ශ්රීමද්වාල්මීකීය රාමායණේ සුංදරකාංඩම් ।
අථ ද්වාත්රිංශස්සර්ගඃ ।
තතශ්ශාඛාංතරේ ලීනං දෘෂ්ට්වා චලිතමානසා ।
වේෂ්ටිතාර්ජුනවස්ත්රං තං විද්යුත්සංඝාතපිංගලම් ॥ 1 ॥
සා දදර්ශ කපිං තත්ර ප්රශ්රිතං ප්රියවාදිනම් ।
ඵුල්ලාශෝකෝත්කරාභාසං තප්තචාමීකරේක්ෂණම් ॥ 2 ॥
මෛථිලී චිංතයාමාස විස්මයං පරමං ගතා ।
අහෝ භීමමිදං රූපං වානරස්ය දුරාසදම් ॥ 3 ॥
දුර්නිරීක්ෂමිති ජ්ඤාත්වා පුනරේව මුමෝහ සා ।
විලලාප භෘශං සීතා කරුණං භයමෝහිතා ॥ 4 ॥
රාමරාමේති දුඃඛාර්තා ලක්ෂ්මණේති ච භාමිනී ।
රුරෝද බහුධා සීතා මංදං මංදස්වරා සතී ॥ 5 ॥
සා තං දෘෂ්ට්වා හරිශ්රේෂ්ඨං විනීතවදුපස්ථිතම් ।
මෛථිලී චිංතයාමාස ස්වප්නෝऽයමිති භාමිනී ॥ 6 ॥
සා වීක්ෂමාණා පෘථුභුග්නවක්ත්රං ශාඛාමෘගේංද්රස්ය යථෝක්තකාරම් ।
දදර්ශ පිංගාධිපතේ රමාත්යං වාතාත්මජං බුද්ධිමතාං වරිෂ්ඨම් ॥ 7 ॥
සා තං සමීක්ෂ්යෛව භෘශං විසංජ්ඤා ගතාසුකල්පේන බභූව සීතා ।
චිරේණ සංජ්ඤාං ප්රතිලභ්ය භූයෝ විචිංතයාමාස විශාලනේත්රා ॥ 8 ॥
ස්වප්නේ මයාऽයං විකෘතෝऽද්ය දෘෂ්ටශ්ශාඛාමෘගශ්ශාස්ත්රගණෛර්නිෂිද්ධඃ ।
ස්වස්ත්යස්තු රාමාය ස ලක්ෂ්මණාය තථා පිතුර්මේ ජනකස්ය රාජ්ඤඃ ॥ 9 ॥
ස්වප්නෝऽපි නායං නහි මේऽස්ති නිද්රා ශෝකේන දුඃඛේන ච පීඩිතායාඃ ।
සුඛං හි මේ නාස්ති යතෝऽස්මි හීනා තේනේංදුපූර්ණප්රතිමානනේන ॥ 10 ॥
රාමේති රාමේති සදෛව බුද්ධ්යා විචිංත්ය වාචා බ්රුවතී තමේව ।
තස්යානුරූපාං ච කථාං තදර්ථමේවං ප්රපශ්යාමි තථා ශෘණෝමි ॥ 11 ॥
අහං හි තස්යාද්ය මනෝභවේන සංපීඩිතා තද්ගතසර්වභාවා ।
විචිංතයංතී සතතං තමේව තථෛව පශ්යාමි තථා ශෘණෝමි ॥ 12 ॥
මනෝරථස්ස්යාදිති චිංතයාමි තථාපි බුද්ධ්යා ච විතර්කයාමි ।
කිං කාරණං තස්ය හි නාස්ති රූපං සුව්යක්තරූපශ්ච වදත්යයං මාම් ॥ 13 ॥
නමෝऽස්තු වාචස්පතයේ සවජ්රිණේ ස්වයංභුවේ චෛව හුතාශනාය ච ।
අනේන චෝක්තං යදිදං මමාග්රතෝ වනෞකසා තච්ඡ තථාස්තු නාන්යථා ॥ 14 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ද්වාත්රිංශස්සර්ගඃ ॥
