śrīmadvālmīkīya rāmāyaṇē kiṣkindhākāṇḍam ।
atha ēkaṣaṣṭitamassargaḥ ।
tatastaddāruṇaṃ karma duṣkaraṃ sahasātkṛtam ।
āchachakṣē munēssarvaṃ sūryānugamanaṃ tathā ॥ 1 ॥
bhagavanvraṇayuktatvāllajjayā vyākulēndriyaḥ ।
pariśrāntō na śaknōmi vachanaṃ paribhāṣitum ॥ 2 ॥
ahaṃ chaiva jaṭāyuścha saṅgharṣāddharpamōhitau ।
ākāśaṃ patitau vīrau jijñāsantau parākramam ॥ 3 ॥
kailāsaśikharē baddhvā munīnāmagrataḥ paṇam ।
ravissyādanuyātavyō yāvadastaṃ mahāgirim ॥ 4 ॥
athā'vāṃ yugapatprāptāvapaśyāva mahītalē ।
rathachakrapramāṇāni nagarāṇi pṛthakpṛthak ॥ 5 ॥
kvachidvāditraghōṣāṃścha brahmaghōṣāṃścha śuśruvaḥ ।
gāyantīśchāṅganā bahvīḥ paśyāvō raktavāsasaḥ ॥ 6 ॥
tūrṇamutpatya chākāśamādityapathamāśritau ।
āvāmālōkayāvastadvanaṃ śādvalasannibham ॥ 7 ॥
upalairiva sañChannā dṛśyatē bhūśśilōchchayaiḥ ।
āpagābhiścha saṃvītā sūtrairiva vasundharā ॥ 8 ॥
himavāṃśchaiva vindhyaścha mēruścha sumahānnagaḥ ।
bhūtalē samprakāśantē nāgā iva jalāśayē ॥ 9 ॥
tīvrassvēdaścha khēdaścha bhayaṃ chāsīttadā''vayōḥ ।
samāviśati mōhaścha tamō mūrChā cha dāruṇā ॥ 10 ॥
na digvijñāyatē yāmyā nāgnēyī na cha vāruṇī ।
yugāntē niyatō lōkō hatō dagdha ivāgninā ॥ 11 ॥
manaścha mē hataṃ bhūyassannivartyatu saṃśrayam ।
yatnēna mahatā hyasminpunassandhāya chakṣuṣī ॥ 12 ॥
yatnēna mahatā bhūyō bhāskaraḥ pratilōkitaḥ ।
tulyaḥ pṛthvīpramāṇēna bhāskaraḥ pratibhāti nau ॥ 13 ॥
jaṭāyurmāmanāpṛchChya nipapāta mahīṃ tataḥ ।
taṃ dṛṣṭvā tūrṇamākāśādātmānaṃ muktavānaham ॥ 14 ॥
pakṣābhyāṃ cha mayā guptō jaṭāyurna pradahyatē ।
pramādāttatra nirdagdhaḥ patanvāyupathādaham ॥ 15 ॥
āśaṅkē taṃ nipatitaṃ janasthānē jaṭāyuṣam ।
ahaṃ tu patitō vindhyē dagdhapakṣō jaḍīkṛtaḥ ॥ 16 ॥
rājyēna hīnō bhrātrā cha pakṣābhyāṃ vikramēṇa cha ।
sarvathā martumēvēchChanpatiṣyē śikharādgīrēḥ ॥ 17 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē ēkaṣaṣṭitamassargaḥ ॥
