ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ඒකෂෂ්ටිතමස්සර්ගඃ ।
තතස්තද්දාරුණං කර්ම දුෂ්කරං සහසාත්කෘතම් ।
ආචචක්ෂේ මුනේස්සර්වං සූර්යානුගමනං තථා ॥ 1 ॥
භගවන්ව්රණයුක්තත්වාල්ලජ්ජයා ව්යාකුලේංද්රියඃ ।
පරිශ්රාංතෝ න ශක්නෝමි වචනං පරිභාෂිතුම් ॥ 2 ॥
අහං චෛව ජටායුශ්ච සංඝර්ෂාද්ධර්පමෝහිතෞ ।
ආකාශං පතිතෞ වීරෞ ජිජ්ඤාසංතෞ පරාක්රමම් ॥ 3 ॥
කෛලාසශිඛරේ බද්ධ්වා මුනීනාමග්රතඃ පණම් ।
රවිස්ස්යාදනුයාතව්යෝ යාවදස්තං මහාගිරිම් ॥ 4 ॥
අථාऽවාං යුගපත්ප්රාප්තාවපශ්යාව මහීතලේ ।
රථචක්රප්රමාණානි නගරාණි පෘථක්පෘථක් ॥ 5 ॥
ක්වචිද්වාදිත්රඝෝෂාංශ්ච බ්රහ්මඝෝෂාංශ්ච ශුශ්රුවඃ ।
ගායංතීශ්චාංගනා බහ්වීඃ පශ්යාවෝ රක්තවාසසඃ ॥ 6 ॥
තූර්ණමුත්පත්ය චාකාශමාදිත්යපථමාශ්රිතෞ ।
ආවාමාලෝකයාවස්තද්වනං ශාද්වලසන්නිභම් ॥ 7 ॥
උපලෛරිව සංඡන්නා දෘශ්යතේ භූශ්ශිලෝච්චයෛඃ ।
ආපගාභිශ්ච සංවීතා සූත්රෛරිව වසුංධරා ॥ 8 ॥
හිමවාංශ්චෛව විංධ්යශ්ච මේරුශ්ච සුමහාන්නගඃ ।
භූතලේ සංප්රකාශංතේ නාගා ඉව ජලාශයේ ॥ 9 ॥
තීව්රස්ස්වේදශ්ච ඛේදශ්ච භයං චාසීත්තදාऽऽවයෝඃ ।
සමාවිශති මෝහශ්ච තමෝ මූර්ඡා ච දාරුණා ॥ 10 ॥
න දිග්විජ්ඤායතේ යාම්යා නාග්නේයී න ච වාරුණී ।
යුගාංතේ නියතෝ ලෝකෝ හතෝ දග්ධ ඉවාග්නිනා ॥ 11 ॥
මනශ්ච මේ හතං භූයස්සන්නිවර්ත්යතු සංශ්රයම් ।
යත්නේන මහතා හ්යස්මින්පුනස්සංධාය චක්ෂුෂී ॥ 12 ॥
යත්නේන මහතා භූයෝ භාස්කරඃ ප්රතිලෝකිතඃ ।
තුල්යඃ පෘථ්වීප්රමාණේන භාස්කරඃ ප්රතිභාති නෞ ॥ 13 ॥
ජටායුර්මාමනාපෘච්ඡ්ය නිපපාත මහීං තතඃ ।
තං දෘෂ්ට්වා තූර්ණමාකාශාදාත්මානං මුක්තවානහම් ॥ 14 ॥
පක්ෂාභ්යාං ච මයා ගුප්තෝ ජටායුර්න ප්රදහ්යතේ ।
ප්රමාදාත්තත්ර නිර්දග්ධඃ පතන්වායුපථාදහම් ॥ 15 ॥
ආශංකේ තං නිපතිතං ජනස්ථානේ ජටායුෂම් ।
අහං තු පතිතෝ විංධ්යේ දග්ධපක්ෂෝ ජඩීකෘතඃ ॥ 16 ॥
රාජ්යේන හීනෝ භ්රාත්රා ච පක්ෂාභ්යාං වික්රමේණ ච ।
සර්වථා මර්තුමේවේච්ඡන්පතිෂ්යේ ශිඛරාද්ගීරේඃ ॥ 17 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ඒකෂෂ්ටිතමස්සර්ගඃ ॥
