ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ചതുശ്ചത്വാരിംശസ്സര്ഗഃ ।
വിശേഷേണ തു സുഗ്രീവോ ഹനൂമത്യര്ഥമുക്തവാന് ।
സ ഹി തസ്മിന്ഹരിശ്രേഷ്ഠേ നിശ്ചിതാര്ഥോഽര്ഥസാധനേ ॥ 1 ॥
അബ്രവീച്ച ഹനൂമംതം വിക്രാംതമനിലാത്മജമ് ।
സുഗ്രീവഃ പരമപ്രീതഃ പ്രഭു സ്സർവവനൌകസാമ് ॥ 2 ॥
ന ഭൂമൌ നാംതരിക്ഷേ വാ നാംബരേ നാമരാലയേ ।
നാപ്സു വാ ഗതിസംഗം തേ പശ്യാമി ഹരിപുംഗവ ॥ 3 ॥
സാസുരാസ്സഹഗംധർവാസ്സനാഗനരദേവതാഃ ।
വിദിതാ സ്സർവലോകാസ്തേ സസാഗരധരാധരാഃ ॥ 4 ॥
ഗതിർവേഗശ്ച തേജശ്ച ലാഘവം ച മഹാകപേ ।
പിതുസ്തേ സദൃശം വീര മാരുതസ്യ മഹൌജസഃ ॥ 5 ॥
തേജസാ വാപി തേ ഭൂതം ന സമം ഭുവി ന വിദ്യതേ ।
തദ്യഥാ ലഭ്യതേ സീതാ തത്ത്വമേവോപപാദയ ॥ 6 ॥
ത്വയ്യേവ ഹനുമ ന്നസ്തി ബലം ബുദ്ധിഃ പരാക്രമഃ ।
ദേശകാലാനുവൃത്തിശ്ച നയശ്ച നയപംഡിത ॥ 7 ॥
തതഃ കാര്യസമാസംഗമവഗമ്യ ഹനൂമതി ।
വിദിത്വാ ഹനുമംതം ച ചിംതയാമാസ രാഘവഃ ॥ 8 ॥
സർവഥാ നിശ്ചിതാര്ഥോഽയം ഹനൂമതി ഹരീശ്വരഃ ।
നിശ്ചിതാര്ഥകരശ്ചാപി ഹനൂമാന്കാര്യസാധനേ ॥ 9 ॥
തദേവം പ്രസ്ഥിതസ്യാസ്യ പരിജ്ഞാതസ്യ കര്മഭിഃ ।
ഭര്ത്രാ പരിഗൃഹീതസ്യ ധ്രുവഃ കാര്യഫലോദയഃ ॥ 10 ॥
തം സമീക്ഷ്യ മഹാതേജാ വ്യവസായോത്തരം ഹരിമ് ।
കൃതാര്ഥ ഇവ സംവൃത്തഃ പ്രഹൃഷ്ടേംദ്രിയമാനസഃ ॥ 11 ॥
ദദൌ തസ്യ തതഃ പ്രീതസ്സ്വനാമാംകോപശോഭിതമ് ।
അംഗുലീയമഭിജ്ഞാനം രാജപുത്ര്യാഃ പരംതപഃ ॥ 12 ॥
അനേന ത്വാം ഹരിശ്രേഷ്ഠ ചിഹ്നേന ജനകാത്മജാ ।
മത്സകാശാദനുപ്രാപ്തമനുദ്വിഗ്നാഽനുപശ്യതി ॥ 13 ॥
വ്യവസായശ്ച തേ വീര സത്ത്വയുക്തശ്ച വിക്രമഃ ।
സുഗ്രീവസ്യ ച സംദേശസ്സിദ്ധിം കഥയതീവ മേ ॥ 14 ॥
സ തദ്ഗൃഹ്യ ഹരിശ്രേഷ്ഠഃ സ്ഥാപ്യ മൂര്ധ്നി കൃതാംജലിഃ ।
വംദിത്വാ ചരണൌ ചൈവ പ്രസ്ഥിതഃ പ്ലവഗോത്തമഃ ॥ 15 ॥
സ തത്പ്രകര്ഷന് ഹരീണാം മഹദ്ബലം ബഭൂവ വീരഃ പവനാത്മജഃ കപിഃ ।
ഗതാംബുദേ വ്യോമ്നി വിശുദ്ധമംഡലഃ ശശീവ നക്ഷത്രഗണോപശോഭിതഃ ॥ 16 ॥
അതിബല ബലമാശ്രിതസ്തവാഹം ഹരിവരവിക്രമ വിക്രമൈരനല്പൈഃ ।
പവനസുത യഥാഽഭിഗമ്യതേ സാ ജനകസുതാ ഹനുമം സ്തഥാ കുരുഷ്വ ॥ 17 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ചതുശ്ചത്വാരിംശസ്സര്ഗഃ ॥
