শ্রীমদ্বাল্মীকীয় রামাযণে কিষ্কিংধাকাংডম্ ।
অথ একষষ্টিতমস্সর্গঃ ।
ততস্তদ্দারুণং কর্ম দুষ্করং সহসাত্কৃতম্ ।
আচচক্ষে মুনেস্সর্বং সূর্য়ানুগমনং তথা ॥ 1 ॥
ভগবন্ব্রণয়ুক্তত্বাল্লজ্জয়া ব্য়াকুলেংদ্রিয়ঃ ।
পরিশ্রাংতো ন শক্নোমি বচনং পরিভাষিতুম্ ॥ 2 ॥
অহং চৈব জটায়ুশ্চ সংঘর্ষাদ্ধর্পমোহিতৌ ।
আকাশং পতিতৌ বীরৌ জিজ্ঞাসংতৌ পরাক্রমম্ ॥ 3 ॥
কৈলাসশিখরে বদ্ধ্বা মুনীনামগ্রতঃ পণম্ ।
রবিস্স্য়াদনুয়াতব্য়ো যাবদস্তং মহাগিরিম্ ॥ 4 ॥
অথাঽবাং যুগপত্প্রাপ্তাবপশ্য়াব মহীতলে ।
রথচক্রপ্রমাণানি নগরাণি পৃথক্পৃথক্ ॥ 5 ॥
ক্বচিদ্বাদিত্রঘোষাংশ্চ ব্রহ্মঘোষাংশ্চ শুশ্রুবঃ ।
গায়ংতীশ্চাংগনা বহ্বীঃ পশ্য়াবো রক্তবাসসঃ ॥ 6 ॥
তূর্ণমুত্পত্য় চাকাশমাদিত্যপথমাশ্রিতৌ ।
আবামালোকয়াবস্তদ্বনং শাদ্বলসন্নিভম্ ॥ 7 ॥
উপলৈরিব সংছন্না দৃশ্যতে ভূশ্শিলোচ্চয়ৈঃ ।
আপগাভিশ্চ সংবীতা সূত্রৈরিব বসুংধরা ॥ 8 ॥
হিমবাংশ্চৈব বিংধ্যশ্চ মেরুশ্চ সুমহান্নগঃ ।
ভূতলে সংপ্রকাশংতে নাগা ইব জলাশয়ে ॥ 9 ॥
তীব্রস্স্বেদশ্চ খেদশ্চ ভয়ং চাসীত্তদাঽঽবয়োঃ ।
সমাবিশতি মোহশ্চ তমো মূর্ছা চ দারুণা ॥ 10 ॥
ন দিগ্বিজ্ঞাযতে যাম্য়া নাগ্নেয়ী ন চ বারুণী ।
যুগাংতে নিযতো লোকো হতো দগ্ধ ইবাগ্নিনা ॥ 11 ॥
মনশ্চ মে হতং ভূযস্সন্নিবর্ত্যতু সংশ্রযম্ ।
যত্নেন মহতা হ্যস্মিন্পুনস্সংধায় চক্ষুষী ॥ 12 ॥
যত্নেন মহতা ভূয়ো ভাস্করঃ প্রতিলোকিতঃ ।
তুল্য়ঃ পৃথ্বীপ্রমাণেন ভাস্করঃ প্রতিভাতি নৌ ॥ 13 ॥
জটায়ুর্মামনাপৃচ্ছ্য় নিপপাত মহীং ততঃ ।
তং দৃষ্ট্বা তূর্ণমাকাশাদাত্মানং মুক্তবানহম্ ॥ 14 ॥
পক্ষাভ্য়াং চ ময়া গুপ্তো জটায়ুর্ন প্রদহ্যতে ।
প্রমাদাত্তত্র নির্দগ্ধঃ পতন্বায়ুপথাদহম্ ॥ 15 ॥
আশংকে তং নিপতিতং জনস্থানে জটায়ুষম্ ।
অহং তু পতিতো বিংধ্য়ে দগ্ধপক্ষো জডীকৃতঃ ॥ 16 ॥
রাজ্য়েন হীনো ভ্রাত্রা চ পক্ষাভ্য়াং বিক্রমেণ চ ।
সর্বথা মর্তুমেবেচ্ছন্পতিষ্য়ে শিখরাদ্গীরেঃ ॥ 17 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে একষষ্টিতমস্সর্গঃ ॥
