śrīmadvālmīkīya rāmāyaṇē kiṣkindhākāṇḍam ।
atha chatuśchatvāriṃśassargaḥ ।
viśēṣēṇa tu sugrīvō hanūmatyarthamuktavān ।
sa hi tasminhariśrēṣṭhē niśchitārthō'rthasādhanē ॥ 1 ॥
abravīchcha hanūmantaṃ vikrāntamanilātmajam ।
sugrīvaḥ paramaprītaḥ prabhu ssarvavanaukasām ॥ 2 ॥
na bhūmau nāntarikṣē vā nāmbarē nāmarālayē ।
nāpsu vā gatisaṅgaṃ tē paśyāmi haripuṅgava ॥ 3 ॥
sāsurāssahagandharvāssanāganaradēvatāḥ ।
viditā ssarvalōkāstē sasāgaradharādharāḥ ॥ 4 ॥
gatirvēgaścha tējaścha lāghavaṃ cha mahākapē ।
pitustē sadṛśaṃ vīra mārutasya mahaujasaḥ ॥ 5 ॥
tējasā vāpi tē bhūtaṃ na samaṃ bhuvi na vidyatē ।
tadyathā labhyatē sītā tattvamēvōpapādaya ॥ 6 ॥
tvayyēva hanuma nnasti balaṃ buddhiḥ parākramaḥ ।
dēśakālānuvṛttiścha nayaścha nayapaṇḍita ॥ 7 ॥
tataḥ kāryasamāsaṅgamavagamya hanūmati ।
viditvā hanumantaṃ cha chintayāmāsa rāghavaḥ ॥ 8 ॥
sarvathā niśchitārthō'yaṃ hanūmati harīśvaraḥ ।
niśchitārthakaraśchāpi hanūmānkāryasādhanē ॥ 9 ॥
tadēvaṃ prasthitasyāsya parijñātasya karmabhiḥ ।
bhartrā parigṛhītasya dhruvaḥ kāryaphalōdayaḥ ॥ 10 ॥
taṃ samīkṣya mahātējā vyavasāyōttaraṃ harim ।
kṛtārtha iva saṃvṛttaḥ prahṛṣṭēndriyamānasaḥ ॥ 11 ॥
dadau tasya tataḥ prītassvanāmāṅkōpaśōbhitam ।
aṅgulīyamabhijñānaṃ rājaputryāḥ parantapaḥ ॥ 12 ॥
anēna tvāṃ hariśrēṣṭha chihnēna janakātmajā ।
matsakāśādanuprāptamanudvignā'nupaśyati ॥ 13 ॥
vyavasāyaścha tē vīra sattvayuktaścha vikramaḥ ।
sugrīvasya cha sandēśassiddhiṃ kathayatīva mē ॥ 14 ॥
sa tadgṛhya hariśrēṣṭhaḥ sthāpya mūrdhni kṛtāñjaliḥ ।
vanditvā charaṇau chaiva prasthitaḥ plavagōttamaḥ ॥ 15 ॥
sa tatprakarṣan harīṇāṃ mahadbalaṃ babhūva vīraḥ pavanātmajaḥ kapiḥ ।
gatāmbudē vyōmni viśuddhamaṇḍalaḥ śaśīva nakṣatragaṇōpaśōbhitaḥ ॥ 16 ॥
atibala balamāśritastavāhaṃ harivaravikrama vikramairanalpaiḥ ।
pavanasuta yathā'bhigamyatē sā janakasutā hanumaṃ stathā kuruṣva ॥ 17 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē chatuśchatvāriṃśassargaḥ ॥
