শ্রীমদ্বাল্মীকীয় রামাযণে সুংদরকাংডম্ ।
অথ দ্বাত্রিংশস্সর্গঃ ।
ততশ্শাখাংতরে লীনং দৃষ্ট্বা চলিতমানসা ।
বেষ্টিতার্জুনবস্ত্রং তং বিদ্য়ুত্সংঘাতপিংগলম্ ॥ 1 ॥
সা দদর্শ কপিং তত্র প্রশ্রিতং প্রিযবাদিনম্ ।
ফুল্লাশোকোত্করাভাসং তপ্তচামীকরেক্ষণম্ ॥ 2 ॥
মৈথিলী চিংতয়ামাস বিস্ময়ং পরমং গতা ।
অহো ভীমমিদং রূপং বানরস্য় দুরাসদম্ ॥ 3 ॥
দুর্নিরীক্ষমিতি জ্ঞাত্বা পুনরেব মুমোহ সা ।
বিললাপ ভৃশং সীতা করুণং ভযমোহিতা ॥ 4 ॥
রামরামেতি দুঃখার্তা লক্ষ্মণেতি চ ভামিনী ।
রুরোদ বহুধা সীতা মংদং মংদস্বরা সতী ॥ 5 ॥
সা তং দৃষ্ট্বা হরিশ্রেষ্ঠং বিনীতবদুপস্থিতম্ ।
মৈথিলী চিংতয়ামাস স্বপ্নোঽযমিতি ভামিনী ॥ 6 ॥
সা বীক্ষমাণা পৃথুভুগ্নবক্ত্রং শাখামৃগেংদ্রস্য় যথোক্তকারম্ ।
দদর্শ পিংগাধিপতে রমাত্য়ং বাতাত্মজং বুদ্ধিমতাং বরিষ্ঠম্ ॥ 7 ॥
সা তং সমীক্ষ্য়ৈব ভৃশং বিসংজ্ঞা গতাসুকল্পেন বভূব সীতা ।
চিরেণ সংজ্ঞাং প্রতিলভ্য় ভূয়ো বিচিংতয়ামাস বিশালনেত্রা ॥ 8 ॥
স্বপ্নে ময়াঽয়ং বিকৃতোঽদ্য় দৃষ্টশ্শাখামৃগশ্শাস্ত্রগণৈর্নিষিদ্ধঃ ।
স্বস্ত্যস্তু রামায় স লক্ষ্মণায় তথা পিতুর্মে জনকস্য় রাজ্ঞঃ ॥ 9 ॥
স্বপ্নোঽপি নায়ং নহি মেঽস্তি নিদ্রা শোকেন দুঃখেন চ পীডিতায়াঃ ।
সুখং হি মে নাস্তি যতোঽস্মি হীনা তেনেংদুপূর্ণপ্রতিমাননেন ॥ 10 ॥
রামেতি রামেতি সদৈব বুদ্ধ্য়া বিচিংত্য় বাচা ব্রুবতী তমেব ।
তস্য়ানুরূপাং চ কথাং তদর্থমেবং প্রপশ্য়ামি তথা শৃণোমি ॥ 11 ॥
অহং হি তস্য়াদ্য় মনোভবেন সংপীডিতা তদ্গতসর্বভাবা ।
বিচিংতয়ংতী সততং তমেব তথৈব পশ্য়ামি তথা শৃণোমি ॥ 12 ॥
মনোরথস্স্য়াদিতি চিংতয়ামি তথাপি বুদ্ধ্য়া চ বিতর্কয়ামি ।
কিং কারণং তস্য় হি নাস্তি রূপং সুব্যক্তরূপশ্চ বদত্যয়ং মাম্ ॥ 13 ॥
নমোঽস্তু বাচস্পতয়ে সবজ্রিণে স্বয়ংভুবে চৈব হুতাশনায় চ ।
অনেন চোক্তং যদিদং মমাগ্রতো বনৌকসা তচ্ছ তথাস্তু নান্যথা ॥ 14 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে দ্বাত্রিংশস্সর্গঃ ॥
