𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌾𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌤𑌶𑍍𑌶𑌾𑌖𑌾𑌂𑌤𑌰𑍇 𑌲𑍀𑌨𑌂 𑌦𑍃𑌷𑍍𑌟𑍍𑌵𑌾 𑌚𑌲𑌿𑌤𑌮𑌾𑌨𑌸𑌾 ।
𑌵𑍇𑌷𑍍𑌟𑌿𑌤𑌾𑌰𑍍𑌜𑍁𑌨𑌵𑌸𑍍𑌤𑍍𑌰𑌂 𑌤𑌂 𑌵𑌿𑌦𑍍𑌯𑍁𑌤𑍍𑌸𑌂𑌘𑌾𑌤𑌪𑌿𑌂𑌗𑌲𑌮𑍍 ॥ 1 ॥
𑌸𑌾 𑌦𑌦𑌰𑍍𑌶 𑌕𑌪𑌿𑌂 𑌤𑌤𑍍𑌰 𑌪𑍍𑌰𑌶𑍍𑌰𑌿𑌤𑌂 𑌪𑍍𑌰𑌿𑌯𑌵𑌾𑌦𑌿𑌨𑌮𑍍 ।
𑌫𑍁𑌲𑍍𑌲𑌾𑌶𑍋𑌕𑍋𑌤𑍍𑌕𑌰𑌾𑌭𑌾𑌸𑌂 𑌤𑌪𑍍𑌤𑌚𑌾𑌮𑍀𑌕𑌰𑍇𑌕𑍍𑌷𑌣𑌮𑍍 ॥ 2 ॥
𑌮𑍈𑌥𑌿𑌲𑍀 𑌚𑌿𑌂𑌤𑌯𑌾𑌮𑌾𑌸 𑌵𑌿𑌸𑍍𑌮𑌯𑌂 𑌪𑌰𑌮𑌂 𑌗𑌤𑌾 ।
𑌅𑌹𑍋 𑌭𑍀𑌮𑌮𑌿𑌦𑌂 𑌰𑍂𑌪𑌂 𑌵𑌾𑌨𑌰𑌸𑍍𑌯 𑌦𑍁𑌰𑌾𑌸𑌦𑌮𑍍 ॥ 3 ॥
𑌦𑍁𑌰𑍍𑌨𑌿𑌰𑍀𑌕𑍍𑌷𑌮𑌿𑌤𑌿 𑌜𑍍𑌞𑌾𑌤𑍍𑌵𑌾 𑌪𑍁𑌨𑌰𑍇𑌵 𑌮𑍁𑌮𑍋𑌹 𑌸𑌾 ।
𑌵𑌿𑌲𑌲𑌾𑌪 𑌭𑍃𑌶𑌂 𑌸𑍀𑌤𑌾 𑌕𑌰𑍁𑌣𑌂 𑌭𑌯𑌮𑍋𑌹𑌿𑌤𑌾 ॥ 4 ॥
𑌰𑌾𑌮𑌰𑌾𑌮𑍇𑌤𑌿 𑌦𑍁𑌃𑌖𑌾𑌰𑍍𑌤𑌾 𑌲𑌕𑍍𑌷𑍍𑌮𑌣𑍇𑌤𑌿 𑌚 𑌭𑌾𑌮𑌿𑌨𑍀 ।
𑌰𑍁𑌰𑍋𑌦 𑌬𑌹𑍁𑌧𑌾 𑌸𑍀𑌤𑌾 𑌮𑌂𑌦𑌂 𑌮𑌂𑌦𑌸𑍍𑌵𑌰𑌾 𑌸𑌤𑍀 ॥ 5 ॥
𑌸𑌾 𑌤𑌂 𑌦𑍃𑌷𑍍𑌟𑍍𑌵𑌾 𑌹𑌰𑌿𑌶𑍍𑌰𑍇𑌷𑍍𑌠𑌂 𑌵𑌿𑌨𑍀𑌤𑌵𑌦𑍁𑌪𑌸𑍍𑌥𑌿𑌤𑌮𑍍 ।
𑌮𑍈𑌥𑌿𑌲𑍀 𑌚𑌿𑌂𑌤𑌯𑌾𑌮𑌾𑌸 𑌸𑍍𑌵𑌪𑍍𑌨𑍋𑌽𑌯𑌮𑌿𑌤𑌿 𑌭𑌾𑌮𑌿𑌨𑍀 ॥ 6 ॥
𑌸𑌾 𑌵𑍀𑌕𑍍𑌷𑌮𑌾𑌣𑌾 𑌪𑍃𑌥𑍁𑌭𑍁𑌗𑍍𑌨𑌵𑌕𑍍𑌤𑍍𑌰𑌂 𑌶𑌾𑌖𑌾𑌮𑍃𑌗𑍇𑌂𑌦𑍍𑌰𑌸𑍍𑌯 𑌯𑌥𑍋𑌕𑍍𑌤𑌕𑌾𑌰𑌮𑍍 ।
𑌦𑌦𑌰𑍍𑌶 𑌪𑌿𑌂𑌗𑌾𑌧𑌿𑌪𑌤𑍇 𑌰𑌮𑌾𑌤𑍍𑌯𑌂 𑌵𑌾𑌤𑌾𑌤𑍍𑌮𑌜𑌂 𑌬𑍁𑌦𑍍𑌧𑌿𑌮𑌤𑌾𑌂 𑌵𑌰𑌿𑌷𑍍𑌠𑌮𑍍 ॥ ॥
𑌸𑌾 𑌤𑌂 𑌸𑌮𑍀𑌕𑍍𑌷𑍍𑌯𑍈𑌵 𑌭𑍃𑌶𑌂 𑌵𑌿𑌸𑌂𑌜𑍍𑌞𑌾 𑌗𑌤𑌾𑌸𑍁𑌕𑌲𑍍𑌪𑍇𑌨 𑌬𑌭𑍂𑌵 𑌸𑍀𑌤𑌾 ।
𑌚𑌿𑌰𑍇𑌣 𑌸𑌂𑌜𑍍𑌞𑌾𑌂 𑌪𑍍𑌰𑌤𑌿𑌲𑌭𑍍𑌯 𑌭𑍂𑌯𑍋 𑌵𑌿𑌚𑌿𑌂𑌤𑌯𑌾𑌮𑌾𑌸 𑌵𑌿𑌶𑌾𑌲𑌨𑍇𑌤𑍍𑌰𑌾 ॥ ॥
𑌸𑍍𑌵𑌪𑍍𑌨𑍇 𑌮𑌯𑌾𑌽𑌯𑌂 𑌵𑌿𑌕𑍃𑌤𑍋𑌽𑌦𑍍𑌯 𑌦𑍃𑌷𑍍𑌟𑌶𑍍𑌶𑌾𑌖𑌾𑌮𑍃𑌗𑌶𑍍𑌶𑌾𑌸𑍍𑌤𑍍𑌰𑌗𑌣𑍈𑌰𑍍𑌨𑌿𑌷𑌿𑌦𑍍𑌧𑌃 ।
𑌸𑍍𑌵𑌸𑍍𑌤𑍍𑌯𑌸𑍍𑌤𑍁 𑌰𑌾𑌮𑌾𑌯 𑌸 𑌲𑌕𑍍𑌷𑍍𑌮𑌣𑌾𑌯 𑌤𑌥𑌾 𑌪𑌿𑌤𑍁𑌰𑍍𑌮𑍇 𑌜𑌨𑌕𑌸𑍍𑌯 𑌰𑌾𑌜𑍍𑌞𑌃 ॥ ॥
𑌸𑍍𑌵𑌪𑍍𑌨𑍋𑌽𑌪𑌿 𑌨𑌾𑌯𑌂 𑌨𑌹𑌿 𑌮𑍇𑌽𑌸𑍍𑌤𑌿 𑌨𑌿𑌦𑍍𑌰𑌾 𑌶𑍋𑌕𑍇𑌨 𑌦𑍁𑌃𑌖𑍇𑌨 𑌚 𑌪𑍀𑌡𑌿𑌤𑌾𑌯𑌾𑌃 ।
𑌸𑍁𑌖𑌂 𑌹𑌿 𑌮𑍇 𑌨𑌾𑌸𑍍𑌤𑌿 𑌯𑌤𑍋𑌽𑌸𑍍𑌮𑌿 𑌹𑍀𑌨𑌾 𑌤𑍇𑌨𑍇𑌂𑌦𑍁𑌪𑍂𑌰𑍍𑌣𑌪𑍍𑌰𑌤𑌿𑌮𑌾𑌨𑌨𑍇𑌨 ॥ 10 ॥
𑌰𑌾𑌮𑍇𑌤𑌿 𑌰𑌾𑌮𑍇𑌤𑌿 𑌸𑌦𑍈𑌵 𑌬𑍁𑌦𑍍𑌧𑍍𑌯𑌾 𑌵𑌿𑌚𑌿𑌂𑌤𑍍𑌯 𑌵𑌾𑌚𑌾 𑌬𑍍𑌰𑍁𑌵𑌤𑍀 𑌤𑌮𑍇𑌵 ।
𑌤𑌸𑍍𑌯𑌾𑌨𑍁𑌰𑍂𑌪𑌾𑌂 𑌚 𑌕𑌥𑌾𑌂 𑌤𑌦𑌰𑍍𑌥𑌮𑍇𑌵𑌂 𑌪𑍍𑌰𑌪𑌶𑍍𑌯𑌾𑌮𑌿 𑌤𑌥𑌾 𑌶𑍃𑌣𑍋𑌮𑌿 ॥ 11 ॥
𑌅𑌹𑌂 𑌹𑌿 𑌤𑌸𑍍𑌯𑌾𑌦𑍍𑌯 𑌮𑌨𑍋𑌭𑌵𑍇𑌨 𑌸𑌂𑌪𑍀𑌡𑌿𑌤𑌾 𑌤𑌦𑍍𑌗𑌤𑌸𑌰𑍍𑌵𑌭𑌾𑌵𑌾 ।
𑌵𑌿𑌚𑌿𑌂𑌤𑌯𑌂𑌤𑍀 𑌸𑌤𑌤𑌂 𑌤𑌮𑍇𑌵 𑌤𑌥𑍈𑌵 𑌪𑌶𑍍𑌯𑌾𑌮𑌿 𑌤𑌥𑌾 𑌶𑍃𑌣𑍋𑌮𑌿 ॥ 12 ॥
𑌮𑌨𑍋𑌰𑌥𑌸𑍍𑌸𑍍𑌯𑌾𑌦𑌿𑌤𑌿 𑌚𑌿𑌂𑌤𑌯𑌾𑌮𑌿 𑌤𑌥𑌾𑌪𑌿 𑌬𑍁𑌦𑍍𑌧𑍍𑌯𑌾 𑌚 𑌵𑌿𑌤𑌰𑍍𑌕𑌯𑌾𑌮𑌿 ।
𑌕𑌿𑌂 𑌕𑌾𑌰𑌣𑌂 𑌤𑌸𑍍𑌯 𑌹𑌿 𑌨𑌾𑌸𑍍𑌤𑌿 𑌰𑍂𑌪𑌂 𑌸𑍁𑌵𑍍𑌯𑌕𑍍𑌤𑌰𑍂𑌪𑌶𑍍𑌚 𑌵𑌦𑌤𑍍𑌯𑌯𑌂 𑌮𑌾𑌮𑍍 ॥ 13 ॥
𑌨𑌮𑍋𑌽𑌸𑍍𑌤𑍁 𑌵𑌾𑌚𑌸𑍍𑌪𑌤𑌯𑍇 𑌸𑌵𑌜𑍍𑌰𑌿𑌣𑍇 𑌸𑍍𑌵𑌯𑌂𑌭𑍁𑌵𑍇 𑌚𑍈𑌵 𑌹𑍁𑌤𑌾𑌶𑌨𑌾𑌯 𑌚 ।
𑌅𑌨𑍇𑌨 𑌚𑍋𑌕𑍍𑌤𑌂 𑌯𑌦𑌿𑌦𑌂 𑌮𑌮𑌾𑌗𑍍𑌰𑌤𑍋 𑌵𑌨𑍌𑌕𑌸𑌾 𑌤𑌚𑍍𑌛 𑌤𑌥𑌾𑌸𑍍𑌤𑍁 𑌨𑌾𑌨𑍍𑌯𑌥𑌾 ॥ 14 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌦𑍍𑌵𑌾𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
