ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ഏകഷഷ്ടിതമസ്സര്ഗഃ ।
തതസ്തദ്ദാരുണം കര്മ ദുഷ്കരം സഹസാത്കൃതമ് ।
ആചചക്ഷേ മുനേസ്സർവം സൂര്യാനുഗമനം തഥാ ॥ 1 ॥
ഭഗവന്വ്രണയുക്തത്വാല്ലജ്ജയാ വ്യാകുലേംദ്രിയഃ ।
പരിശ്രാംതോ ന ശക്നോമി വചനം പരിഭാഷിതുമ് ॥ 2 ॥
അഹം ചൈവ ജടായുശ്ച സംഘര്ഷാദ്ധര്പമോഹിതൌ ।
ആകാശം പതിതൌ വീരൌ ജിജ്ഞാസംതൌ പരാക്രമമ് ॥ 3 ॥
കൈലാസശിഖരേ ബദ്ധ്വാ മുനീനാമഗ്രതഃ പണമ് ।
രവിസ്സ്യാദനുയാതവ്യോ യാവദസ്തം മഹാഗിരിമ് ॥ 4 ॥
അഥാഽവാം യുഗപത്പ്രാപ്താവപശ്യാവ മഹീതലേ ।
രഥചക്രപ്രമാണാനി നഗരാണി പൃഥക്പൃഥക് ॥ 5 ॥
ക്വചിദ്വാദിത്രഘോഷാംശ്ച ബ്രഹ്മഘോഷാംശ്ച ശുശ്രുവഃ ।
ഗായംതീശ്ചാംഗനാ ബഹ്വീഃ പശ്യാവോ രക്തവാസസഃ ॥ 6 ॥
തൂര്ണമുത്പത്യ ചാകാശമാദിത്യപഥമാശ്രിതൌ ।
ആവാമാലോകയാവസ്തദ്വനം ശാദ്വലസന്നിഭമ് ॥ 7 ॥
ഉപലൈരിവ സംഛന്നാ ദൃശ്യതേ ഭൂശ്ശിലോച്ചയൈഃ ।
ആപഗാഭിശ്ച സംവീതാ സൂത്രൈരിവ വസുംധരാ ॥ 8 ॥
ഹിമവാംശ്ചൈവ വിംധ്യശ്ച മേരുശ്ച സുമഹാന്നഗഃ ।
ഭൂതലേ സംപ്രകാശംതേ നാഗാ ഇവ ജലാശയേ ॥ 9 ॥
തീവ്രസ്സ്വേദശ്ച ഖേദശ്ച ഭയം ചാസീത്തദാഽഽവയോഃ ।
സമാവിശതി മോഹശ്ച തമോ മൂര്ഛാ ച ദാരുണാ ॥ 10 ॥
ന ദിഗ്വിജ്ഞായതേ യാമ്യാ നാഗ്നേയീ ന ച വാരുണീ ।
യുഗാംതേ നിയതോ ലോകോ ഹതോ ദഗ്ധ ഇവാഗ്നിനാ ॥ 11 ॥
മനശ്ച മേ ഹതം ഭൂയസ്സന്നിവര്ത്യതു സംശ്രയമ് ।
യത്നേന മഹതാ ഹ്യസ്മിന്പുനസ്സംധായ ചക്ഷുഷീ ॥ 12 ॥
യത്നേന മഹതാ ഭൂയോ ഭാസ്കരഃ പ്രതിലോകിതഃ ।
തുല്യഃ പൃഥ്വീപ്രമാണേന ഭാസ്കരഃ പ്രതിഭാതി നൌ ॥ 13 ॥
ജടായുര്മാമനാപൃച്ഛ്യ നിപപാത മഹീം തതഃ ।
തം ദൃഷ്ട്വാ തൂര്ണമാകാശാദാത്മാനം മുക്തവാനഹമ് ॥ 14 ॥
പക്ഷാഭ്യാം ച മയാ ഗുപ്തോ ജടായുര്ന പ്രദഹ്യതേ ।
പ്രമാദാത്തത്ര നിര്ദഗ്ധഃ പതന്വായുപഥാദഹമ് ॥ 15 ॥
ആശംകേ തം നിപതിതം ജനസ്ഥാനേ ജടായുഷമ് ।
അഹം തു പതിതോ വിംധ്യേ ദഗ്ധപക്ഷോ ജഡീകൃതഃ ॥ 16 ॥
രാജ്യേന ഹീനോ ഭ്രാത്രാ ച പക്ഷാഭ്യാം വിക്രമേണ ച ।
സർവഥാ മര്തുമേവേച്ഛന്പതിഷ്യേ ശിഖരാദ്ഗീരേഃ ॥ 17 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ഏകഷഷ്ടിതമസ്സര്ഗഃ ॥
