శ్రీమద్వాల్మీకీయ రామాయణే కిష్కింధాకాండమ్ ।
అథ ఏకవింశస్సర్గః ।
తతో నిపతితాం తారాం చ్యుతాం తారామివాంబరాత్ ।
శనైరాశ్వాసయామాస హనుమాన్హరియూథపః ॥ 1 ॥
గుణదోషకృతం జంతుస్స్వకర్మ ఫలహేతుకమ్ ।
అవ్యగ్రస్తదవాప్నోతి సర్వం ప్రేత్య శుభాశుభమ్ ॥ 2 ॥
శోచ్యా శోచసి కం శోచ్యం దీనం దీనాఽనుకంపసే ।
కస్య కోవాఽనుశోచ్యోఽస్తి దేహేఽస్మిన్ బుద్బుదోపమే ॥ 3 ॥
అంగదస్తు కుమారోఽయం ద్రష్టవ్యో జీవపుత్రయా ।
అయత్యాం చ విధేయాని సమర్థాన్యస్య చింతయ ॥ 4 ॥
జానాస్యనియతామేవం భూతానామాగతిం గతిమ్ ।
తస్మాచ్ఛుభం హి కర్తవ్యం పండితేనైహ లౌకికమ్ ॥ 5 ॥
యస్మిన్హరిసహస్రాణి ప్రయుతాన్యర్బుదాని చ ।
వర్తయంతి కృతాంశాని సోఽయం దిష్టాంతమాగతః ॥ 6 ॥
యదయం న్యాయదృష్టార్థస్సామదానక్షమాపరః ।
గతో ధర్మజితాం భూమిం నైనం శోచితుమర్హసి ॥ 7 ॥
సర్వే హి హరిశార్దూలాః పుత్రశ్చాయం తవాంగదః ।
ఇదం హర్యృక్షపతిరాజ్యం చ త్వత్సనాథమనిందితే ॥ 8 ॥
తావిమౌ శోకసంతప్తౌ శనైః ప్రేరయ భామిని ।
త్వయా పరిగృహీతోఽయమంగదశ్శాస్తు మేదినీమ్ ॥ 9 ॥
సంతతిశ్చ యథా దృష్టా కృత్యం యచ్చాపి సాంప్రతమ్ ।
రాజ్ఞస్తత్క్రియతాం సర్వమేష కాలస్య నిశ్చయః ॥ 10 ॥
సంస్కార్యో హరిరాజశ్చ అంగదశ్చాభిషిచ్యతామ్ ।
సింహాసనగతం పుత్రం పశ్యంతీ శాంతిమేష్యసి ॥ 11 ॥
సా తస్య వచనం శ్రుత్వా భర్తృవ్యసనపీడితా ।
అబ్రవీదుత్తరం తారా హనూమంతమవస్థితమ్ ॥ 12 ॥
అంగదప్రతిరూపాణాం పుత్రాణామేకతశ్శతమ్ ।
హతస్యాప్యస్య వీరస్య గాత్రసంశ్లేషణం వరమ్ ॥ 13 ॥
న చాహం హరిరాజస్య ప్రభవామ్యంగదస్య వా ।
పితృవ్యస్తస్య సుగ్రీవస్సర్వకార్యేష్వనంతరః ॥ 14 ॥
న హ్యేషాబుద్ధిరాస్థేయా హనూమన్నంగదం ప్రతి ।
పితా హి బంధుః పుత్రస్య న మాతా హరిసత్తమ ॥ 15 ॥
న హి మమ హరిరాజసంశ్రయాత్ క్షమతరమస్తి పరత్ర చేహ వా ।
అభిముఖహతవీరసేవితం శయనమిదం మమ సేవితుం క్షమమ్ ॥ 16 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కింధాకాండే ఏకవింశస్సర్గః ॥
