શ્રીમદ્વાલ્મીકીય રામાયણે સુંદરકાંડમ્ ।
અથ દ્વાત્રિંશસ્સર્ગઃ ।
તતશ્શાખાંતરે લીનં દૃષ્ટ્વા ચલિતમાનસા ।
વેષ્ટિતાર્જુનવસ્ત્રં તં વિદ્યુત્સંઘાતપિંગલમ્ ॥ 1 ॥
સા દદર્શ કપિં તત્ર પ્રશ્રિતં પ્રિયવાદિનમ્ ।
ફુલ્લાશોકોત્કરાભાસં તપ્તચામીકરેક્ષણમ્ ॥ 2 ॥
મૈથિલી ચિંતયામાસ વિસ્મયં પરમં ગતા ।
અહો ભીમમિદં રૂપં વાનરસ્ય દુરાસદમ્ ॥ 3 ॥
દુર્નિરીક્ષમિતિ જ્ઞાત્વા પુનરેવ મુમોહ સા ।
વિલલાપ ભૃશં સીતા કરુણં ભયમોહિતા ॥ 4 ॥
રામરામેતિ દુઃખાર્તા લક્ષ્મણેતિ ચ ભામિની ।
રુરોદ બહુધા સીતા મંદં મંદસ્વરા સતી ॥ 5 ॥
સા તં દૃષ્ટ્વા હરિશ્રેષ્ઠં વિનીતવદુપસ્થિતમ્ ।
મૈથિલી ચિંતયામાસ સ્વપ્નોઽયમિતિ ભામિની ॥ 6 ॥
સા વીક્ષમાણા પૃથુભુગ્નવક્ત્રં શાખામૃગેંદ્રસ્ય યથોક્તકારમ્ ।
દદર્શ પિંગાધિપતે રમાત્યં વાતાત્મજં બુદ્ધિમતાં વરિષ્ઠમ્ ॥ 7 ॥
સા તં સમીક્ષ્યૈવ ભૃશં વિસંજ્ઞા ગતાસુકલ્પેન બભૂવ સીતા ।
ચિરેણ સંજ્ઞાં પ્રતિલભ્ય ભૂયો વિચિંતયામાસ વિશાલનેત્રા ॥ 8 ॥
સ્વપ્ને મયાઽયં વિકૃતોઽદ્ય દૃષ્ટશ્શાખામૃગશ્શાસ્ત્રગણૈર્નિષિદ્ધઃ ।
સ્વસ્ત્યસ્તુ રામાય સ લક્ષ્મણાય તથા પિતુર્મે જનકસ્ય રાજ્ઞઃ ॥ 9 ॥
સ્વપ્નોઽપિ નાયં નહિ મેઽસ્તિ નિદ્રા શોકેન દુઃખેન ચ પીડિતાયાઃ ।
સુખં હિ મે નાસ્તિ યતોઽસ્મિ હીના તેનેંદુપૂર્ણપ્રતિમાનનેન ॥ 10 ॥
રામેતિ રામેતિ સદૈવ બુદ્ધ્યા વિચિંત્ય વાચા બ્રુવતી તમેવ ।
તસ્યાનુરૂપાં ચ કથાં તદર્થમેવં પ્રપશ્યામિ તથા શૃણોમિ ॥ 11 ॥
અહં હિ તસ્યાદ્ય મનોભવેન સંપીડિતા તદ્ગતસર્વભાવા ।
વિચિંતયંતી સતતં તમેવ તથૈવ પશ્યામિ તથા શૃણોમિ ॥ 12 ॥
મનોરથસ્સ્યાદિતિ ચિંતયામિ તથાપિ બુદ્ધ્યા ચ વિતર્કયામિ ।
કિં કારણં તસ્ય હિ નાસ્તિ રૂપં સુવ્યક્તરૂપશ્ચ વદત્યયં મામ્ ॥ 13 ॥
નમોઽસ્તુ વાચસ્પતયે સવજ્રિણે સ્વયંભુવે ચૈવ હુતાશનાય ચ ।
અનેન ચોક્તં યદિદં મમાગ્રતો વનૌકસા તચ્છ તથાસ્તુ નાન્યથા ॥ 14 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે દ્વાત્રિંશસ્સર્ગઃ ॥
