ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଏକଷଷ୍ଟିତମସ୍ସର୍ଗଃ ।
ତତସ୍ତଦ୍ଦାରୁଣଂ କର୍ମ ଦୁଷ୍କରଂ ସହସାତ୍କୃତମ୍ ।
ଆଚଚକ୍ଷେ ମୁନେସ୍ସର୍ଵଂ ସୂର୍ୟାନୁଗମନଂ ତଥା ॥ 1 ॥
ଭଗଵନ୍ଵ୍ରଣୟୁକ୍ତତ୍ଵାଲ୍ଲଜ୍ଜୟା ଵ୍ୟାକୁଲେଂଦ୍ରିୟଃ ।
ପରିଶ୍ରାଂତୋ ନ ଶକ୍ନୋମି ଵଚନଂ ପରିଭାଷିତୁମ୍ ॥ 2 ॥
ଅହଂ ଚୈଵ ଜଟାୟୁଶ୍ଚ ସଂଘର୍ଷାଦ୍ଧର୍ପମୋହିତୌ ।
ଆକାଶଂ ପତିତୌ ଵୀରୌ ଜିଜ୍ଞାସଂତୌ ପରାକ୍ରମମ୍ ॥ 3 ॥
କୈଲାସଶିଖରେ ବଦ୍ଧ୍ଵା ମୁନୀନାମଗ୍ରତଃ ପଣମ୍ ।
ରଵିସ୍ସ୍ୟାଦନୁୟାତଵ୍ୟୋ ୟାଵଦସ୍ତଂ ମହାଗିରିମ୍ ॥ 4 ॥
ଅଥାଽଵାଂ ୟୁଗପତ୍ପ୍ରାପ୍ତାଵପଶ୍ୟାଵ ମହୀତଲେ ।
ରଥଚକ୍ରପ୍ରମାଣାନି ନଗରାଣି ପୃଥକ୍ପୃଥକ୍ ॥ 5 ॥
କ୍ଵଚିଦ୍ଵାଦିତ୍ରଘୋଷାଂଶ୍ଚ ବ୍ରହ୍ମଘୋଷାଂଶ୍ଚ ଶୁଶ୍ରୁଵଃ ।
ଗାୟଂତୀଶ୍ଚାଂଗନା ବହ୍ଵୀଃ ପଶ୍ୟାଵୋ ରକ୍ତଵାସସଃ ॥ 6 ॥
ତୂର୍ଣମୁତ୍ପତ୍ୟ ଚାକାଶମାଦିତ୍ୟପଥମାଶ୍ରିତୌ ।
ଆଵାମାଲୋକୟାଵସ୍ତଦ୍ଵନଂ ଶାଦ୍ଵଲସନ୍ନିଭମ୍ ॥ 7 ॥
ଉପଲୈରିଵ ସଂଛନ୍ନା ଦୃଶ୍ୟତେ ଭୂଶ୍ଶିଲୋଚ୍ଚୟୈଃ ।
ଆପଗାଭିଶ୍ଚ ସଂଵୀତା ସୂତ୍ରୈରିଵ ଵସୁଂଧରା ॥ 8 ॥
ହିମଵାଂଶ୍ଚୈଵ ଵିଂଧ୍ୟଶ୍ଚ ମେରୁଶ୍ଚ ସୁମହାନ୍ନଗଃ ।
ଭୂତଲେ ସଂପ୍ରକାଶଂତେ ନାଗା ଇଵ ଜଲାଶୟେ ॥ 9 ॥
ତୀଵ୍ରସ୍ସ୍ଵେଦଶ୍ଚ ଖେଦଶ୍ଚ ଭୟଂ ଚାସୀତ୍ତଦାଽଽଵୟୋଃ ।
ସମାଵିଶତି ମୋହଶ୍ଚ ତମୋ ମୂର୍ଛା ଚ ଦାରୁଣା ॥ 10 ॥
ନ ଦିଗ୍ଵିଜ୍ଞାୟତେ ୟାମ୍ୟା ନାଗ୍ନେୟୀ ନ ଚ ଵାରୁଣୀ ।
ୟୁଗାଂତେ ନିୟତୋ ଲୋକୋ ହତୋ ଦଗ୍ଧ ଇଵାଗ୍ନିନା ॥ 11 ॥
ମନଶ୍ଚ ମେ ହତଂ ଭୂୟସ୍ସନ୍ନିଵର୍ତ୍ୟତୁ ସଂଶ୍ରୟମ୍ ।
ୟତ୍ନେନ ମହତା ହ୍ୟସ୍ମିନ୍ପୁନସ୍ସଂଧାୟ ଚକ୍ଷୁଷୀ ॥ 12 ॥
ୟତ୍ନେନ ମହତା ଭୂୟୋ ଭାସ୍କରଃ ପ୍ରତିଲୋକିତଃ ।
ତୁଲ୍ୟଃ ପୃଥ୍ଵୀପ୍ରମାଣେନ ଭାସ୍କରଃ ପ୍ରତିଭାତି ନୌ ॥ 13 ॥
ଜଟାୟୁର୍ମାମନାପୃଚ୍ଛ୍ୟ ନିପପାତ ମହୀଂ ତତଃ ।
ତଂ ଦୃଷ୍ଟ୍ଵା ତୂର୍ଣମାକାଶାଦାତ୍ମାନଂ ମୁକ୍ତଵାନହମ୍ ॥ 14 ॥
ପକ୍ଷାଭ୍ୟାଂ ଚ ମୟା ଗୁପ୍ତୋ ଜଟାୟୁର୍ନ ପ୍ରଦହ୍ୟତେ ।
ପ୍ରମାଦାତ୍ତତ୍ର ନିର୍ଦଗ୍ଧଃ ପତନ୍ଵାୟୁପଥାଦହମ୍ ॥ 15 ॥
ଆଶଂକେ ତଂ ନିପତିତଂ ଜନସ୍ଥାନେ ଜଟାୟୁଷମ୍ ।
ଅହଂ ତୁ ପତିତୋ ଵିଂଧ୍ୟେ ଦଗ୍ଧପକ୍ଷୋ ଜଡୀକୃତଃ ॥ 16 ॥
ରାଜ୍ୟେନ ହୀନୋ ଭ୍ରାତ୍ରା ଚ ପକ୍ଷାଭ୍ୟାଂ ଵିକ୍ରମେଣ ଚ ।
ସର୍ଵଥା ମର୍ତୁମେଵେଚ୍ଛନ୍ପତିଷ୍ୟେ ଶିଖରାଦ୍ଗୀରେଃ ॥ 17 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଏକଷଷ୍ଟିତମସ୍ସର୍ଗଃ ॥
