શ્રીમદ્વાલ્મીકીય રામાયણે કિષ્કિંધાકાંડમ્ ।
અથ એકષષ્ટિતમસ્સર્ગઃ ।
તતસ્તદ્દારુણં કર્મ દુષ્કરં સહસાત્કૃતમ્ ।
આચચક્ષે મુનેસ્સર્વં સૂર્યાનુગમનં તથા ॥ 1 ॥
ભગવન્વ્રણયુક્તત્વાલ્લજ્જયા વ્યાકુલેંદ્રિયઃ ।
પરિશ્રાંતો ન શક્નોમિ વચનં પરિભાષિતુમ્ ॥ 2 ॥
અહં ચૈવ જટાયુશ્ચ સંઘર્ષાદ્ધર્પમોહિતૌ ।
આકાશં પતિતૌ વીરૌ જિજ્ઞાસંતૌ પરાક્રમમ્ ॥ 3 ॥
કૈલાસશિખરે બદ્ધ્વા મુનીનામગ્રતઃ પણમ્ ।
રવિસ્સ્યાદનુયાતવ્યો યાવદસ્તં મહાગિરિમ્ ॥ 4 ॥
અથાઽવાં યુગપત્પ્રાપ્તાવપશ્યાવ મહીતલે ।
રથચક્રપ્રમાણાનિ નગરાણિ પૃથક્પૃથક્ ॥ 5 ॥
ક્વચિદ્વાદિત્રઘોષાંશ્ચ બ્રહ્મઘોષાંશ્ચ શુશ્રુવઃ ।
ગાયંતીશ્ચાંગના બહ્વીઃ પશ્યાવો રક્તવાસસઃ ॥ 6 ॥
તૂર્ણમુત્પત્ય ચાકાશમાદિત્યપથમાશ્રિતૌ ।
આવામાલોકયાવસ્તદ્વનં શાદ્વલસન્નિભમ્ ॥ 7 ॥
ઉપલૈરિવ સંછન્ના દૃશ્યતે ભૂશ્શિલોચ્ચયૈઃ ।
આપગાભિશ્ચ સંવીતા સૂત્રૈરિવ વસુંધરા ॥ 8 ॥
હિમવાંશ્ચૈવ વિંધ્યશ્ચ મેરુશ્ચ સુમહાન્નગઃ ।
ભૂતલે સંપ્રકાશંતે નાગા ઇવ જલાશયે ॥ 9 ॥
તીવ્રસ્સ્વેદશ્ચ ખેદશ્ચ ભયં ચાસીત્તદાઽઽવયોઃ ।
સમાવિશતિ મોહશ્ચ તમો મૂર્છા ચ દારુણા ॥ 10 ॥
ન દિગ્વિજ્ઞાયતે યામ્યા નાગ્નેયી ન ચ વારુણી ।
યુગાંતે નિયતો લોકો હતો દગ્ધ ઇવાગ્નિના ॥ 11 ॥
મનશ્ચ મે હતં ભૂયસ્સન્નિવર્ત્યતુ સંશ્રયમ્ ।
યત્નેન મહતા હ્યસ્મિન્પુનસ્સંધાય ચક્ષુષી ॥ 12 ॥
યત્નેન મહતા ભૂયો ભાસ્કરઃ પ્રતિલોકિતઃ ।
તુલ્યઃ પૃથ્વીપ્રમાણેન ભાસ્કરઃ પ્રતિભાતિ નૌ ॥ 13 ॥
જટાયુર્મામનાપૃચ્છ્ય નિપપાત મહીં તતઃ ।
તં દૃષ્ટ્વા તૂર્ણમાકાશાદાત્માનં મુક્તવાનહમ્ ॥ 14 ॥
પક્ષાભ્યાં ચ મયા ગુપ્તો જટાયુર્ન પ્રદહ્યતે ।
પ્રમાદાત્તત્ર નિર્દગ્ધઃ પતન્વાયુપથાદહમ્ ॥ 15 ॥
આશંકે તં નિપતિતં જનસ્થાને જટાયુષમ્ ।
અહં તુ પતિતો વિંધ્યે દગ્ધપક્ષો જડીકૃતઃ ॥ 16 ॥
રાજ્યેન હીનો ભ્રાત્રા ચ પક્ષાભ્યાં વિક્રમેણ ચ ।
સર્વથા મર્તુમેવેચ્છન્પતિષ્યે શિખરાદ્ગીરેઃ ॥ 17 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે એકષષ્ટિતમસ્સર્ગઃ ॥
