શ્રીમદ્વાલ્મીકીય રામાયણે કિષ્કિંધાકાંડમ્ ।
અથ એકવિંશસ્સર્ગઃ ।
તતો નિપતિતાં તારાં ચ્યુતાં તારામિવાંબરાત્ ।
શનૈરાશ્વાસયામાસ હનુમાન્હરિયૂથપઃ ॥ 1 ॥
ગુણદોષકૃતં જંતુસ્સ્વકર્મ ફલહેતુકમ્ ।
અવ્યગ્રસ્તદવાપ્નોતિ સર્વં પ્રેત્ય શુભાશુભમ્ ॥ 2 ॥
શોચ્યા શોચસિ કં શોચ્યં દીનં દીનાઽનુકંપસે ।
કસ્ય કોવાઽનુશોચ્યોઽસ્તિ દેહેઽસ્મિન્ બુદ્બુદોપમે ॥ 3 ॥
અંગદસ્તુ કુમારોઽયં દ્રષ્ટવ્યો જીવપુત્રયા ।
અયત્યાં ચ વિધેયાનિ સમર્થાન્યસ્ય ચિંતય ॥ 4 ॥
જાનાસ્યનિયતામેવં ભૂતાનામાગતિં ગતિમ્ ।
તસ્માચ્છુભં હિ કર્તવ્યં પંડિતેનૈહ લૌકિકમ્ ॥ 5 ॥
યસ્મિન્હરિસહસ્રાણિ પ્રયુતાન્યર્બુદાનિ ચ ।
વર્તયંતિ કૃતાંશાનિ સોઽયં દિષ્ટાંતમાગતઃ ॥ 6 ॥
યદયં ન્યાયદૃષ્ટાર્થસ્સામદાનક્ષમાપરઃ ।
ગતો ધર્મજિતાં ભૂમિં નૈનં શોચિતુમર્હસિ ॥ 7 ॥
સર્વે હિ હરિશાર્દૂલાઃ પુત્રશ્ચાયં તવાંગદઃ ।
ઇદં હર્યૃક્ષપતિરાજ્યં ચ ત્વત્સનાથમનિંદિતે ॥ 8 ॥
તાવિમૌ શોકસંતપ્તૌ શનૈઃ પ્રેરય ભામિનિ ।
ત્વયા પરિગૃહીતોઽયમંગદશ્શાસ્તુ મેદિનીમ્ ॥ 9 ॥
સંતતિશ્ચ યથા દૃષ્ટા કૃત્યં યચ્ચાપિ સાંપ્રતમ્ ।
રાજ્ઞસ્તત્ક્રિયતાં સર્વમેષ કાલસ્ય નિશ્ચયઃ ॥ 10 ॥
સંસ્કાર્યો હરિરાજશ્ચ અંગદશ્ચાભિષિચ્યતામ્ ।
સિંહાસનગતં પુત્રં પશ્યંતી શાંતિમેષ્યસિ ॥ 11 ॥
સા તસ્ય વચનં શ્રુત્વા ભર્તૃવ્યસનપીડિતા ।
અબ્રવીદુત્તરં તારા હનૂમંતમવસ્થિતમ્ ॥ 12 ॥
અંગદપ્રતિરૂપાણાં પુત્રાણામેકતશ્શતમ્ ।
હતસ્યાપ્યસ્ય વીરસ્ય ગાત્રસંશ્લેષણં વરમ્ ॥ 13 ॥
ન ચાહં હરિરાજસ્ય પ્રભવામ્યંગદસ્ય વા ।
પિતૃવ્યસ્તસ્ય સુગ્રીવસ્સર્વકાર્યેષ્વનંતરઃ ॥ 14 ॥
ન હ્યેષાબુદ્ધિરાસ્થેયા હનૂમન્નંગદં પ્રતિ ।
પિતા હિ બંધુઃ પુત્રસ્ય ન માતા હરિસત્તમ ॥ 15 ॥
ન હિ મમ હરિરાજસંશ્રયાત્ ક્ષમતરમસ્તિ પરત્ર ચેહ વા ।
અભિમુખહતવીરસેવિતં શયનમિદં મમ સેવિતું ક્ષમમ્ ॥ 16 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે એકવિંશસ્સર્ગઃ ॥
