ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ഏകവിംശസ്സര്ഗഃ ।
തതോ നിപതിതാം താരാം ച്യുതാം താരാമിവാംബരാത് ।
ശനൈരാശ്വാസയാമാസ ഹനുമാന്ഹരിയൂഥപഃ ॥ 1 ॥
ഗുണദോഷകൃതം ജംതുസ്സ്വകര്മ ഫലഹേതുകമ് ।
അവ്യഗ്രസ്തദവാപ്നോതി സർവം പ്രേത്യ ശുഭാശുഭമ് ॥ 2 ॥
ശോച്യാ ശോചസി കം ശോച്യം ദീനം ദീനാഽനുകംപസേ ।
കസ്യ കോവാഽനുശോച്യോഽസ്തി ദേഹേഽസ്മിന് ബുദ്ബുദോപമേ ॥ 3 ॥
അംഗദസ്തു കുമാരോഽയം ദ്രഷ്ടവ്യോ ജീവപുത്രയാ ।
അയത്യാം ച വിധേയാനി സമര്ഥാന്യസ്യ ചിംതയ ॥ 4 ॥
ജാനാസ്യനിയതാമേവം ഭൂതാനാമാഗതിം ഗതിമ് ।
തസ്മാച്ഛുഭം ഹി കര്തവ്യം പംഡിതേനൈഹ ലൌകികമ് ॥ 5 ॥
യസ്മിന്ഹരിസഹസ്രാണി പ്രയുതാന്യര്ബുദാനി ച ।
വര്തയംതി കൃതാംശാനി സോഽയം ദിഷ്ടാംതമാഗതഃ ॥ 6 ॥
യദയം ന്യായദൃഷ്ടാര്ഥസ്സാമദാനക്ഷമാപരഃ ।
ഗതോ ധര്മജിതാം ഭൂമിം നൈനം ശോചിതുമര്ഹസി ॥ 7 ॥
സർവേ ഹി ഹരിശാര്ദൂലാഃ പുത്രശ്ചായം തവാംഗദഃ ।
ഇദം ഹര്യൃക്ഷപതിരാജ്യം ച ത്വത്സനാഥമനിംദിതേ ॥ 8 ॥
താവിമൌ ശോകസംതപ്തൌ ശനൈഃ പ്രേരയ ഭാമിനി ।
ത്വയാ പരിഗൃഹീതോഽയമംഗദശ്ശാസ്തു മേദിനീമ് ॥ 9 ॥
സംതതിശ്ച യഥാ ദൃഷ്ടാ കൃത്യം യച്ചാപി സാംപ്രതമ് ।
രാജ്ഞസ്തത്ക്രിയതാം സർവമേഷ കാലസ്യ നിശ്ചയഃ ॥ 10 ॥
സംസ്കാര്യോ ഹരിരാജശ്ച അംഗദശ്ചാഭിഷിച്യതാമ് ।
സിംഹാസനഗതം പുത്രം പശ്യംതീ ശാംതിമേഷ്യസി ॥ 11 ॥
സാ തസ്യ വചനം ശ്രുത്വാ ഭര്തൃവ്യസനപീഡിതാ ।
അബ്രവീദുത്തരം താരാ ഹനൂമംതമവസ്ഥിതമ് ॥ 12 ॥
അംഗദപ്രതിരൂപാണാം പുത്രാണാമേകതശ്ശതമ് ।
ഹതസ്യാപ്യസ്യ വീരസ്യ ഗാത്രസംശ്ലേഷണം വരമ് ॥ 13 ॥
ന ചാഹം ഹരിരാജസ്യ പ്രഭവാമ്യംഗദസ്യ വാ ।
പിതൃവ്യസ്തസ്യ സുഗ്രീവസ്സർവകാര്യേഷ്വനംതരഃ ॥ 14 ॥
ന ഹ്യേഷാബുദ്ധിരാസ്ഥേയാ ഹനൂമന്നംഗദം പ്രതി ।
പിതാ ഹി ബംധുഃ പുത്രസ്യ ന മാതാ ഹരിസത്തമ ॥ 15 ॥
ന ഹി മമ ഹരിരാജസംശ്രയാത് ക്ഷമതരമസ്തി പരത്ര ചേഹ വാ ।
അഭിമുഖഹതവീരസേവിതം ശയനമിദം മമ സേവിതും ക്ഷമമ് ॥ 16 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ഏകവിംശസ്സര്ഗഃ ॥
