ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଦ୍ଵାତ୍ରିଂଶସ୍ସର୍ଗଃ ।
ତତଶ୍ଶାଖାଂତରେ ଲୀନଂ ଦୃଷ୍ଟ୍ଵା ଚଲିତମାନସା ।
ଵେଷ୍ଟିତାର୍ଜୁନଵସ୍ତ୍ରଂ ତଂ ଵିଦ୍ୟୁତ୍ସଂଘାତପିଂଗଲମ୍ ॥ 1 ॥
ସା ଦଦର୍ଶ କପିଂ ତତ୍ର ପ୍ରଶ୍ରିତଂ ପ୍ରିୟଵାଦିନମ୍ ।
ଫୁଲ୍ଲାଶୋକୋତ୍କରାଭାସଂ ତପ୍ତଚାମୀକରେକ୍ଷଣମ୍ ॥ 2 ॥
ମୈଥିଲୀ ଚିଂତୟାମାସ ଵିସ୍ମୟଂ ପରମଂ ଗତା ।
ଅହୋ ଭୀମମିଦଂ ରୂପଂ ଵାନରସ୍ୟ ଦୁରାସଦମ୍ ॥ 3 ॥
ଦୁର୍ନିରୀକ୍ଷମିତି ଜ୍ଞାତ୍ଵା ପୁନରେଵ ମୁମୋହ ସା ।
ଵିଲଲାପ ଭୃଶଂ ସୀତା କରୁଣଂ ଭୟମୋହିତା ॥ 4 ॥
ରାମରାମେତି ଦୁଃଖାର୍ତା ଲକ୍ଷ୍ମଣେତି ଚ ଭାମିନୀ ।
ରୁରୋଦ ବହୁଧା ସୀତା ମଂଦଂ ମଂଦସ୍ଵରା ସତୀ ॥ 5 ॥
ସା ତଂ ଦୃଷ୍ଟ୍ଵା ହରିଶ୍ରେଷ୍ଠଂ ଵିନୀତଵଦୁପସ୍ଥିତମ୍ ।
ମୈଥିଲୀ ଚିଂତୟାମାସ ସ୍ଵପ୍ନୋଽୟମିତି ଭାମିନୀ ॥ 6 ॥
ସା ଵୀକ୍ଷମାଣା ପୃଥୁଭୁଗ୍ନଵକ୍ତ୍ରଂ ଶାଖାମୃଗେଂଦ୍ରସ୍ୟ ୟଥୋକ୍ତକାରମ୍ ।
ଦଦର୍ଶ ପିଂଗାଧିପତେ ରମାତ୍ୟଂ ଵାତାତ୍ମଜଂ ବୁଦ୍ଧିମତାଂ ଵରିଷ୍ଠମ୍ ॥ 7 ॥
ସା ତଂ ସମୀକ୍ଷ୍ୟୈଵ ଭୃଶଂ ଵିସଂଜ୍ଞା ଗତାସୁକଲ୍ପେନ ବଭୂଵ ସୀତା ।
ଚିରେଣ ସଂଜ୍ଞାଂ ପ୍ରତିଲଭ୍ୟ ଭୂୟୋ ଵିଚିଂତୟାମାସ ଵିଶାଲନେତ୍ରା ॥ 8 ॥
ସ୍ଵପ୍ନେ ମୟାଽୟଂ ଵିକୃତୋଽଦ୍ୟ ଦୃଷ୍ଟଶ୍ଶାଖାମୃଗଶ୍ଶାସ୍ତ୍ରଗଣୈର୍ନିଷିଦ୍ଧଃ ।
ସ୍ଵସ୍ତ୍ୟସ୍ତୁ ରାମାୟ ସ ଲକ୍ଷ୍ମଣାୟ ତଥା ପିତୁର୍ମେ ଜନକସ୍ୟ ରାଜ୍ଞଃ ॥ 9 ॥
ସ୍ଵପ୍ନୋଽପି ନାୟଂ ନହି ମେଽସ୍ତି ନିଦ୍ରା ଶୋକେନ ଦୁଃଖେନ ଚ ପୀଡିତାୟାଃ ।
ସୁଖଂ ହି ମେ ନାସ୍ତି ୟତୋଽସ୍ମି ହୀନା ତେନେଂଦୁପୂର୍ଣପ୍ରତିମାନନେନ ॥ 10 ॥
ରାମେତି ରାମେତି ସଦୈଵ ବୁଦ୍ଧ୍ୟା ଵିଚିଂତ୍ୟ ଵାଚା ବ୍ରୁଵତୀ ତମେଵ ।
ତସ୍ୟାନୁରୂପାଂ ଚ କଥାଂ ତଦର୍ଥମେଵଂ ପ୍ରପଶ୍ୟାମି ତଥା ଶୃଣୋମି ॥ 11 ॥
ଅହଂ ହି ତସ୍ୟାଦ୍ୟ ମନୋଭଵେନ ସଂପୀଡିତା ତଦ୍ଗତସର୍ଵଭାଵା ।
ଵିଚିଂତୟଂତୀ ସତତଂ ତମେଵ ତଥୈଵ ପଶ୍ୟାମି ତଥା ଶୃଣୋମି ॥ 12 ॥
ମନୋରଥସ୍ସ୍ୟାଦିତି ଚିଂତୟାମି ତଥାପି ବୁଦ୍ଧ୍ୟା ଚ ଵିତର୍କୟାମି ।
କିଂ କାରଣଂ ତସ୍ୟ ହି ନାସ୍ତି ରୂପଂ ସୁଵ୍ୟକ୍ତରୂପଶ୍ଚ ଵଦତ୍ୟୟଂ ମାମ୍ ॥ 13 ॥
ନମୋଽସ୍ତୁ ଵାଚସ୍ପତୟେ ସଵଜ୍ରିଣେ ସ୍ଵୟଂଭୁଵେ ଚୈଵ ହୁତାଶନାୟ ଚ ।
ଅନେନ ଚୋକ୍ତଂ ୟଦିଦଂ ମମାଗ୍ରତୋ ଵନୌକସା ତଚ୍ଛ ତଥାସ୍ତୁ ନାନ୍ୟଥା ॥ 14 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଦ୍ଵାତ୍ରିଂଶସ୍ସର୍ଗଃ ॥
