ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଏକଵିଂଶସ୍ସର୍ଗଃ ।
ତତୋ ନିପତିତାଂ ତାରାଂ ଚ୍ୟୁତାଂ ତାରାମିଵାଂବରାତ୍ ।
ଶନୈରାଶ୍ଵାସୟାମାସ ହନୁମାନ୍ହରିୟୂଥପଃ ॥ 1 ॥
ଗୁଣଦୋଷକୃତଂ ଜଂତୁସ୍ସ୍ଵକର୍ମ ଫଲହେତୁକମ୍ ।
ଅଵ୍ୟଗ୍ରସ୍ତଦଵାପ୍ନୋତି ସର୍ଵଂ ପ୍ରେତ୍ୟ ଶୁଭାଶୁଭମ୍ ॥ 2 ॥
ଶୋଚ୍ୟା ଶୋଚସି କଂ ଶୋଚ୍ୟଂ ଦୀନଂ ଦୀନାଽନୁକଂପସେ ।
କସ୍ୟ କୋଵାଽନୁଶୋଚ୍ୟୋଽସ୍ତି ଦେହେଽସ୍ମିନ୍ ବୁଦ୍ବୁଦୋପମେ ॥ 3 ॥
ଅଂଗଦସ୍ତୁ କୁମାରୋଽୟଂ ଦ୍ରଷ୍ଟଵ୍ୟୋ ଜୀଵପୁତ୍ରୟା ।
ଅୟତ୍ୟାଂ ଚ ଵିଧେୟାନି ସମର୍ଥାନ୍ୟସ୍ୟ ଚିଂତୟ ॥ 4 ॥
ଜାନାସ୍ୟନିୟତାମେଵଂ ଭୂତାନାମାଗତିଂ ଗତିମ୍ ।
ତସ୍ମାଚ୍ଛୁଭଂ ହି କର୍ତଵ୍ୟଂ ପଂଡିତେନୈହ ଲୌକିକମ୍ ॥ 5 ॥
ୟସ୍ମିନ୍ହରିସହସ୍ରାଣି ପ୍ରୟୁତାନ୍ୟର୍ବୁଦାନି ଚ ।
ଵର୍ତୟଂତି କୃତାଂଶାନି ସୋଽୟଂ ଦିଷ୍ଟାଂତମାଗତଃ ॥ 6 ॥
ୟଦୟଂ ନ୍ୟାୟଦୃଷ୍ଟାର୍ଥସ୍ସାମଦାନକ୍ଷମାପରଃ ।
ଗତୋ ଧର୍ମଜିତାଂ ଭୂମିଂ ନୈନଂ ଶୋଚିତୁମର୍ହସି ॥ 7 ॥
ସର୍ଵେ ହି ହରିଶାର୍ଦୂଲାଃ ପୁତ୍ରଶ୍ଚାୟଂ ତଵାଂଗଦଃ ।
ଇଦଂ ହର୍ୟୃକ୍ଷପତିରାଜ୍ୟଂ ଚ ତ୍ଵତ୍ସନାଥମନିଂଦିତେ ॥ 8 ॥
ତାଵିମୌ ଶୋକସଂତପ୍ତୌ ଶନୈଃ ପ୍ରେରୟ ଭାମିନି ।
ତ୍ଵୟା ପରିଗୃହୀତୋଽୟମଂଗଦଶ୍ଶାସ୍ତୁ ମେଦିନୀମ୍ ॥ 9 ॥
ସଂତତିଶ୍ଚ ୟଥା ଦୃଷ୍ଟା କୃତ୍ୟଂ ୟଚ୍ଚାପି ସାଂପ୍ରତମ୍ ।
ରାଜ୍ଞସ୍ତତ୍କ୍ରିୟତାଂ ସର୍ଵମେଷ କାଲସ୍ୟ ନିଶ୍ଚୟଃ ॥ 10 ॥
ସଂସ୍କାର୍ୟୋ ହରିରାଜଶ୍ଚ ଅଂଗଦଶ୍ଚାଭିଷିଚ୍ୟତାମ୍ ।
ସିଂହାସନଗତଂ ପୁତ୍ରଂ ପଶ୍ୟଂତୀ ଶାଂତିମେଷ୍ୟସି ॥ 11 ॥
ସା ତସ୍ୟ ଵଚନଂ ଶ୍ରୁତ୍ଵା ଭର୍ତୃଵ୍ୟସନପୀଡିତା ।
ଅବ୍ରଵୀଦୁତ୍ତରଂ ତାରା ହନୂମଂତମଵସ୍ଥିତମ୍ ॥ 12 ॥
ଅଂଗଦପ୍ରତିରୂପାଣାଂ ପୁତ୍ରାଣାମେକତଶ୍ଶତମ୍ ।
ହତସ୍ୟାପ୍ୟସ୍ୟ ଵୀରସ୍ୟ ଗାତ୍ରସଂଶ୍ଲେଷଣଂ ଵରମ୍ ॥ 13 ॥
ନ ଚାହଂ ହରିରାଜସ୍ୟ ପ୍ରଭଵାମ୍ୟଂଗଦସ୍ୟ ଵା ।
ପିତୃଵ୍ୟସ୍ତସ୍ୟ ସୁଗ୍ରୀଵସ୍ସର୍ଵକାର୍ୟେଷ୍ଵନଂତରଃ ॥ 14 ॥
ନ ହ୍ୟେଷାବୁଦ୍ଧିରାସ୍ଥେୟା ହନୂମନ୍ନଂଗଦଂ ପ୍ରତି ।
ପିତା ହି ବଂଧୁଃ ପୁତ୍ରସ୍ୟ ନ ମାତା ହରିସତ୍ତମ ॥ 15 ॥
ନ ହି ମମ ହରିରାଜସଂଶ୍ରୟାତ୍ କ୍ଷମତରମସ୍ତି ପରତ୍ର ଚେହ ଵା ।
ଅଭିମୁଖହତଵୀରସେଵିତଂ ଶୟନମିଦଂ ମମ ସେଵିତୁଂ କ୍ଷମମ୍ ॥ 16 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଏକଵିଂଶସ୍ସର୍ଗଃ ॥
