩලඃ ශශීව නක්ෂත්රගණෝපශෝභිතඃ ॥ 16 ॥
අතිබල බලමාශ්රිතස්තවාහං හරිවරවික්රම වික්රමෛරනල්පෛඃ ।
පවනසුත යථාऽභිගම්යතේ සා ජනකසුතා හනුමං ස්තථා කුරුෂ්ව ॥ 17 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ චතුශ්චත්වාරිංශස්සර්ගඃ ॥
