śrīmadvālmīkīya rāmāyaṇē sundarakāṇḍam ।
atha dvātriṃśassargaḥ ।
tataśśākhāntarē līnaṃ dṛṣṭvā chalitamānasā ।
vēṣṭitārjunavastraṃ taṃ vidyutsaṅghātapiṅgalam ॥ 1 ॥
sā dadarśa kapiṃ tatra praśritaṃ priyavādinam ।
phullāśōkōtkarābhāsaṃ taptachāmīkarēkṣaṇam ॥ 2 ॥
maithilī chintayāmāsa vismayaṃ paramaṃ gatā ।
ahō bhīmamidaṃ rūpaṃ vānarasya durāsadam ॥ 3 ॥
durnirīkṣamiti jñātvā punarēva mumōha sā ।
vilalāpa bhṛśaṃ sītā karuṇaṃ bhayamōhitā ॥ 4 ॥
rāmarāmēti duḥkhārtā lakṣmaṇēti cha bhāminī ।
rurōda bahudhā sītā mandaṃ mandasvarā satī ॥ 5 ॥
sā taṃ dṛṣṭvā hariśrēṣṭhaṃ vinītavadupasthitam ।
maithilī chintayāmāsa svapnō'yamiti bhāminī ॥ 6 ॥
sā vīkṣamāṇā pṛthubhugnavaktraṃ śākhāmṛgēndrasya yathōktakāram ।
dadarśa piṅgādhipatē ramātyaṃ vātātmajaṃ buddhimatāṃ variṣṭham ॥ 7 ॥
sā taṃ samīkṣyaiva bhṛśaṃ visañjñā gatāsukalpēna babhūva sītā ।
chirēṇa sañjñāṃ pratilabhya bhūyō vichintayāmāsa viśālanētrā ॥ 8 ॥
svapnē mayā'yaṃ vikṛtō'dya dṛṣṭaśśākhāmṛgaśśāstragaṇairniṣiddhaḥ ।
svastyastu rāmāya sa lakṣmaṇāya tathā piturmē janakasya rājñaḥ ॥ 9 ॥
svapnō'pi nāyaṃ nahi mē'sti nidrā śōkēna duḥkhēna cha pīḍitāyāḥ ।
sukhaṃ hi mē nāsti yatō'smi hīnā tēnēndupūrṇapratimānanēna ॥ 10 ॥
rāmēti rāmēti sadaiva buddhyā vichintya vāchā bruvatī tamēva ।
tasyānurūpāṃ cha kathāṃ tadarthamēvaṃ prapaśyāmi tathā śṛṇōmi ॥ 11 ॥
ahaṃ hi tasyādya manōbhavēna sampīḍitā tadgatasarvabhāvā ।
vichintayantī satataṃ tamēva tathaiva paśyāmi tathā śṛṇōmi ॥ 12 ॥
manōrathassyāditi chintayāmi tathāpi buddhyā cha vitarkayāmi ।
kiṃ kāraṇaṃ tasya hi nāsti rūpaṃ suvyaktarūpaścha vadatyayaṃ mām ॥ 13 ॥
namō'stu vāchaspatayē savajriṇē svayambhuvē chaiva hutāśanāya cha ।
anēna chōktaṃ yadidaṃ mamāgratō vanaukasā tachCha tathāstu nānyathā ॥ 14 ॥
ityārṣē śrīmadrāmāyaṇē vālmīkīya ādikāvyē sundarakāṇḍē dvātriṃśassargaḥ ॥
