ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ඒකවිංශස්සර්ගඃ ।
තතෝ නිපතිතාං තාරාං ච්යුතාං තාරාමිවාංබරාත් ।
ශනෛරාශ්වාසයාමාස හනුමාන්හරියූථපඃ ॥ 1 ॥
ගුණදෝෂකෘතං ජංතුස්ස්වකර්ම ඵලහේතුකම් ।
අව්යග්රස්තදවාප්නෝති සර්වං ප්රේත්ය ශුභාශුභම් ॥ 2 ॥
ශෝච්යා ශෝචසි කං ශෝච්යං දීනං දීනාऽනුකංපසේ ।
කස්ය කෝවාऽනුශෝච්යෝऽස්ති දේහේऽස්මින් බුද්බුදෝපමේ ॥ 3 ॥
අංගදස්තු කුමාරෝऽයං ද්රෂ්ටව්යෝ ජීවපුත්රයා ।
අයත්යාං ච විධේයානි සමර්ථාන්යස්ය චිංතය ॥ 4 ॥
ජානාස්යනියතාමේවං භූතානාමාගතිං ගතිම් ।
තස්මාච්ඡුභං හි කර්තව්යං පංඩිතේනෛහ ලෞකිකම් ॥ 5 ॥
යස්මින්හරිසහස්රාණි ප්රයුතාන්යර්බුදානි ච ।
වර්තයංති කෘතාංශානි සෝऽයං දිෂ්ටාංතමාගතඃ ॥ 6 ॥
යදයං න්යායදෘෂ්ටාර්ථස්සාමදානක්ෂමාපරඃ ।
ගතෝ ධර්මජිතාං භූමිං නෛනං ශෝචිතුමර්හසි ॥ 7 ॥
සර්වේ හි හරිශාර්දූලාඃ පුත්රශ්චායං තවාංගදඃ ।
ඉදං හර්යෘක්ෂපතිරාජ්යං ච ත්වත්සනාථමනිංදිතේ ॥ 8 ॥
තාවිමෞ ශෝකසංතප්තෞ ශනෛඃ ප්රේරය භාමිනි ।
ත්වයා පරිගෘහීතෝऽයමංගදශ්ශාස්තු මේදිනීම් ॥ 9 ॥
සංතතිශ්ච යථා දෘෂ්ටා කෘත්යං යච්චාපි සාංප්රතම් ।
රාජ්ඤස්තත්ක්රියතාං සර්වමේෂ කාලස්ය නිශ්චයඃ ॥ 10 ॥
සංස්කාර්යෝ හරිරාජශ්ච අංගදශ්චාභිෂිච්යතාම් ।
සිංහාසනගතං පුත්රං පශ්යංතී ශාංතිමේෂ්යසි ॥ 11 ॥
සා තස්ය වචනං ශ්රුත්වා භර්තෘව්යසනපීඩිතා ।
අබ්රවීදුත්තරං තාරා හනූමංතමවස්ථිතම් ॥ 12 ॥
අංගදප්රතිරූපාණාං පුත්රාණාමේකතශ්ශතම් ।
හතස්යාප්යස්ය වීරස්ය ගාත්රසංශ්ලේෂණං වරම් ॥ 13 ॥
න චාහං හරිරාජස්ය ප්රභවාම්යංගදස්ය වා ।
පිතෘව්යස්තස්ය සුග්රීවස්සර්වකාර්යේෂ්වනංතරඃ ॥ 14 ॥
න හ්යේෂාබුද්ධිරාස්ථේයා හනූමන්නංගදං ප්රති ।
පිතා හි බංධුඃ පුත්රස්ය න මාතා හරිසත්තම ॥ 15 ॥
න හි මම හරිරාජසංශ්රයාත් ක්ෂමතරමස්ති පරත්ර චේහ වා ।
අභිමුඛහතවීරසේවිතං ශයනමිදං මම සේවිතුං ක්ෂමම් ॥ 16 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ඒකවිංශස්සර්ගඃ ॥
