śrīmadvālmīkīya rāmāyaṇē kiṣkindhākāṇḍam ।
atha ēkaviṃśassargaḥ ।
tatō nipatitāṃ tārāṃ chyutāṃ tārāmivāmbarāt ।
śanairāśvāsayāmāsa hanumānhariyūthapaḥ ॥ 1 ॥
guṇadōṣakṛtaṃ jantussvakarma phalahētukam ।
avyagrastadavāpnōti sarvaṃ prētya śubhāśubham ॥ 2 ॥
śōchyā śōchasi kaṃ śōchyaṃ dīnaṃ dīnā'nukampasē ।
kasya kōvā'nuśōchyō'sti dēhē'smin budbudōpamē ॥ 3 ॥
aṅgadastu kumārō'yaṃ draṣṭavyō jīvaputrayā ।
ayatyāṃ cha vidhēyāni samarthānyasya chintaya ॥ 4 ॥
jānāsyaniyatāmēvaṃ bhūtānāmāgatiṃ gatim ।
tasmāchChubhaṃ hi kartavyaṃ paṇḍitēnaiha laukikam ॥ 5 ॥
yasminharisahasrāṇi prayutānyarbudāni cha ।
vartayanti kṛtāṃśāni sō'yaṃ diṣṭāntamāgataḥ ॥ 6 ॥
yadayaṃ nyāyadṛṣṭārthassāmadānakṣamāparaḥ ।
gatō dharmajitāṃ bhūmiṃ nainaṃ śōchitumarhasi ॥ 7 ॥
sarvē hi hariśārdūlāḥ putraśchāyaṃ tavāṅgadaḥ ।
idaṃ haryṛkṣapatirājyaṃ cha tvatsanāthamaninditē ॥ 8 ॥
tāvimau śōkasantaptau śanaiḥ prēraya bhāmini ।
tvayā parigṛhītō'yamaṅgadaśśāstu mēdinīm ॥ 9 ॥
santatiścha yathā dṛṣṭā kṛtyaṃ yachchāpi sāmpratam ।
rājñastatkriyatāṃ sarvamēṣa kālasya niśchayaḥ ॥ 10 ॥
saṃskāryō harirājaścha aṅgadaśchābhiṣichyatām ।
siṃhāsanagataṃ putraṃ paśyantī śāntimēṣyasi ॥ 11 ॥
sā tasya vachanaṃ śrutvā bhartṛvyasanapīḍitā ।
abravīduttaraṃ tārā hanūmantamavasthitam ॥ 12 ॥
aṅgadapratirūpāṇāṃ putrāṇāmēkataśśatam ।
hatasyāpyasya vīrasya gātrasaṃślēṣaṇaṃ varam ॥ 13 ॥
na chāhaṃ harirājasya prabhavāmyaṅgadasya vā ।
pitṛvyastasya sugrīvassarvakāryēṣvanantaraḥ ॥ 14 ॥
na hyēṣābuddhirāsthēyā hanūmannaṅgadaṃ prati ।
pitā hi bandhuḥ putrasya na mātā harisattama ॥ 15 ॥
na hi mama harirājasaṃśrayāt kṣamataramasti paratra chēha vā ।
abhimukhahatavīrasēvitaṃ śayanamidaṃ mama sēvituṃ kṣamam ॥ 16 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē ēkaviṃśassargaḥ ॥
