ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଚତୁଶ୍ଚତ୍ଵାରିଂଶସ୍ସର୍ଗଃ ।
ଵିଶେଷେଣ ତୁ ସୁଗ୍ରୀଵୋ ହନୂମତ୍ୟର୍ଥମୁକ୍ତଵାନ୍ ।
ସ ହି ତସ୍ମିନ୍ହରିଶ୍ରେଷ୍ଠେ ନିଶ୍ଚିତାର୍ଥୋଽର୍ଥସାଧନେ ॥ 1 ॥
ଅବ୍ରଵୀଚ୍ଚ ହନୂମଂତଂ ଵିକ୍ରାଂତମନିଲାତ୍ମଜମ୍ ।
ସୁଗ୍ରୀଵଃ ପରମପ୍ରୀତଃ ପ୍ରଭୁ ସ୍ସର୍ଵଵନୌକସାମ୍ ॥ 2 ॥
ନ ଭୂମୌ ନାଂତରିକ୍ଷେ ଵା ନାଂବରେ ନାମରାଲୟେ ।
ନାପ୍ସୁ ଵା ଗତିସଂଗଂ ତେ ପଶ୍ୟାମି ହରିପୁଂଗଵ ॥ 3 ॥
ସାସୁରାସ୍ସହଗଂଧର୍ଵାସ୍ସନାଗନରଦେଵତାଃ ।
ଵିଦିତା ସ୍ସର୍ଵଲୋକାସ୍ତେ ସସାଗରଧରାଧରାଃ ॥ 4 ॥
ଗତିର୍ଵେଗଶ୍ଚ ତେଜଶ୍ଚ ଲାଘଵଂ ଚ ମହାକପେ ।
ପିତୁସ୍ତେ ସଦୃଶଂ ଵୀର ମାରୁତସ୍ୟ ମହୌଜସଃ ॥ 5 ॥
ତେଜସା ଵାପି ତେ ଭୂତଂ ନ ସମଂ ଭୁଵି ନ ଵିଦ୍ୟତେ ।
ତଦ୍ୟଥା ଲଭ୍ୟତେ ସୀତା ତତ୍ତ୍ଵମେଵୋପପାଦୟ ॥ 6 ॥
ତ୍ଵୟ୍ୟେଵ ହନୁମ ନ୍ନସ୍ତି ବଲଂ ବୁଦ୍ଧିଃ ପରାକ୍ରମଃ ।
ଦେଶକାଲାନୁଵୃତ୍ତିଶ୍ଚ ନୟଶ୍ଚ ନୟପଂଡିତ ॥ 7 ॥
ତତଃ କାର୍ୟସମାସଂଗମଵଗମ୍ୟ ହନୂମତି ।
ଵିଦିତ୍ଵା ହନୁମଂତଂ ଚ ଚିଂତୟାମାସ ରାଘଵଃ ॥ 8 ॥
ସର୍ଵଥା ନିଶ୍ଚିତାର୍ଥୋଽୟଂ ହନୂମତି ହରୀଶ୍ଵରଃ ।
ନିଶ୍ଚିତାର୍ଥକରଶ୍ଚାପି ହନୂମାନ୍କାର୍ୟସାଧନେ ॥ 9 ॥
ତଦେଵଂ ପ୍ରସ୍ଥିତସ୍ୟାସ୍ୟ ପରିଜ୍ଞାତସ୍ୟ କର୍ମଭିଃ ।
ଭର୍ତ୍ରା ପରିଗୃହୀତସ୍ୟ ଧ୍ରୁଵଃ କାର୍ୟଫଲୋଦୟଃ ॥ 10 ॥
ତଂ ସମୀକ୍ଷ୍ୟ ମହାତେଜା ଵ୍ୟଵସାୟୋତ୍ତରଂ ହରିମ୍ ।
କୃତାର୍ଥ ଇଵ ସଂଵୃତ୍ତଃ ପ୍ରହୃଷ୍ଟେଂଦ୍ରିୟମାନସଃ ॥ 11 ॥
ଦଦୌ ତସ୍ୟ ତତଃ ପ୍ରୀତସ୍ସ୍ଵନାମାଂକୋପଶୋଭିତମ୍ ।
ଅଂଗୁଲୀୟମଭିଜ୍ଞାନଂ ରାଜପୁତ୍ର୍ୟାଃ ପରଂତପଃ ॥ 12 ॥
ଅନେନ ତ୍ଵାଂ ହରିଶ୍ରେଷ୍ଠ ଚିହ୍ନେନ ଜନକାତ୍ମଜା ।
ମତ୍ସକାଶାଦନୁପ୍ରାପ୍ତମନୁଦ୍ଵିଗ୍ନାଽନୁପଶ୍ୟତି ॥ 13 ॥
ଵ୍ୟଵସାୟଶ୍ଚ ତେ ଵୀର ସତ୍ତ୍ଵୟୁକ୍ତଶ୍ଚ ଵିକ୍ରମଃ ।
ସୁଗ୍ରୀଵସ୍ୟ ଚ ସଂଦେଶସ୍ସିଦ୍ଧିଂ କଥୟତୀଵ ମେ ॥ 14 ॥
ସ ତଦ୍ଗୃହ୍ୟ ହରିଶ୍ରେଷ୍ଠଃ ସ୍ଥାପ୍ୟ ମୂର୍ଧ୍ନି କୃତାଂଜଲିଃ ।
ଵଂଦିତ୍ଵା ଚରଣୌ ଚୈଵ ପ୍ରସ୍ଥିତଃ ପ୍ଲଵଗୋତ୍ତମଃ ॥ 15 ॥
ସ ତତ୍ପ୍ରକର୍ଷନ୍ ହରୀଣାଂ ମହଦ୍ବଲଂ ବଭୂଵ ଵୀରଃ ପଵନାତ୍ମଜଃ କପିଃ ।
ଗତାଂବୁଦେ ଵ୍ୟୋମ୍ନି ଵିଶୁଦ୍ଧମଂଡଲଃ ଶଶୀଵ ନକ୍ଷତ୍ରଗଣୋପଶୋଭିତଃ ॥ 16 ॥
ଅତିବଲ ବଲମାଶ୍ରିତସ୍ତଵାହଂ ହରିଵରଵିକ୍ରମ ଵିକ୍ରମୈରନଲ୍ପୈଃ ।
ପଵନସୁତ ୟଥାଽଭିଗମ୍ୟତେ ସା ଜନକସୁତା ହନୁମଂ ସ୍ତଥା କୁରୁଷ୍ଵ ॥ 17 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଚତୁଶ୍ଚତ୍ଵାରିଂଶସ୍ସର୍ଗଃ ॥
