શ્રીમદ્વાલ્મીકીય રામાયણે કિષ્કિંધાકાંડમ્ ।
અથ ચતુશ્ચત્વારિંશસ્સર્ગઃ ।
વિશેષેણ તુ સુગ્રીવો હનૂમત્યર્થમુક્તવાન્ ।
સ હિ તસ્મિન્હરિશ્રેષ્ઠે નિશ્ચિતાર્થોઽર્થસાધને ॥ 1 ॥
અબ્રવીચ્ચ હનૂમંતં વિક્રાંતમનિલાત્મજમ્ ।
સુગ્રીવઃ પરમપ્રીતઃ પ્રભુ સ્સર્વવનૌકસામ્ ॥ 2 ॥
ન ભૂમૌ નાંતરિક્ષે વા નાંબરે નામરાલયે ।
નાપ્સુ વા ગતિસંગં તે પશ્યામિ હરિપુંગવ ॥ 3 ॥
સાસુરાસ્સહગંધર્વાસ્સનાગનરદેવતાઃ ।
વિદિતા સ્સર્વલોકાસ્તે સસાગરધરાધરાઃ ॥ 4 ॥
ગતિર્વેગશ્ચ તેજશ્ચ લાઘવં ચ મહાકપે ।
પિતુસ્તે સદૃશં વીર મારુતસ્ય મહૌજસઃ ॥ 5 ॥
તેજસા વાપિ તે ભૂતં ન સમં ભુવિ ન વિદ્યતે ।
તદ્યથા લભ્યતે સીતા તત્ત્વમેવોપપાદય ॥ 6 ॥
ત્વય્યેવ હનુમ ન્નસ્તિ બલં બુદ્ધિઃ પરાક્રમઃ ।
દેશકાલાનુવૃત્તિશ્ચ નયશ્ચ નયપંડિત ॥ 7 ॥
તતઃ કાર્યસમાસંગમવગમ્ય હનૂમતિ ।
વિદિત્વા હનુમંતં ચ ચિંતયામાસ રાઘવઃ ॥ 8 ॥
સર્વથા નિશ્ચિતાર્થોઽયં હનૂમતિ હરીશ્વરઃ ।
નિશ્ચિતાર્થકરશ્ચાપિ હનૂમાન્કાર્યસાધને ॥ 9 ॥
તદેવં પ્રસ્થિતસ્યાસ્ય પરિજ્ઞાતસ્ય કર્મભિઃ ।
ભર્ત્રા પરિગૃહીતસ્ય ધ્રુવઃ કાર્યફલોદયઃ ॥ 10 ॥
તં સમીક્ષ્ય મહાતેજા વ્યવસાયોત્તરં હરિમ્ ।
કૃતાર્થ ઇવ સંવૃત્તઃ પ્રહૃષ્ટેંદ્રિયમાનસઃ ॥ 11 ॥
દદૌ તસ્ય તતઃ પ્રીતસ્સ્વનામાંકોપશોભિતમ્ ।
અંગુલીયમભિજ્ઞાનં રાજપુત્ર્યાઃ પરંતપઃ ॥ 12 ॥
અનેન ત્વાં હરિશ્રેષ્ઠ ચિહ્નેન જનકાત્મજા ।
મત્સકાશાદનુપ્રાપ્તમનુદ્વિગ્નાઽનુપશ્યતિ ॥ 13 ॥
વ્યવસાયશ્ચ તે વીર સત્ત્વયુક્તશ્ચ વિક્રમઃ ।
સુગ્રીવસ્ય ચ સંદેશસ્સિદ્ધિં કથયતીવ મે ॥ 14 ॥
સ તદ્ગૃહ્ય હરિશ્રેષ્ઠઃ સ્થાપ્ય મૂર્ધ્નિ કૃતાંજલિઃ ।
વંદિત્વા ચરણૌ ચૈવ પ્રસ્થિતઃ પ્લવગોત્તમઃ ॥ 15 ॥
સ તત્પ્રકર્ષન્ હરીણાં મહદ્બલં બભૂવ વીરઃ પવનાત્મજઃ કપિઃ ।
ગતાંબુદે વ્યોમ્નિ વિશુદ્ધમંડલઃ શશીવ નક્ષત્રગણોપશોભિતઃ ॥ 16 ॥
અતિબલ બલમાશ્રિતસ્તવાહં હરિવરવિક્રમ વિક્રમૈરનલ્પૈઃ ।
પવનસુત યથાઽભિગમ્યતે સા જનકસુતા હનુમં સ્તથા કુરુષ્વ ॥ 17 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે ચતુશ્ચત્વારિંશસ્સર્ગઃ ॥
