ശ്രീമദ്വാല്മീകീയ രാമായണേ സുംദരകാംഡമ് ।
അഥ ദ്വാത്രിംശസ്സര്ഗഃ ।
തതശ്ശാഖാംതരേ ലീനം ദൃഷ്ട്വാ ചലിതമാനസാ ।
വേഷ്ടിതാര്ജുനവസ്ത്രം തം വിദ്യുത്സംഘാതപിംഗലമ് ॥ 1 ॥
സാ ദദര്ശ കപിം തത്ര പ്രശ്രിതം പ്രിയവാദിനമ് ।
ഫുല്ലാശോകോത്കരാഭാസം തപ്തചാമീകരേക്ഷണമ് ॥ 2 ॥
മൈഥിലീ ചിംതയാമാസ വിസ്മയം പരമം ഗതാ ।
അഹോ ഭീമമിദം രൂപം വാനരസ്യ ദുരാസദമ് ॥ 3 ॥
ദുര്നിരീക്ഷമിതി ജ്ഞാത്വാ പുനരേവ മുമോഹ സാ ।
വിലലാപ ഭൃശം സീതാ കരുണം ഭയമോഹിതാ ॥ 4 ॥
രാമരാമേതി ദുഃഖാര്താ ലക്ഷ്മണേതി ച ഭാമിനീ ।
രുരോദ ബഹുധാ സീതാ മംദം മംദസ്വരാ സതീ ॥ 5 ॥
സാ തം ദൃഷ്ട്വാ ഹരിശ്രേഷ്ഠം വിനീതവദുപസ്ഥിതമ് ।
മൈഥിലീ ചിംതയാമാസ സ്വപ്നോഽയമിതി ഭാമിനീ ॥ 6 ॥
സാ വീക്ഷമാണാ പൃഥുഭുഗ്നവക്ത്രം ശാഖാമൃഗേംദ്രസ്യ യഥോക്തകാരമ് ।
ദദര്ശ പിംഗാധിപതേ രമാത്യം വാതാത്മജം ബുദ്ധിമതാം വരിഷ്ഠമ് ॥ 7 ॥
സാ തം സമീക്ഷ്യൈവ ഭൃശം വിസംജ്ഞാ ഗതാസുകല്പേന ബഭൂവ സീതാ ।
ചിരേണ സംജ്ഞാം പ്രതിലഭ്യ ഭൂയോ വിചിംതയാമാസ വിശാലനേത്രാ ॥ 8 ॥
സ്വപ്നേ മയാഽയം വികൃതോഽദ്യ ദൃഷ്ടശ്ശാഖാമൃഗശ്ശാസ്ത്രഗണൈര്നിഷിദ്ധഃ ।
സ്വസ്ത്യസ്തു രാമായ സ ലക്ഷ്മണായ തഥാ പിതുര്മേ ജനകസ്യ രാജ്ഞഃ ॥ 9 ॥
സ്വപ്നോഽപി നായം നഹി മേഽസ്തി നിദ്രാ ശോകേന ദുഃഖേന ച പീഡിതായാഃ ।
സുഖം ഹി മേ നാസ്തി യതോഽസ്മി ഹീനാ തേനേംദുപൂര്ണപ്രതിമാനനേന ॥ 10 ॥
രാമേതി രാമേതി സദൈവ ബുദ്ധ്യാ വിചിംത്യ വാചാ ബ്രുവതീ തമേവ ।
തസ്യാനുരൂപാം ച കഥാം തദര്ഥമേവം പ്രപശ്യാമി തഥാ ശൃണോമി ॥ 11 ॥
അഹം ഹി തസ്യാദ്യ മനോഭവേന സംപീഡിതാ തദ്ഗതസർവഭാവാ ।
വിചിംതയംതീ സതതം തമേവ തഥൈവ പശ്യാമി തഥാ ശൃണോമി ॥ 12 ॥
മനോരഥസ്സ്യാദിതി ചിംതയാമി തഥാപി ബുദ്ധ്യാ ച വിതര്കയാമി ।
കിം കാരണം തസ്യ ഹി നാസ്തി രൂപം സുവ്യക്തരൂപശ്ച വദത്യയം മാമ് ॥ 13 ॥
നമോഽസ്തു വാചസ്പതയേ സവജ്രിണേ സ്വയംഭുവേ ചൈവ ഹുതാശനായ ച ।
അനേന ചോക്തം യദിദം മമാഗ്രതോ വനൌകസാ തച്ഛ തഥാസ്തു നാന്യഥാ ॥ 14 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ ദ്വാത്രിംശസ്സര്ഗഃ ॥
